«Әждат мираси» -уссул кечилиги

06.05.2019ж

Саһинур Рәхмидинова -  Яркәнт тәвәсидила әмәс, бәлки  жумһурийәт вә униң сиртидики сәнъәтхумар хәлқимизгә тонулған  хореограф.

Кәспий уссулчи -  бу күнләрдә наһийәдики әң чоң билим дәргаһлириниң бири болған Яркәнт гуманитарлиқ техникилиқ колледжда музыка бөлүмидә устазлиқ қиливатиду. Устазлиқ қилиш билән биллә өсүп келиватқан яш әвлатни уссул сәнъитигә мәһлия қилип келиватқанлиғи сөзимизгә мисал болалайду.  Йеқинда  наһийәлик Мәдәнийәт өйидә әйнә шу кәспий сәнъәткар -  хореограф  Саһинур Рәхмидинованиң уссул кечилиги болуп өтти. Шуни бирдинла тәкитләш керәкки, бәзи бир концерт , ижадий кәчләргә   тамашибин жиғиш қийин болуватқанлиғи  сир әмәс.  Һә, бәзидә униң үчүн жигит башлириниң өйму-өй кирип, концертқа, спектакльға  билет тарқитип аваригәрчиликтә жүргәнлигиму бизгә мәлумғу. Лекин бу ижадий кәчниң билети сетилимға чиқтиму, чиқмидиму уқалмай қалдуқ. Чүнки билет издәп, йәнә  қачан уюштурулидикән дегән соаллар билән бизгә муражиәт қилғанлар интайин көп болди . 400 орунлуқ мәдәнйәт өйидики тамашибинниң яш өзгичилигигиму  һәйран қелип, зоқландуқ. Чүнки бели мүкчәйгән  йеши сәксәндин алқиған момилар билән йәттә яшлиқ  гөдәкниңму көзи сәһнидә .  Улар бар иждиһати билән  уссул кечилигидин бир алаһидиликни күтиватқанлиғини  байқавелишқа болатти. Мана мошундақ һиссиятлар илкидә бизму үчсаатлиқ уссул кечилигини тамашә қилишқа муйәссәр болдуқ.  

    Шундақ қилип  «Әждат  мираси» мавзусиға мунасивәтлик чирайлиқ бәзәнләндүрүлгән сәһнидә риясәтчиләр Камунар Турсунов билән Нуршат Ғожашев Саһинур  Рәхмидинованиң һаяти вә ижадий паалийитидин  көпчиликкә тонуштуруп,  новәтни уссуларға бәрди.

    Саһинур бу күни өзи тәрбийиләватқан  70 шагирти билән  әждатлиримиздин мирас қалған бай сәнъитмизни намайиш қилалиди.  Уйғурниң  аммибап уссуллири билән  унтулуп кетиватқан һә бәзидә  техи көпчилик бехәвәр уссуллирини сәһниләштүрүпту.   Қумул уссули, сама вә чач уссулини  дәсләпкиләрдин болуп сәһниләштүргән  Саһинур һәқиқәтәнму мавзу үстидә ижадий  издәнгәнлигини байқавелиш тәс әмәс.

     Мәдәнийәт өйидә  бу  кәчтә кәтминини мүрисигә селип уссулға чүшкән дехан обризи, ашиқлар   билән бирликтә  қазақ миллий уссуллиридин «Аққу», рус хәлиқ уссуллири, өзбәк вә  Томирис, тарантеллани   ижра қилған  шагиртларниң яш өзгичигилигиму әһмийәт берилгән .Чүнки 6 яштин  тартип  18 вә униңдин жуқури яштики уссул ишқивазлири бир-биридин жәзибилик, бир-биридин есил, әвришим уссулларни бабиға йәткүзүп, йүксәк маһарәт билән  ижра қилди. Кәспий  чевәрликниң үлгисини намайиш қилған Саһинур вә «Саһинур» уссул ансамбли әзалири  жигит-қизлар  бизгә   бәәйни сәһнә үчүн яралғандәк тәсират қалдурди.

    Ижадий кәчтә   сатира вә юмор жанрида  өзлирини синап келиватқан   Камунар Турсунов билән Нуршат Ғожашев миниатюрилири билән күлкигә ғәриқ қилди.  Истедатлиқ нахшичилар Молутжан Тохтахунов билән Абдурешит Һошуров  һәм  кәч меһмини, Саһинурниң           курсдиши «Долан» уссул ансамблиниң йетәкчиси Бәхтияр Имранниң сәһнигә  чиқиши  хуш дәқиқиләрни һәдийә қилди.  

    Ахирида Саһинурниң устазлири, кәсипдашлири вә маддий жәһәттин қоллап-қувәтләватқан мәрт-мәрданә жутдашлири  Сүрийәм Һезимова, Реһимжан Тохтахунова, Яркәнт гуманитарлиқ техникилиқ колледжиниң  мудири Баян Сауранбаева, кәспий хореограф-устаз Гүлшат Қасимова наһийәлик уйғур этномәдәнийәт   мәркизиниң рәиси Ризайдин Әйсаев вә Чоң Чиған йеза округиниң һакими Мақсат Оспанбеков,  «Пәрваз» хәлиқ нахша-уссул ансамблиниң йетәкчиси Оғләм Тайирова,  курсдаш                        достлири намидин «Айжанқыз» уссул ансамбли әзалири, наһийәлик мәдәнийәт өйиниң методисти  Бақытгүл Байжумаева    сәһнигә көтирилип, «Саһинур» ансамблини тәшкил қилип, яшлиримизға  миллий уссулларниң қир-сирлирини үгитиватқан сәнъәткарға утуқ тилиди. Жумһурийәтлик уйғур этномәдәнийәт мәркизи йенидики Анилар кеңишиниң рәиси Жаһангир Муратова,  жумһурийәтлик  аиләвий журналниң баш муһәррири, Меруерт Әйтенова изгү тиләклирини изһар қилип, «Үздік ұстаз» медали билән мукапатлиди.

