Чоң Чиғандики чоң мәйрәм

19.04.2019ж

Әждатлиримиз  «Зимистан қиштин аман есән чиқивалсақ көккә улишимиз»,- дәп баһарниң келишини тақәтсизлик билән күтүп, уни дағ-дуғилиқ қарши алған екән.  Болупму көк чөшүрә мәйримини уюштуруп, ушбу   миллий таамиға бөләкчә  етивар бәргәнлигиму тарихтин мәлум .

Тәкитләш керәкки  , бу мәрикә  һазирму жилдин-жилға аммивий түс елип, анилиримиз билән момилиримиз уни тәйярлаш услублирини намайиш қилип келиватиду. Һәтта бәзидә  чевәр қоллуқ ханим-қизлар  байқашларға чүшиватқанлиғи һәркимни хошал қилиду. 

Йеқинда наһийәлик уйғур этномәдәнийәт мәркизиниң тәшәббуси ,Чоң Чиған йеза округи һакимчилиғиниң уюштурушида Қазақстан Жумһурийитиниң Тунжа Президенти-Елбасы Нурсултан Назарбаевниң «Келәчәккә нишан: мәнивий йеңилиниш» мақалисидики көрсәтмә вә вәзипиләрни әмәлгә ашуруш мәхситидә «Көк чөшүрә вә  әткән чай» мәйрими уюштурулди.   Чоң Чиған йеза округиниң мәркизидики   мәдәнийәт өйи алдидики мәйданда өтүливатқан мәйрәмгә  наһийә жамаәтчилиги билән  иш вә оқуш орунлириниң рәһбәрлири вә   нураний анилар билән  көпни көргән  атилар, барлиқ һаятини колхоз -совхозларда ишләп,  наһийәниң  ижтимаий-ихтисадий тәрәққиятиға биркишилик һәссисини қошқан атилар  тәклип қилинипту.  Мәйданда қиз-келинчәкләр  жоза раслап, миллий таамларни пиширип, көргәзмисини һазирлап, жигитләр болса от қалап,чай қайнитип, худди бир аилиниң балилиридәк  тәйярлиқлар көрмәктә. Сазәндиләр бәзмиләргә чүшүп, нахша уссуллар  ижра қилинип, жутта баһар тәнтәниси һөкүм сүрмәктә. Бу күни  Қуяшму күлүп чиқип, нурлирини тәкши чечиватқандәк туюлиду кишигә .    

                Әзәлдин инақлиғи ,өмлүги билән пәриқлинип келиватқан   тәвәдики әң қедимий  һәм әң чоң Чоң Чиған жути- мәйрәмгә жуқури  тәйярлиқлар көргәнлиги байқилип туриду. Әтигәндә  саат тоққузлар чамиси  биләнла   бу мәйрәмгә қатнишидиған он бир  устәлдә миллий таамлар қоюлуп, жирақ-йеқиндин кәлгән  меһманларға миллий кийимләрдә миллий   усулуқ-  әткән чай сунуватқан ханим-қизлар  жутниң меһмандостлуғини намайиш қилди.    Чоң Чиған йеза округиға қарашлиқ Кичик Чиған, Қириққудуқ йезилири билән хошна йеза-авуллардин, шәһәрдин  келиватқан адәмләр айиғи үзиләр әмәс. Шундақ бир чағда йәни алдин ала бәлгүләнгән вақитта   карнай-сүрнәй садаси билән риясәтчиләр «Көк чөшүрә вә әткән чай»  фестивалини очуқ дәп елан қилди. «Өлүк рази болмай тирик бейимайду» дегәндәк, дәсләп, барлиқ һаятини мошу йезида қутлуқ кәтмини билән ашлиқ терип, әрләр билән тәң  ишлигән  дехан ана Адаләт Зәйнавдиноваға буниңдин топ-тоғра 40 жил илгири мошу күни Социалистик Әмгәк Қәһримани атиғиниң берилгәнлигини  тәкитләп, хатириләп өткәндин кейинла  мәйрәм рәсмий башланди.

                Норуз мәйримигә улишипла өтүливатқан  баһар тәнтәниси болған бу мәйрәмдә   Чоң Чиған йеза округиниң һакими Мақсат Оспанбеков жиғилған көпчиликни мәйрәм билән тәбрикләп, йеза округидики йәттә милләт вәкиллириниң  достлуғи билән  өмлүгини тилға алди.

                -Буниңдин бир   аз вақит илгири «Боғусақ» мәйримини атап  өткән едуқ.Әйнә шу мәйрәмдиму асасий турғунлардин болған уйғур қазақ хәлқи бирликтә қатнишип, достлуғимизни намайиш қилдуқ. Бүгүн болса уйғур миллий таамлиридин көк чөшүрә мәйримигә йәнә икки милләтниң вәкиллири қатнишип олтириду. Тили бир,  дили бир қеринлаш икки хәлиқниң тааамлириму ортақ,- деди.   

