Муратниң мәхсәтлири

 Бу жили һава-райиниң қолайсизлиғиға қаримай  наһийә деханлири  25880 гектар йәргә  етиз мәликисини терип, униңдин 165 миң тонна ашлиқ йетиштүрди. Буниңда пәнжимликләрниңму төһписи бар.

     Чүнки    Пәнжим йеза  округи   деханлири башқилар билән бир қатарда вақит билән һесаплашмай  ата кәспигә садиқ  болған һалда әмгәк етиватиду. Көмүқонақни   пәрвиш қилишта, әтияз вә яз айлиридики  һава-райиниң  иссиқ болуши билән өз вақтида  йәрниң үнүмдарлиғини ашуруш үчүн минерал оғутлар билән оғутлап,  суғириш ишлириниң муһим екәнлигини мошу саһаниң мутәхәссислири  чоңқур чүшиниду вә шуниңға әмәл қилиду. Шуңа жил  он икки ай өлчүк йеридин нери кетәлмәй, оғут төкүп, техникисини ремонтлап, әтиязлиқ терилғу ишлириға тәйярлап, терип , яз бойи қайнақ аптапларға төзүп, күзниң бирдә иссиқ, бирдә ямғур, боран-чапқунлуқ күнлиригә тоғра келидиған  жиғим-терим ишлириға улишип, тиним тапмайду. «Дехан бай болмисиму ач қалмайду» дегинидәк бу жили мол  һосул елинмай қалған тәғдирдә  әндики жилға чоң үмүтләр билән бақиду. Шуниңға тиришип, интилиду.

      Йошурушниң һажити йоқки, мән деханлардин  бийил су қисинчилиғи болмиди,  ашлиқ  қенип су ичти. Яки бәзидә  бийил су кечикип келиши түпәйли , көмүқонақни  өз вақтида суғирилмай һосул күткинимиздинму аз болди дегән гәпләрни көп аңлаймән.  Пәнжимлик деханларниң  мәлум қисми өлчүк йәрлирини суғиришта   «Қорғас» канилидин су алидиғандиғини уқтум. Пурсити келип, канал  техниги Мурат Һезимов билән   у, бу мәсилиләр әтрапида   сөһбәтләштуқ.

    -Бурунқи «Жаркентирригация»  һазирқи «Қазсушар» су егилиги  дөләт карханисиниң бир участкиси болған «Қорғас» су  участкисидин Баскунчи, Алтөй вә Пәнжим йеза округиниң деханлири су алиду.    Қорғас участкисиниң Р-12 дәп атилидиған  бригадисида530 гектармәйданға 80 дин ошуқ дехан егилиги билән  деханчилиқ  һәм  бағвәнчилик қилишта  келишим шәртнамә түзүш асасида иш көриватимиз. Жутдашлар көмүқонақ, аптаппеләз ,шундақла  алма, үзүм өстүрүш билән шуғуллиниду.  Бирдинла шуни ейтай , бизниң мәхситимиз, деханларниң   етизлиғини өз вақтида суғиришини тәминләш  үчүн хизмәт көрситимиз. Әслидә деханлар етизлиғида  ериғини чепип, жилиға   үч қетим қениқ суғириши керәк. Өткән жили шундақ суғирилди,   9- сентябрь күни етизлиқлар ахирқи қетим суғирилди. Униңдин кейин ашлиқ жиғиштуруш ишлири башлинип кәтти.   «Суниңму сориғи бар» дегәндәк, исрапчилиққа йол қоймастин , суни зайә қилмастин  орунлуқ пайдилиниш мәхситидә  иш көрүш керәк. Әслидә тәвлүгигә3 гектарйәрни суғириш үчүн йетәрлик су бөлиниду.  Бәзидә униңдин ашурупму суғиришқа болиду. Әвзили тежәмлик билән пайдилинишни билиш керәк.  Бийилқи жил деханлар үчүн мурәккәп жил болди. Шуниңға қаримастин вақит билән һесаплашмай, ишлидуқ. Һәйран қалидиғиним  сәһәрликтә саат 4-5тә  қутлуқ  кәтминини мүрисигә селип,  етизлиққа қарап йол тутқан дехан билән  униң етизлиғидиму учраштим. Һә бәзидә  суғириш ишлири новити күндүзи, бәзидә кечигә келиду. Мән деханларниң ғәйритигә, ишбиләрмәнлигигә һәйран қалмаймән. Қайил болимән. Чүнки әтиязниң һәр бир күнини ғенимәт билип, өз вақтида суғарсақ ашлиқ етизда қалмайду. Деханлар «күндин қалдиң, жилдин қалдиң» дегән нәқилгә әмәл қилған һалда ишләйду. Шундақ  тәр төкүп меһнәт қилдуқ, өткән жилға  дава-дәстүримиз йоқ,   әндики жилдин үмүтимиз зор. Буйриса  келишим шәртнамиләр түзүлүп, әнди ишни әтиязда иш башлаймиз.  Йәни суғириш ишлири Норуз келиши биләнла башлиниду. Бу жили Яркәнттә қар аз яғди. Бирақ тағда қар хелә бар. Деханлар  қишниң  күни қарниң көп яғқининиму күтиду. Йәрдин нәм  кәтмәйла   терилғу ишлирини башлаветишиму шуниңда. 

