Гүлжаһан ана бу қетим Пәнжимдә йәнә бир аилиниң көңлини алди

15.11.2019ж

Жумһурийәтлик Уйғур этномәдәнийәт мәркизи йенидики «Анилар кеңишиниң рәиси Гүлжаһан Муратовани яркәнтликләрму яхши тонуйду. Чүнки Яркәнт униң иккинчи ана жути.

Наһийәдә узун жиллар билим бөлүмидә бухгалтер болуп ишләп һөрмәтлик дәм елишқа чиққандин бу ян Алмутида кәнжә пәрзәндиниң қолида туриватқини билән униң пәрзәнтлириниң чоңи Яркәнттә яшайду. Ана бу жутта өтүватқан чоң- кичик мәрасим, жутдарчилиқ , жәмийәтлик ишларға паал қатнишиду. Униңдин ташқири Гүлжаһан Муратова Яркәнткә икки үч қетим «рәсмий» келип кетиду. Ундақ дейишимиз у һәр қетим тапқининиң мәлум қисмини һажәтмәнләргә ианә қилиш үчүни келиду. Роза Рамзан, Қурван һейт- айәмләр билән жумһурийәтлик « Мәктәпкә йол» акциясидә тәвәдики мәктәпләрни арилап чиқиду. Бу жилиму худди шундақ болди. Тапавити төвән, баққучисидин айрилған, көпбалилиқ аилиләрниң балилириға мәктәп формиси билән оқуш қураллирини елип бериш үчүн һәр жили қол учини созиду . Биз мошу жилниң август ейида сахавәтлик анимизниң наһийәдики көпбалилиқ, баққучисидин айрилған, тапавити төвән аилиләрниң балилири үчүн 1 милион 555миң тәңгә сәрип қилғанлиғиниң гувачиси болған едуқ. Әнди мошу жили 3 июнь күни саат 20:30лар чамиси билән Пәнжимдә пәвқуладдә әһвал йүз берип, 2-3- июнь күнлири тохтимай яққан ямғурниң ақиветидин йезини су бесип кәтти. Ақивәттә йезиниң Чоқан Вәлиханов таш йоли бойини бойлап аққан су йезиниң төвәнки қисми йәни Турпан йүзи мәһәллисидики Лутпулла, Мусаев, Желотоқсан, Сейфуллин, Өмәр Муһәммәдий кочилиридики 31 өй, 180 һойла -арам су астида қалған еди. Йезини су бесип кәткәнлигидин хәвәр тапқан ана теч олтиралмиди. Пәнжим жутиға һазир өзи истиқамәт қиливатқан «Қайрат» мәһәллисиниң турғунлириниң бешини қошуп, халисанә ярдимини әвитипму йәнә көңли имин тапмиди. Ундақ болғини ижтимаий торларда бу әһвал һәққидә һәр хил тәхминләр тарап кәткән еди. Шуниң үчүнму Гүлжаһан анимиз дәрру алақиға чиқип, жут оғлани, Пәнжим йезисиниң баш жигит беши Адилжан Ғожәмбәрдиевтин болған вақиәниң тәпсилатини , шу чағдики әйни әһвалдин хәвәр алди. Шундақ қилип, йезидики йәнә бир тәдбирчан Эльмира Зәйнамова арқилиқ мәзкүр аилә әзалириниң мошуниң билән өйи вә қора жайиниң икки қетим су астида қалғанлиғини уқуп билди.
     Мана мошуниңдин кейин сахавәтлик ана Мәңсүр Бешировниң аилисигә өй селип бериш мәхситини ейтип, вәдиси бәрдидә ишқа киришти . Шундақ қилип август ейида қурулуш ишлирини башлап кәтти. Бешировлар өйиниң қурулуш ишлири йеқинда аяқлишип, төрт бөлмилик йеңи өйгә көчүп кирди. Шуниму қошумчә қилиш керәкки, Гүлжаһан һажим Муратова һажәтлик мәбләғни жигитбеши Қурванжан Яқуповниң һесап чотиға әвәтип, пәнжимликләр аниниң тәшәббусини қоллап-қувәтләп , бир кишидәк жутдишиға яр йөләк болди. Бу ишниң бешида йәнә шу Адилжан Ғожәмбәрдиев башлиқ жигитбашлири Ясинжан Тохтахунов, Қурванжан Һәмраев, Абдухелил Надиров, Мәсимжан Тохтахунов, Һакимжан Давутов, Расул Еләмов, Арупжан Қарамов охшаш жигит башлириниң уюштуруши билән жутдашлар һашар ясап, қурулуш ишлириға жутдашларни биркишидәк сәпәрвәр қилди.
    Йеқинда пәнжимликләр көптин күткән хошаллиқниң гувачиси болди. Бешировлар аилиси йеңи өйгә көчүп кириши мунасивити билән Пәнжим йеза округиниң һакими Ерлан Оспанбаев башлиған жут-жамаәтчилик вәкиллири Мәңсүр Бешировниң аилә әзалирини хошаллиғи билән тәбрикләш үчүн қутлуқ өйигә қәдәм тәшрип қилди.
