Издигини пәқәт изгүлүк

23.05.2019ж

Жумһурийәтлик Уйғур этномәдәнийәт мәркизи йенидики Анилар кеңишиниң рәиси Гүлжаһан Муратовани  тонумайдиғанлар камдин-кам.

Чүнки у хәйрихаһлиқ паалийити билән нәләргә бармиди, кимләр билән учрашмиди десиңизчу? Бирдә Яркәнттә, бирдә Чонжида, Довунда. Талғирда, Алмутида жүридиған Муратова яхшилиқ қилишқа алдирайду.     Анимиз бу қетим улуқ   Роза-рамзанда  жумһурийәтни арилап йәнә йолға чиқти. Мәхсити муһтаж жанларға халисанә ярдәм көрситиш.

                Шундақ  қилип Гүлжаһан һажим бу қетим    хәйри-еһсанлиқ паалийитини  дәсләп киндик қени төкүлгән Уйғур наһийәсидә башлап,  андин иккинчи ана жути Яркәнт тәвәсигә кәлди.    Панфилов наһийәсидә отуз  жилдин  ошуқ вақит  буғалтер болуп ишләп, һазир  кәнжә оғли билән Алмутида истиқамәт қиливатқан анимизниң хәйри-еһсанлиқ  паалийитидин гезитханларни  хәвәрдар қилишқа бизму алдираймиз.  Чүнки жиғлиғанни бәзләп, жиқилғанни йөләватқан Гүлжаһан һажим  Муратова көпбалилиқ, турмуш шараити төвән, баққучисидин айрилған аилиләрни озуқ түлүк  билән тәминләш билән биллә  әндиликтә өй селип бериш мәхситиниму  әмәлгә ашуриватиду.

                 Гүлжаһан  һажим Муратовани Яркәнткә   кәпту дегәнни аңлап фотомухбир Турсунмәһәммәт  ака Мәшүров билән униң өйигә  йетип бардуқ.

                -Қазақстан Жумһурийитиниң Тунжа Президенти - Елбасы Нурсултан Назарбаевниң «Келәчәккә нишан: мәнивий йеңилиниш»  мақалисидики « Туған жер» лайиһисидә  ейтип көрситилгинидәк, әгәр тижарәтчиләр туғулған йеригә  униң адәмлиригә  меһир- шәпқәтлик  болса    наһайити совап иш болиду. Мән мошу мәхсәттә   елимиздә  муһтаж жанларға аилимиз намидин  тапқан тапавитимизниң бир қисмини  сәрип қилиш  тәшәббусимни  пәрзәнтлиримгә ейтиведим, балилирим «биз бу ишқа дайим тәйяр» дәп қоллап-қувәтлиди. Һели есимда  буниңдин 25 жил илгири   мустәқилликниң дәсләпки жиллири мошу ишни қолға алдуқ.    Йошуридиғини  йоқ, дукан покәйлиридә  бүгүнкидәк  тизилип турған йемәк-ичмәк йоқ еди. Мана мошундақ улуқ ай улуқ  күнләрдә    жутдашлиримға азду-тола қол учумизни бериш мәхситидә  ун сетип алмақчи болдуқ. Ишинәмсиләр, дуканларда ун йоқ. Шуниң билән Қоңурөләндин  буғдай сетип  елип келип, уни түгмәндә тартип,   шәһәрдики мечит қоми арқилиқ  тарқатқан едуқ. У чағда  имканийитмизниң  баричә  20 аилигә  ианә қилған екәнмиз. Мана шуниңдин бери  хелә жиллар инсаний мусулманчилиқ пәрзимиз дәп житим-йесир,  баққучисидин айрилғанларға  ярдимимизни көрситип келиватимиз,  -дәйду кәмтарлиқ билән .

                Һәқиқәтәнму  Г.Муратова  25 жилдин бери мундақ соваплиқ ишниң бешида жүриду.     Бу қетим Уйғур наһийәсидә 150 аилигә,  Яркәнт тәвәсидә 180 аилигә    ун,  май, чай, рожки,  гүрүч вә шуниңға  охшаш  озуқ -түлүкләрни  елип кәлди. Аниниң қутлуқ өйигә жәм болушқан жигитбашлири һәр қайсиси мәһәллиридики муһтаж жанларниму биллә  елип кәпту.  Нурул Важитов, Алимжан Ташмәтов, Яқупжан Абдуқадиров, Ғлаждин Бақиев, Азат Гайитов, Абдуһемит Һәмраев охшаш  вә наһийәниң  барлиқ йезилиридин кәлгән  жигитбашлири Гүлжаһан һажимниң һиммитигә  көпчилик намидин апирин ейтип, пәрзәнтлиригә миннәтдарлиғини изһар қилишти.

                 Наһийәлик уйғур этномәдәнийәт мәркизи рәисиниң орунбасари Асийәм Сайитова, ханим-қизлар кеңишиниң рәиси Маһинур Аюпованиму  бу қутлуқ  босуғида учраттуқ.

                -Гүлжаһан Һажимниң бу хилдики ярдимини көрситип келиватқанлиғиға тәшәккүр ейтип, балилириниң иш-оқитигә  бәрикәт тиләймиз. Чүнки анимиз наһийәлик билим бөлүмидә  бухгалтер  болуп ишләп , һазир   Алмутида яшаватсиму  у  дайимла жутимизға келип  һалимиздин хәвәр елип, мәдәний, аммивий  иш чариләргиму  һамийлиқ қиливатқанлиғи сир әмәс.   Шундақ екән жут анисиға мустәһкәм саламәтлик,  көңүл хатиржәмлигини  тиләймиз. Бу қетим у  180 аилигә ианә қилди.  Униң хәйрихаһлиқ паалийити жилдин-жилға кәң даиридә давамлишиватиду. Анимизниң Алмута вә униң әтрапидики баққучисидин айрилған яш аниларни турушлуқ өй селип берип,  вә йемәк ичмәк билән тәмин етиватқанлиғи һәққидики әхбаратни гезит-журналлардин оқуп бәк тәсирләндуқ. Анимиз аман болсун!,- дейишти.

                Гүлжаһан Муратова  шуниңдин кейин  Талғир наһийәсигә атланди. Андин Алмута шәһири Қайрат мәһәллиридиму бу хилдики ярдимини көрсәтмәкчи.  Бу   қетим 400 аилини  озуқ-түлүк билән тәмин  етиш мәхсити әмәлгә ашти.   Шундақла у онкологиялик ағриққа муптила болған,  өйигә от кетиш ақиветидин өйсиз қалғанларғиму атиғини бар екән.

                Адәмләргә яхшилиқ қилишқа һәр қачан тәйяр   Гүлжаһан һажим  Муратованиң   вә униң пәрзәнтлириниң бу иш-паалийитигә утуқ-муваппәқийәт тиләймиз .

                                       Г.Лохманжанқизи.

 Турсунмәһәммәт

Мәшүров  чүшәргән  сүрәт . 

 

 

Күнтізбе

« Маусым 2019 »
Дс Сс Ср Бс Жм Сб Жк
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

booked.net