    Көмүқонақтин башқа аптаппеләз билән үзүм өстүриватқанлар үчүнму имтиязлар бирдәк, суниң литр һесавиға һесап –чот   айриш арқилиқ әмәлгә ашурилидиғанлиғиниму тәкитләш орунлуқ , -  дәйду Мурат   биз билән болған сөһбәттә .

    Мурат һезимов  барлиқ һаятинини агрономлуқ кәсипкә беғишлиған  Йолдаш Һезимовниң кәнжә пәрзәнди.      Йезидики Абдулла  Розибақиев намидики мәктәпни 1986-жили тамамлиған у , Талғир  шәһиридики йеза егилигиги техникумида механизация факультетида  тәһсил көрди.  Әмгәк паалийитини   илгәрки Калинин намидики колхозда аддий шофер болуштин   башлиди. Егиликләр тарқилип, пай һесавиға өлчүк йәр елип, жутдашлири билән деханчилиқ саһасида әмгәк етиватқан у, алий билим елиш мәхситидә  Чемолған шәһиридики институтта   оқуп, алий билимлик    гидротехник мутәхәссис аталди. 2003- жилдин етиварән «Жаркентирригация» дөләт карханисида ишләватиду.

      Һезимовлар аилиси һәққидә гәп қилимизкән тәвәниң ижтимаий-ихтисадий тәрәққиятиға салмақлиқ һәссисини қошуватқан аилә әзалириниң исми наһийәдила әмәс, бәлки жумһурийәт , һәтта униң сиртиғиму яхши тонуш.

      -Мениң йеза егилиги саһасиға келишимдә мәрһум атам билән  аилимизниң тунжиси Муңдаш акамниң тәсири бар.    Муңдаш  акам  тәвәдики йеза егилиги саһасидики маһир тәшилатчиларниң бири сүпитидә әмгәк қилип, бу саһаға мунасивәтлик илмий  әмгәкләрниң яқлиған, өз дәвриниң йетүк мутәхәссислириниң бири еди. Шум әжәл уни бевақит елип кәтти. Акамдин айрилип униң  мәслиһитигә муһтаж болуп жүрдүм. Бу жудалиқ оти бесилмайла йәнә бир қериндишим Муһит акамдин тәсадипи айрилдуқ.  Жумһурийәтлик Уйғур театри сәһнисидә  ата-аниниң, дехан әвладиниң   йәни  жутдашлириниң   образлирини яритиватқан, сәһниләштүриватқан актер һәм режиссер акамниң хәлиққә бәргинидин беридиғини йәнә көп еди. Розигүл, Рошәнгүл, Гүлнарәм исимлиқ һәдилирим, анамниң  Тайиржан қериндишим атамниң орнида атам болуп  қалди. Тайиржан ака йезидики мәктәптә муәллим  болуп әвлатлиримизни тәрбийиләватиду, -дәйду.

 Һәқиқәтәнму  жуттики инавәтлик, ибрәтлик аилиниң  кәнжиси чоң өйниң чириғини яндуруп,  рәпиқиси Меһирай     иккиси  төрт пәрзәнтни қатарға қошуватиду.

