Дехан әвладиму шеир язиду

05.04.2019ж

Хәлқимизниң булбули, ғәзәлхан шаир   Хелил һәмраев   барлиқ аңлиқ һаятини маарип саһасиға беғишлиди.Лекин уни хәлқимиз  ғәзәлхан, дехан шаир сүпитидә  тонуйду. 

    Чүнки дәрсиликләрдинла әмәс, бәлки  униң шеирий топламлиридин  «Дехан» поэмисини яқтуруп оқумиған уйғур болмиса керәк. Жилниң 365 күни қолидин қутлуқ кәтминини чүшәрмәй өткән дехан әждадини униң тинимсиз әмгигини, дәстихандики ақ ненини һәр мисрасида тәсвирләп өтти. Шундақла  Йәттисуниң бағ бостани болған Яркәнтниң әжайип гөзәл  тәбиитини, бағ Өсәкни күйләп өтти. Хелил Һәмрани  Өсәктә сайриған булбулға қияс қилип Өсәкниң булбули дейишиму шуниңдин болса керәк.  

     Хелил һәмраев   һаятиниң ахириғичә Пәнжим йезисидики А.Розибақиев намидики оттура мәктәптә  уйғур тили вә әдәбияти пәнлиридин дәрис бәрди. Йүзлигән шагиртларни ана тили  вә әдәбиятини сөйүшкә тәрбийиләп, болупму поэзияниң тилсим  сирлириға мәһлия қилди. Хелил һәмраев өзи ижат қилған шеирлирини әжайип  ипадилик оқуш маһири еди. Униң бом, жараңлиқ авазини  тиңшиған оқуғучиси  йә  бир аңлашқа  тәшна  еди. 

   У  рәпиқиси Ханум һәдә билән  алтә пәрзәнт тепип қатарға қошти.   Дәсләп аилә шараитиға  бола Яркәнт шәһиридә яшиғачқа пәрзәнтлириниң һәммиси шәһәрдики   Луначарский намидики мәктәптә рус  синиплирида  билим алди.  27 нәврисиниң  7  уйғур    синиплирида оқуса, қалғанлири рус тилида билим алди.  Пәрзәнтлиридин Пәрһат, Нурзат  Пәризат атиси охшаш шеирийәткә қизиқип өсти. Уларниң шеирлири наһийәлик  «Яркәнт  тәвәси» гезитида елан қилинған. Әнди нәвриси Нуршат рус тилида оқуғиниға қаримастин бовиси Хелил  охшаш уйғур  һәм  рус тиллирида  ижат қиливатқан һәвәскар шаир.

                Нәвриси Нуршатниң пәрзәнтлири йәни Х.Һәмраевниң чәврилири бовиси намида аталған мәктәптә әла баһаларға оқуватиду. Дилназ  чоң бовиси намидики  мәктәпни муваппәқийәтлик тамамлап, һазир жумһурийәтлик медицинилиқ колледжда тәһсил көрмәктә. Дилназ  наһийәлик, вилайәтлик, жумһурийәтлик фестивальларға қатнишип, өз ижадидин шеирларни ипадилик оқуш байқашлириниң ғалиби. Ейтайлуқ  Билал Назим оқушлири,  Илия Бәхтия,  Хелил Һәмраев  вә  Абдумежит Дөләтовниң тәвәллудлириға беғишланған   шеирийәт байқашлирида мукапатлиқ орунларға қол йәткүзгән яш ижаткар. Медицинилиқ колледжда оқуватсиму шеирийәт униң арами. Бош вақит тапсила бовиси охшаш ана жутиниң әмгәкчан адәмлири,  тәбиәт  мәнзирисини  күйләшкә майил. Нуршатниң  йәнә бир пәрзәнди  Илияс   Хелил Һәмраев намидики мәктәпни  тамамлаш алдида туриду. У  спортниң йәкму йәк түри билән шуғуллиниватқан, келәчигидин үмүт күткизиватқанларниң бири.                                                 (Өз  мухбиримиз).

Күнтізбе

« Қыркүйек 2019 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

booked.net