Тахминаниң уссул мәктиви

12.07.2019ж

Наһийәси мәркизи Яркәнт шәһиридә буниңдин икки жил бурун «Super Detki» мәркизи тәшкил қилинип, униңға мәктәп йешиғичә болған балиларни мәктәпкә тәйярлаш билән инглиз тилидин дәрис беридиған топларға балилар қобул қилинған еди.

Әнди аридин алтә ай өтүп, хореограф Тахминаниң тәшәббуси билән уссул синипи ечилип өз паалийитини башлиди. Шундақ екән бари -йоқи бир йерим жилдин кейин уссул шәйдалириниң дәсләпки ижадий кечилиги уюштурулди.
Наһийәлик Мәдәнийәт өйидә өткән кәчтә биз көпмилләтлик тәвә хәлқиниң һәр хил яштики вәкиллирини учраттуқ. Қоллириға гүлдәстиләр билән соғилирини қучағлап кәлгән ата-ана, бова момиларниң көңүллири шат, диққити сәһнидә. Шундақ бир пәйттә сәһнигә көтирилгән риясәтчи Ялқунжан Нурахунов көпчиликни мәркәзниң паалийитидин хәвәрдар қилип, новәтни уссулларға бәрди. Тәкитләш керәкки, «Супер детки» уссулчилири бу күни әндила үч яшқа толлған ғунчилар билән 13 яш арилиғидики балилар һәр милләтниң уссуллириниң бабиға йәткүзүп ижра қилди.Бир –биригә охшимайдиған, қайтиланмас уссул һәрикәтлири билән һәр кимни өзигә мәһлия қиливатқан балиларниң бу кәчкә чоң тәйярлиқ көргәнлигини байқавелиш тәс әмәс. Чүнки уйғур уссуллири билән башқиму милләтниң уссулири бир-биридин пәриқлиниши у тәбиий, лекин заманивий уссулларниму өзигә хас чевәрлик билән һәр кимниң диққитини жәлип қилип, зоқ һәвәсини қозғаватқан балилар һәқиқәтму уссул шәйдалири дейиш орунлуқ.
Бу күни сәһнидә мәзкүр мәркәздики яш алаһидилигигә қарап йәттә топ уссулчилири билән йәккә ижрада уссуллар ижра қилинди. Болупму кәч меһмини, нахшичи Молутжан Тохтахунов ижра қилған «Уйғур исми» нахшисиға Аминәм Зәйнамова, Ясмина Захитова ижрасидики «Бедилик», «Қочақ» уссулини елип чиққан Әзизә Имирова, «Красная шапочка» нахшисиға Мәликә Муһитдинова қатарлиқ уссулчиларниң йеши техи йәттә яшта болсиму жуқури йүксәк маһарәт билән ижра қилип, зор алқишларға егә болғанлиғини тәкитләш орунлуқ.
Шундақ қилип үч саат давамида биз келәчәк уссулчиларниң маһаритини көрүп, қайил болдуқ. Әнди уссул кечилигиниң меһманлири «Яркәнт булбуллири» ансамблиниң нахшичиси Илияс Сақиев, наһийәгә тонулған нахшичилар Айдана Ибрагимова, Алия Бортаева нахшилиридин чачқа чачти.
Биз бу һесават кәч ахирида уссул шәйдалириға сәнъәтниң қир-сирлирини үгитиватқан Тахмина Валиева билән сөһбәтләштуқ. Тахмина наһийәдики тонулған хореограф Гүлшат Қасимованиң шагирти болуп чиқти. Т.Валиева дәсләп Алмутидики эстрадилиқ цирк колледжни андин Қизлар педагогикилиқ университетиниң хореография бөлүмида тәһсил көрди. Әмгәк паалийитини «Қулансаз» уссул ансамблида башлап, исми жумһурийәткила әмәс, бәлки униң сиртиға мәлум «Гүлдер» уссул ансамблиниң тәркивидә дунияниң барчә әллиридә намайиш қиливетипту. Һазир бала тәрбийиләш билән бәнт болуватқан Тахмина ана жутида ғунчиларни уссул маһаритигә үгитишни қолға елип, униң шагиртлири вилайәтлик, жумһурийәтлик фестиваль-көрүкләрдә ғалип чиқиватқанлиғидин ейтип бәрди. Ениғарақ ейтсақ жумһурийәтлик «Дарабоз» конкурсида баш мукапатни, «Біз бақытты баламыз» байқишида шагиртлири биринчи, иккинчи мукапатлиқ орунларға қол йәткүзүп, Тахмина Валиева «Лучший наставник» номинацияси билән мукапатланди.
Ахирида Тахмина:
-Мәзкүр мәркәздә уссул синипининиң ечилиши билән балилирини йетиләп елип келиватқан ата-аниларға миннәтдарлиғим чәксиз.
Чүнки биз қандақла байқаш яки концертта һүнәрлиримиз көрситиш үчүн атланмайли йол һәққи, кийим-кечиги, ятақ вә башқиму мәсилиләрдә ата-анилар һамийлиқ қиливатиду. Балилириниң келәчигидин үмүтлинип, миллий сәнъитимизгә болған қизиқишини ашуруш үчүн барлиқ имканийәтләрни яритиватқан ата-анилар бар екән уларни оқутуш, үгитиш бизниң зиммимиздә һәм чоң жавапкәрчиликни жүкләватқанлиғиниму чоңқур һис қилимиз. Уларға тәжрибә һәм билимимни сәрип қилишқа мән тәйяр , -дәйду.
Г.Исмайилжанова.