       Жутдашлири Мурат билән Меһирайниң  тәдбирчанлиғини тәкитләйду. Демисиму    Пәнжимниң мәркизидә Улуқ Ипәк йоли бойиға «Караван сарай» кафесини ишқа қошуведи, әндиликтә  хәлиққә хизмәт көрситиш паалийитини кәңәйтип,   100, 300 ,400 орунлуқ  комплексқа айландурди.  Кафе йенида сатрашхана,  озуқ-түлүк  вә гөш сатидиған дукан билән аптека ечип, 25 адәмни турақлиқ иш билән тәминлимәктә. Той-төкүн нәзир чирақлар ушбу  заманивий үлгидә селинған кафеда өтиду.  

      -Мән  жутдашлиримға    елимиз Президенти Нурсултан Назарбавниң  беваситә рәһбәрлиги билән әмәлгә ешиватқан « Саламатты Қазақстан» вә «Денсаулық» дөләт программилирини әмәлгә ашурушқа һәссәмни қошуш нийитим бар.   Чүнки  12000 ға  йеқин аһалиси  бар йеза округида медицинилиқ мәркәз селип, жутдашлиримниң саламәтлигини назарәт қилиш  хизмитини жанландурсам дегән арман-мәхсәтләр аз әмәс.  Адәм саламәтлиги һәммидин қиммәт. Пәрзәнтлиримниң иккиси медицина саһаси хадими болуштәк жавапкәрлиги чоң  саһани таллавалғачқа  улар охшаш  яш мутәхәссисләрни иш билән  тәмин етишниң амилини издәш бүгүнки күнниң тәливи болуп қалмақта.

  Мурат билән сөһбәтлишиватқанда идаригә  Панфилов  наһийәлик  мәслиһәтниң депутати,  «Қорғас» су  участкисиниң  башлиғи Руслан Тулақбаев  кирип кәлди.

     -Уйғур қериндашлиримизниң   ата кәспи деханчилиқ болғачқа уларни  әмгәкчанлиғи  түпәйли йәргә үжүрә қилип, чөлни бостан қиливатқан   қедимий,  мәдәнийәтлик хәлиқ дәп билимән.  Мурат  бауырым тәдбирчан, ишбиләрмән мутәхәссисләрниң бири. Биз уни етиздин издәймиз. Бизниң карханидики йетүк мутәхәссисләрниң бири  сүпитидә наһийәниң ижтимаий, ихтисадий  тәрәқиятиға тегишлик һәссисини қошуватиду. Әнди оттура вә кичик тижарәтни тәрәққий әткүзүп, пәнжимликләрниң  жириғини йеқин қиливатқан әл оғлани бу күнләрдә  һаятиниң  әллигинчи даванини қарши еливатиду. «Атаңниң оғли болғичә әлниң оғли бол» дегәндәк  жутиға, елимизгә  хизмәт қиливатқан Муратқа  саламәтлик,  аиләвий бәхит тиләймән,-деди.

     «Жаркентирригация» дөләт карханисида узун жиллар  әмгәк қилип, һазир һөрмәтлик дәм елишқа чиққан   Шәмсимәһәммәт Ниязов болса,

      -Мән һезимовлар аилисиниң дехан әвлади дәп билимән. Атиси туғма агроном Йолдаш акиниң   избасари  Мурат  шәхсий дехан егилигини тәшкилләп деханчилиқтиму замандашлири қатарида  өзини синап келиватиду .Әнди униң беваситә кәспи һәққидә гәп қилғанда  һәр бир жилниң һосуллуқ болуши су техниги  Муратқиму мәлум дәрижидә  бағлиқ екәнлигини тәкитлигән болар едим.  Ериғини жиғлап чапқан киши суйини ойнап жүрүп тутуп, мол һосул алидиғанлиғи ениқ гәп. Шундақ екән  униң  ишиға утуқ, мустәһкәм саламәтлик көңүл хатиржәмлигини тиләймән,- дәйду.

      Бизму бу тиләкләргә қошулдуқ.

Г.Исмайилжанова.

Күнтізбе

« Шілде 2019 »
Дс Сс Ср Бс Жм Сб Жк
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

booked.net