     Дәсләп Молутжан Тохтахунов елимизниң Тунжа Президенти – Елбасы Нурсултан Назарбаевниң « Келәчәккә нишан : мәнивий йеңилиниш» мақалисидики «Туған жер» лайиһиси даирисидә өзиниң мәрт-мәрданилиғини әмәлдә көрситип келиватқан Гүлжаһан Һажим Муратовани көпчиликкә тонуштурғандин кейин Пәнжим йеза округиниң һакими Ерлан Оспанбаев язда болған су бесиш ақиветидики пәвқуладдә әһвал һәққидә ейтип бәрди
- Хәлқимиздә «От билән су тил сиз йеға» дейилиду. Әйнә шу тилсиз йеға йүз бәргән күни биз жутдашларниң өмлигини , инақлиғиниң йәнә бир қетим байқидуқ . Шу чағдики наһийә һакими Темирлан Бетасов билән Болат Өтемуратов башчилиғидики Қизил ай, вә наһийәдики 13 йеза округлири һакимлири билән мәһкимә ,кархана, иш орунлири рәһбәрлири һәм көрүп турупсиләр Гүлжаһан анимиз охшаш анилар һеч ким чәттә қалмиди. 180 һойла арам лай-латқидин тазилинип, қора –жайлар селинди. Әнди үч аилиниң биригә «Алтынкөл төмүр йол станицияси» йәнә бир аилигә « Қурғақ порт» ярдәмләшкән болса, бу аилигә сахавәтлик анимиз қол учини созди. Анимиз аман болсун. Мән бу пәвқуладдә әһвалда жутдашларниң һал әһвалидин хәвәр тапқан көпчиликкә миннәтдарлиғимни билдүримән.
    Бу күни наһийәлик Уйғур этномәдәнийәт мәркизиниң рәиси Ризайдин Әйсаев, жутдашлар намидин Әхмәтжан Надиров, жигитбашлири Қурванжан Яқупов, Қурванжан Һәмраев вә башқилар сөз елип Гүлжаһан Муратованиң 20 жилдин ошуқ вақит шуғуллиниватқан хәйри-еһсанлиқ паалийитини тәкитләп, житимларни бағриға бесип, оқуғучиларға мәдәткар болуватқанлиғиға апирин ейтишти.
Новәттә сөз алған Гүлжаһан Һажим Муратова :
    -Пәнжимдики әһвални мениму тәврәндүрмәй қоймиди. Бу жут маңа ят әмәс.Улуқ Вәтән уруши жиллири мениң акам мошу жуттики мәктәптә мудирлиқ қилған екән. Әнди бу аилигә ярлдәм қолумизни созуш үчүн тәшәббусни көтириведим маңа Asar-Ume.kz һәрикити әзалири йеқиндин ярдәм көрситиш нийитини билдүрди. Уларниң арисида аддий хәлиқтин башлап, зияли, шоумен, блогерларму бар. Биздики мәхсәт - ярдәмгә муһтажларға яр йөләк болуш, маддий жәһәттин қоллап-қувәтләш. Мениң тәшәббусимни қоллап -қувәтлигән пәнжимлик қериндашларға , қурулушчи жигитләргә анилиқ ақ тилигимни изһар қилимән. Мошу өйдә Мәңсүр инимиз билән Роза сиңлимиз нәвриләрниң шатлиғиға сөйүнүп бәрикәтлик һаят кәчүрсикән дәп тиләймән, -деди.
Шуниңдин кейин өйниң рәмзлик лентиси қийилип, меһманлар йеңи үлгидики өйниң бөлмилирини арилап чиқти.
       Шуниңдин кейин көпчилик Бешировлар аилиси намидин «Караван сарай» кафесида әрваларға дуа тәгбир қилинип , бу йәрдиму Гүлжаһан Һажим Муратованиң меһир сахавәтлик ишлириға миннәтдарлиғини изһар қилғучилар көп болди.
     Бешировлар аилиси әзалири сахавәтлик аниға , жутдашлириға чин көңлидин рәхмәтләр ейтип, хошаллиқ яшлириниму йошурмиди.
-Анимизға бүгүн қандақ рәхмәт ейтишимизға сөз тапалмайватимиз. Чүнки бизниң бешимизға чүшкән әһвалдин хәвәр тепип , дәрру үч ай ичидә бизгә йеңи өй селип бериш үчүн қанчелик мәбләғ кәткәнлигини биз билмәймиз. Чүнки анимизни қоллап бизгә Адилжан Ғожәмбәрдиев, Йолдаш Беширов, Розахун Беширов, Тейипжан Ибдиев, Турсун Мәмиров вә Әхмәт һажим Қурбанов, Турғанжан Авутов, Бәхтияр Мәһәммәтов охшаш акилиримиз мәдәткар болди. Техникиси билән жирақни йеқин қилған Молутжан Розиев, Сабиржан Қурбанов, Молутжан Һәмраев қатарлиқ мәрт-мәрданә жутдашларға миннәтдарлиғимиз чәксиз, -деди.
    Бу күни Бешировлар аилисини тәбрикләп кәлгүчиләр Гүлжаһан Муратова вә пәнжимликләрниң хәйрилик ишидин бәһирлинип, иллиқ тиләклирини изһар қилишти.
Г.Лохманжанқизи.

Турсунмәһәммәт
Мәшүров чүшәргән сүрәтләр.

Күнтізбе

« Желтоқсан 2019 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

booked.net

  • Материалды қарау саны : 731073