Устазлар ордисидики мәйрәм

07.11.2019ж

Йәттисудики дәсләпки билим дәргаһи һазирқи Яркәнт гуманитарлиқ техникилиқ колледжиниң тәшкил қилинғининиң 90 жиллиғиға беғишланған иш -чариләр жил бешидин режилинип, давамлиқ уюштурулмақта

     Тәкитләш керәкки режиләнгән чариләр - колледжда әмгәк әткән устазлар билән учришиш, баш қошуш, дүгләк үстәлләр, ижадий байқашлар шулар жүмлисидин. Әнди колледжниң 90 жиллиқ тәвәллудлуқ тәнтәниси йеқинда икки күн давамида дағ-дуғилиқ атап өтүлди. Мәрасимға жирақ йеқиндин меһманлар, сабиқ шагиртлар тәклип қилинди.
    Мәрасимниң биринчи күни колледж бенасида жумһурийәтлик «Келешек білімге бара жолдағы ізденіс, тәжрірибе, және перспектива» мавзусида жумһурийәтлик илмий -әмәлий әнжуман уюштурулди.

      Иккинчи күни әтигәнлик саат 8 дин башлап, колледж һойлисида студентлар билән устазлар жирақ-йеқиндин қәдәм тәшрип қилған меһманларни сәп түзәп алқишлар вә гүлдәстиләр, нахша-сазлар билән күтивалди. Меһманлар жәм болғандин кейин колледж һойисида өзиниң аңлиқ һаятиниң 50 жилини студентларға тәлим-тәрбийә бериш үчүн сәрип қилған пешқәдәм устаз, Панфилов наһийәсиниң Пәхрий граждани, һели мәрһум Әбилмәжин Кенжебековниң һөрмитигә мемориаллиқ тахтиниң ечилиши болуп өтти.
     Мәрасимда колледжниң сабиқ мудири Борис Шин, сабиқ шагирт Қазақстан Хәлиқ артисти Нуржума Ықтымбаев, Кенжебековниң Атыравдин кәлгән қудиси Болат Сахабудин вә башқилар сөзгә чиқип, колледж тарихидин ейтип , мәрһум Ә.Кенжебеков билән бирсәптә ишлигән жиллирини, әстин чиқмас хатирилири билән ортақлашти.
    Шуниңдин кейин жиғилған көпчилик колледж фойесида униң тарихини әкс әттүргән көргәзмиләрни, аудиторияләрни арилап көрди.
Андин мәрасим наһийәлик Мәдәнийәт өйидә давамлашти.
    Мәдәнийәт өйидә колледжниң 90 жиллиқ тарихиға беғишланған фильм көрситилгәндин кейин колледж мудири Баян Саурамбаева тарихи Сопи Зәрват намидики муәллимләр курсидин башланған педагогикилиқ училище вә һазирқи Яркәнт алий гуманитарлиқ техникилиқ колледжи өтмүши вә бүгүнкиси һәққидә доклад билән сөзгә чиқти.
    Шуниңдин кейин тәбрик сөзгә чиққан наһийә һакими Талғат Өмирәлиев, наһийә жут жамаәтчилиги намидин тәбригини йоллап, колледж учумкарлири - устазларниң наһийәдә маарип саһасини риважландуруш үчүн қошуватқан төһписини атап көрсәтти. Талғат Әбен оғли 80 яшлиқ анисиниң мәзкүр билим дәргаһидин учум болған устазларниң бири екәнлигини тәкитләп , анисиниң иллиқ салимини,ақ тилигини йоллиди.
    Бу күни Маарип пән бюджетлик мәһкимиләр хадимлириниң саһалиқ кәспий иттипақи рәиси Тоққожа Естенов, Қазақстан Жумһурийити Билим вә пән министрлиги мәктәпкичә вә оттура билим бериш департаменти мудириниң орунбасари Сауле Қабимолдаева вә башқилар сөзгә чиқип, илгәрки педагогикилиқ училищениң Қазақстандики үч илғар колледжларниң қатаридин тилға елиниватқанлиғини тәкитләп, устазларниң шәрәплик ишлириға шәрәпләр тилиди. Бир топ муәллимләргә Алтынсарин намидики медаль, «Білім, ғылым мекемелері мен бюджетік ұйымдар қызметкерлерінің салалық кәсіптік одағы медали, Алмута вилайитиниң, Панфилов наһийәси һакимлириниң һөрмәт грамотилири, тәшәккүрнамилири билән мукапатланди.
Тәнтәнидә шундақла педагогикилиқ училище, колледжни узун жиллар башқурған Майра Турғанова, Күләш Сулейменова, Сара Темирбаева вә сабиқ шагиртлар сөз елип, тәбригини йоллиди.
    Колледжниң 90 жиллиқ тәнтәнисидә мәзкүр колледжниң қазақ миллий саз оркестри миллий күйләрни ижра қилса, хореограф-устаз Гүлшат Қасимова рәһбәрлигидики «Айжанқыз» үлгилик хәлиқ уссул ансамбли қазақ, уйғур, өзбәк миллий уссуллирини орунлап көпмилләтлик тәвә турғунлириниң достлуғини намайиш қилди. Әнди музыка пәни оқутқучиси Гүлмира Тохтахунованиң дирижерлуғида колледж студентлири хори Абайниң нахшилирини ижра қилди.
Тәнтәниниң ахирида жирақ йеқиндин кәлгән алимлар, пән намзатлири, пешқәдәм устаз, сабиқ шагиртлар Яркәнт шәһиридики «Атлантик» ресторанида мәйрәмлик дәстихан әтрапида баш қошуп әстин чиқмас дәқиқилири билән ортақлашти.

Гөһәрбүви Исмайилжанова.

Күнтізбе

« Қараша 2019 »
Дс Сс Ср Бс Жм Сб Жк
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

booked.net

  • Материалды қарау саны : 680247