Тижарәтчиләр билән тәдбирчанларниң меһриванлиғи

07.11.2019ж

Алмута вилайәтлик «Атамекен» тижарәтчиләр Палатиси Панфилов наһийәлик шөбисиниң әзаси, наһийәлик тәдбирчан ханим-қизлар кеңишининиң рәиси Сүрийәм Һезимованиң тәшәббуси, наһийә һакими Талғат Өмирәлиевниң қоллап қувәтлиши билән ишбиләрмән ханим-қизлардин, тижарәтчиләрдин тәркип тапқан «Мейірім» карвини наһийәни арилап, йеза-авуллардики тапавити төвән, көпбалилиқ, баққучисидин айрилған, нака жанларға хәйрихаһлиқ ярдимини көрсәтти.

     «Мейірім карвини» акциясиниң биринчи күни Басқунчи йеза йеза округидин башланди. Йеза һакимчилиғиға йетип кәлгән акция әзалирини округ һакими Хамза Насырбеков күтивалди. Наһийәлик ишбиләрмән аяллар кеңишиниң рәиси Сүрийәм Турғанқизи акцияниң мәхситигә тохталди. Наһийәдә оттура вә кичик тижарәт билән шуғуллиниватқан тижарәтчиләр, дехан егиликлириниң рәислири шундақла әрләр билән бир сәптә һеч қелишмай һәр хил саһаларда ишләп жүрүп ,өз тижаритини тәрәққий әткүзиватқан наһийәниң ижтимаий, ихтисадий саһалириға тегишлик һәссилирини қошуватқан ишбиләрмән ханим-қизларниму атап көрсәтти. Басқунчи йеза округида ярдәмгә муһтаж бәш аилигә һәр қайсисида 30 килограмдин ибарәт озуқ - түлүк мәһсулатлири: ун, май, чай, гүрүч йемәк- ичмәкләр қачиланған халисанә ярдимини ианә қилди. Ишбиләрмәнләрни бу күни шундақла Пәнжим йеза округиниң һакими Ерлан Оспанбаев, Бирлик йеза округиниң һакими Рахманқул Әуелбеков, Чоң Чиған йеза округида Мақсат Оспабеков, Чулуқайда йеза округиниң һакими Тайиржан Әсмитуллаев мутәхәссислири билән қарши алди. Улар йеза -авулларда елип бериливатқан ишлар, һамийлар тәрипидин көрситиливатқан ярдәмләр һәққидә тохталди. Андин акция қатнашчилири ярдәмгә муһтаж жанларға атиған соғилирини тапшурди.
     Акция давамида Сүрийәм Һезимова башлиған топ Яшкәнт, Чулуқай, Көктал, Айдарли, Қоңурөлән, Әвлияғаш, Учарал йеза округлири билән Яркәнт шәһәрлик һакимийәттә болуп, жәми 69 адәмгә халисанә ярдимини көрсәтти.
     Акцияниң тәшәббускари Сүрийәм Турған қизидин биз наһийәлик тижарәтчиләр вә ишбиләрмән ханимлар паалийитидин сориғинимизда:
-Қазақстанда кичик вә оттура тижарәтни тәрәққий әттүрүшкә алаһидә көңүл бөлүниватиду. Елимизниң Тунжа Президенти-Елбасы - Нурсултан Назарбаев вә Президент Қасым-Жомарт Тоқаев бу мәсилини диққәт мәркизидин чүшәрмәй, тижарәтниң кәң қанат йейип, риважлиниши үчүн қолайлиқ шараитларниң яритилишиға чоң әһмийәт берип кәлмәктә. Шу жүмлидин Елбасы- Нурсултан Назарбаев «Келәчәккә нишан: мәнивий йеңилиниш» мақалисида, мәктүплиридә бу һәқтә тәкитләп кәлмәктә. Мошу йәрдә кичик тижарәтниң әвлаттин-әвлатқа берилидиған аиләвий әнъәнигә айлиниши керәклигиниму ениқ атап көрсәтти. Наһийәлик ишбиләрмән ханимлар әйнә шундақ аиләвий тижарәтни тәрәққий әттүрүш билән жутдашлири мәнпийити йолида әстаидил әмгәк қиливатиду. Әнди аһалиниң ихтисадий жәһәттин ажиз, маддий ярдәмгә муһтаж қатламлириға яр йөләк болуштәк хәйирлик иштин чәттә қалмайватқан наһийәдә тижарәтчи мәрт-мәрданә оғланлар вә ханимлар бирликтә мошу акцияни уюштурдуқ. Наһийә һакими Талғат Өмирәлиевниң қоллап қувәтлиши билән мәхсус машина бөлүнүп, жәми 69 аилә йәни һажәтмәнләр қоллап-қувәтләнди. Бу ишта «Ернар» дехан егилигиниң рәһбири Тасқин Жапарқул, «Һаширов» шәхсий ширкитиниң рәһбири Әхмәтжан Һаширов, «Яркәнт крахмал-ширнә заводи» мәмурийити билән наһийәдики ишбиләрмән аяллар әзалири йеқиндин ярдәм қолини сунди. Тәдбирчан ханимларға келидиған болсақ буниңдин йәттә жил илгири тәшкил қилинған кеңәш әзалириниң сани жилдин-жилға өсмәктә. Биз жуқурида тәкитлигәндәк аиләвий тижарәттә Маһинур Аюпова, Балшекер Жапишова, Роза Хайбуллина, Улбосын Аманбаева, Ләззәт Чойғараева вә башқиму тижарәтчи ханимлар өз аилисидин башқа 20-30 адәмни ишбилән тәминләватиду.
     Жилдин-жилға қатаримиз өсүп, тапқинимизниң бир қисмини мошундақ изгү ишларға хәшләватимиз. Биздики йәнә бир мәхсәт йезилиқ йәрдә тижарәт билән шуғуллинимән дегүчи ханимларға йол-йоруқ көрситиш, мәслиһәт бериш, қоллап- қувәтләш . Чүнки наһийәдә ишләп чиқиришниң һәл қилғучи амили болған деханчилиқ билән чарвичилиқ билән шуғуллинимән дегүчиләр йеза турғунлири. Ихтисадий боһран вақтида уларға яр йөләк болуш билән биллә тижарәткә дәвәт қилсақ дегән нийәттә йезиларни арилап чиқтуқ.
Г.Лохманжанқизи.

Күнтізбе

« Қараша 2019 »
Дс Сс Ср Бс Жм Сб Жк
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

booked.net

  • Материалды қарау саны : 680286