         Алмута вилайәтлик мәслиһәтниң депутати, вилайәтлик уйғур этномәдәнийәт мәркизиниң  рәиси  Закиржан Қузиев:

                -Мән  жут әһлигә миннәтдарлиғимни билдүрмән. Бүгүн баһар тәнтәниси, достлуқ тәнтәниси болуватиду. Яшанғанлар һөрмәттә, яшлар   хизмәттә. Таамлар тизилған жозиларни арилап көрүп чиқип, һәр қайсиңларни биринчи орунға мунасип баһалаш орунлуқмикин дәп қалдим. Чүнки кәң йейилған дәстиханда миллий таамлар билән әткән чай, нанниң  онлиған түрлири бәрикәтлик һаятимизни дәлилләп туриду.  Миллий кийим-кечәк, саз-нәғмиләр тарихтин учур бериду. Шуңа адил қазилар мукапатлиқ орунларға лайиқ дәп баһалиғанларға  шәхсән өзәм намимдин азду-тола һамийлиқ  қилишни, муқәддәс пәрзим дәп билимән.    Шундақла   тижарәтчи Серик Ақсубаев көпчиликни  мәйрәм билән тәбрикләп,  наһийәлик уйғур этномәдәнийәт мәркизи бенасиға ахчилиқ ярдәм  көрситидиғанлиғини билдүрди. Шуниңдин кейин  алтә адәмдин ибарәт болған адил қазилар  қатнишиватқан он бир  мәһәллә, коллективлар тәрипидин расланған  дәстихандики милий таамлар көргәзмисини, болупму көк чөшүрә , вә әткәнчайниң  түрлири билән тонушуп, баһалашқа атланди. Мошу йәрдә алдин-ала байқашқа қатнишиватқан  мәһәллә вә колективларни  байқашниң шәрти бойичә баһалаш әскәртилди. Шундақ қилип бу күни     Чоң Чиған йезисидики  «Асимжан  Мәсимов» ,  «Аблимит Хелилов» , «Лутпуллам Шәрипов», «Адаләт Зәйнавдинова», «Абдужелил Дөләтов», Қириққудуқ   вә  Кичик Чиған мәһәллилири билән Чоң Чиған оттура мәктиви, «Шуғыла» балилар бағчиси,  Қириққудуқ йезисидики Яркәнт оттура мәктиви, «Қириққудуқ амбулаторияси» болуп, жәми он бир команда қатнашти.   Тәкитләш керәкки, һәр бир қатнашқучи топ  байқаш шәртлиригә реайә қилишқа тиришқан.  Улар миллий таамлардин көк чөшүриниң  түрлири билән әткән чайниңму бәш түридин  тәйярлап бәс- бәскә чүшти. Адил қазиларға  бәрикәтлик мол йейилған миллий таамларни тәйярлаш  маһирлирини  баһалаш оңайға чүшмиди. Лекин тәркивидә кәспий ашпәз, навай, мәдәнийәт өйи хадимлири, қәндәләтчиләрдин тәркип  тапқан адил қазилар мавзуға мунасивәтлик  көк чөшүрә болғандин кейин бедә вә униңға қошумчә көктатлар қошулидиғанлиғиға әһмийәт  бәрди.  Бу күни шундақла әткәнчай, көк чөшүрә һәққидә шеирларни ипадилик  ядқа оқулуп, миллий уссул, нахша-сазлар ижра қилинди.

                Шундақ қилип Көк чөшүрә мәйримидә Баш  мукапат-Гран при-Асимжан Мәсимов мәһәллиси, биринчи мукапатлиқ орунға АблимитХелилов, мукапатлик иккинчи орунға Чоң Чиған оттура мәктиви, биринчи  орунға болса  Қириққудуқ мәһәллиси мунасип дәп   баһаланди. Мукапатлиқ орунға еришкән вә паал қатнашқан командиларға Чоң Чиған йеза округи вә наһийәлик уйғур этномәдәнийиәт мәркизиниң тәшәккүрнамилири билән ахчилиқ соғилар тәғдим қилинди.

                Ахирида сәһнигә көтирилгән наһийәлик уйғур  этномәдәнийәт мәркизиниң  рәиси Ризайдин Әйсаев   «Көк чөшүрә» мәйриминиң келәр жили Көктал йезисида өтидиғанлиғини тәкитләп , гүлтавақни Көктал йезисиниң  ханим-қизлар кеңишиниң рәиси Хуршидәм  Бағаеваға тапшурди.

                Мәйрәм ахири Чоң Чиған оттура мәктивиниң оқуғучилири, йеза сәнъәт һәвәскарлири вә «Саһинур» уссулчилар топиниң концертиға улашти.  Жут әһли уйғурчә, қазақчә  яңриған нахша-сазлар астида   көк чөшүригә еғиз тегип,бир-биригә әң яхши тиләклирини изһар қилишти.                                 

Гөһәрбүви 

                   Исмайилжанова.

Күнтізбе

« Қыркүйек 2019 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

booked.net