                Биз пурсәттин пайдилинип, сәнъәттики устазлирини  сөһбәткә жәлип қилдуқ.

 Оғләм Тайирова:

    -Саһинурни  бәш йешида бу күнләрдә  мән рәһбәрлик қиливатқан ансамбльға аниси Банум һәдә йетиләп елип кәлгән еди. Шунда  кичиккинә қизчақ  дәсләп нахша ейтип  сәһнигә чиқти. Әнди    уссулни болса йәттә йешидин  ойнашқа башлиди.  Мәктәп оқуғучиси  пәйтидинла миллий сәнъитимизни сөйүп, үгинишкә, издинишкә бәл бағлиған қизимиз мустәқилликниң тәңтуши. Йезидики  Чоң Чиған оттура мәктивини  әла баһаларға тамамлап, Яркәнттики колледжниң уйғур тили вә әдәбияти  бөлүмигә оқушқа чүшүп, әла оқуши билән биллә коледждики «Айжанқыз»   ансамбли әзаси  болуп, жумһурийәт даирисидә көрүнүшкә башлиди.  

                Буниңдин бир аз жиллар бизниң ансамбльға әза болған Саһинур һазир өзи уссулчиларниң  устази. «Саһинур»  ансамбли әзалириниң қол йәткүзиватқан утуқлири аз әмәс : «Дала сазы», «Біз бақытты баламыз», «Жаз фестиваль» қатарлиқ жумһурийәтлик байқаш-фестивальларниң баш мукапитини йеңивалди. Мән униң сәнъәт йолидики дәсләпки устази болғачқа мән бүгүн бөләкчә һаяжанлинип, тәвринип туримән. Һәтта мәғрурлиниш һиссиятлиридиму болуватимән. 

                Сүрийәм  Һезимова:

   - Мән Саһинурниң устази әмәсмән. Биз , өмүрлүк жүптим  Дилшат Насиров иккимиз миллий нахша-саз, уссул ижра қилишта қабилийитимиз йоқ. Лекин биз сәнъәтни сөйгән инсанлар болғачқа  Саһинурдәк  уссулчи, Абдурешит вә шуниңға охшаш онлиған нахшичи вә сазәндиләрниң бешини қошуп, милий сәнъитимизни  тәрәққий әттүрүш мәхситидә «Ирадә» нахша-уссул ансамблини тәшкил қилип, уларниң кәспий сәнъәткарлардин билим елишини халидуқ. Шунда уларни Хитай Хәлиқ жумһурийитиниң  Шинжаң автоном районидики Сәнъәт институтида билим елишиға қол учимизни бәрдуқ. Шунда Саһинур ХХЖниң Бежин дөләт университетиниң биринчи дәрижилик уссулчиси  Ризвангүл Ибраһимда  тәрбийә алди. Шунда кәспий сәнъәткарниң ейтқини: Бу әжайип  қабилийәтлик шагирт. Мән ишинимәнки, Саһинур мошу хилда оқуп, тиришип, издәнсә, у қиз чоқум   биринчи дәрижилик уссулчи болиду,-дәп ақ тилигини изһар қилған еди. Бүгүн биз әйнә шу күнгә йәттуқ. Саһинур жутниң қизи. 

                Реһимжан Тохтахунов:

                -Саһинур бүгүнки  ижадий кечилигигә наһайити дурус мавзу таллиған. сценарий муәллипи Әквәржан Исмайилжанов иккисиниң көп издәнгәнлигиниң  нәтижисидә биз үч саат әждатлиримизниң уссуллириниң әвлаттин-әвлатқа қелип, унтулмай сақлиниватқанлиғиниң гувачиси болдуқ.  Қумул уссули, чач уссули һәққидә мән шундақ ейтқан болар едим.

                Жаһангир Муратова :

                -Саһинур колледжда  уйғур тили вә әдәбиятини, Алмутидики Қизлар Дөләт педагогикилиқ университетта хорегорафия кәспини егилигән  истедат егиси .  Үрүмчидики «Сәнъәт» институтидиму тәһсил көргән сәнъәткар бүгүн  өзиниң немигә қадир екәнлигини толуқ намайиш қилди.  Саһинурниң ата-аниси Нариман вә Банумға миннәтдарлиғим чәксиз.  Билим бәргән устазлири билән қоллап-қувәтлигән жутдашлар миллий  уссул кечилигидин  әжайип чоң тәсират алди дәп ойлаймән.

                  Мана шундақ техи яш болғанлиғиға қаримай «Яшлар жили» даирисидә вә «Мәдәний мирас» программисиға мувапиқ ижадий кечилигини уюштурған   Саһинур  Рәхмидинова һәм  униң шагиртлирниң  ижадий паалийитиниң  йәниму өсүп гүллинишигә тиләкдашлиғимизни  билдүримиз.

Г.Исмайилжанова.

 

Күнтізбе

« Қазан 2019 »
Дс Сс Ср Бс Жм Сб Жк
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

booked.net

  • Материалды қарау саны : 640305