Саламәтлик сақчиси Һелиму сәптә

15.11.2019ж

Наһийәдики «Диана» медицинилиқ колледжиниң тәшкил қилинғиниға бийил 20 жил толди . Бу жиллар ичидә колледжда миңлиған оттура боғумлуқ һәмшириләр тәйярланди.

Улар наһийәдила әмәс, бәлки Алмута вилайити һәм Талдиқорған, Алмута вә Нур-Султан шәһәрлиридә кәспи бойичә алған нәзәрийәвий билимини әмәлгә ашуруп, саламәтлик сақлаш саһасида үнүмлүк хизмәт қилип, бемарлар көңлидин чиқиватқан болса ,йәнә бир түркүм учумкарлар алған билимини давамлаштуруш мәхситидә алий медицинилиқ оқуш орунлирида тәһсил көрүп, қош дипломуқ мутәхәссисләрдин аталди. Уларниң колледжда оттура вә кәспий билим елиши үчүн наһийә рәһбәрлири билән наһийәлик дохтурхана һәм колледж мәмурийити наһийәдә узун жиллар давамида мошу саһада тәр төкүватқан алий билимлик, алий дәрижилик , тәжрибилик дохтурлар билән мәслиһәтлишип, бирликтә иш елип бериш йолға қоюлди. Келәчәк һәмшириләр үчүн устазлар қатариға әйнә шу тәжрибилик дохтурлар тәклип қилинди. Мана шуларниң қатарида колледждики дәсләпки оқуш жилиниң дәсләпки билим күнидин башлап саламәтлик сақчиси Камиләм Өмәр қизи Важитова устазлиқ қилди.
      Камиләм Өмәр қизи « Диана» медицинилиқ колледжда балилар ағриқлири вә уларниң профилактикиси һәм давалаш усуллири бойичә мәшғулатларни елип барди. Шундақла фармакология вә жуқумлуқ ағриқлар пәни бойичиму дәрис бәрди. Шундақ екән һаятиниң 16 жилини кәлгүси һәмшириләргә беғишлиған тәжрибилик дохтур йешиниң бир йәргә берип қалғанлиғини ейтип, дәм елишқа чиққиниға 2 жилчә вақит болсиму, у бош вақит тапсила сөйүмлүк коллективи вә студентлири арисида болушқа алдирайду. Колледждики чариләрму Камиләм Имрәмзиевасиз башланмайду.
     Йеқинда колледж мәмурийити вә устазлар коллективиниң тәшәббуси билән Камиләм Өмәрқизиниң 80 яшлиқ тәвәллуди дәсләпкиләрдин болуп колледжда уюштурулди.
     Бу күни дәсләп «Диана» медицинилиқ колледжиниң мудири Қарлиғаш Даурова сөз елип, саламәтлик сақчисиниң һаяти, иш паалийити һәққидә тәпсилий ейтип өтти . Униң кәлгүси һәмшириләрни тәйярлаштики ижадий паалийитигә , тәжрибисигә алаһидә тохталди. Чүнки оттура боғум һәмшириләр педиатрия вә жуқумлуқ ағриқлар , уларни давалаш йоллири тоғрисида алған нәзәрийәвий билимини әмәлдә көрситип келиватқанлиғи тәкитләш орунлуқ . Шуниңдин кейин сөзгә чиққан дохтур - устазлар Раиса Хайбуллина, Раш Букенбаева, Полина Емец вә Реһангүл Музәппәрқизи униң узун жиллиқ дохтурлуқ хизмити билән биллә елип барған устазлиқ паали йитини жуқури баһалап, тәләпчан дохтур -устазниң педагогикилиқ паалийити һәққидә ейтип өтти. Улар болупму устазниң қизлар тәрбийәси, кәлгүси һәмширигә қоюлидиған тәләпләр билән һәтта кийим кийиш үлгилиригә наһайити диққәт бөлүп, өзиниң үлгә -ибрәт болғанлиғини тилға алди. Учришишта сөз алған Камиләм Имрәмзиева Президент Қасым-Жомарт Тоқаевниң қазақстанлиқларға йоллиған « Конструктив диалог- Қазақстанниң турақлиғи вә гүллинишиниң асаси» намлиқ Мәктүбидики бу саһаға аит көрсәтмилирини вә һазир әң муһим медицинилиқ хизмәт көрситишниң сүпити вә қолйетимлиғини тәминләштики көрсәтмилиригә тохталди. Болупму ана вә бала саламәтлиги һәққидә өзи ишлигән жиллири билән бүгүнки наһийәдики әһвалға мунасивәтлик ейтип бәрди.
     Камиләм Важитованиң һаяти вә әмгәк паалийити һәққидә шуни тәкитләш керәкки, у әсли Уйғур наһийәсидә хизмәтчи аилисидә дуниға кәлди. Аилә шараити түпәйли Яркәнткә келип шәһәрдики А. Луначарский намидики мәктәпни тамамлиған 1957- жили Алмута медицинилиқ институт ( Һазирқи Асфендияров намидики медицинилиқ университетқа) оқушқа чүшиду. Йәттә жил яшлиққа хас интилиш һәм издиниши билән мәзкүр билим дәргаһини әла баһаларға тамамлап, 1964- жили врач-педиатр мутәхәссислигини егиләп чиқиду. Яш дохтур йолланма билән әмгәк паалийитини Уйғур наһийәсидә башлап, кейин Қарағанда шәһиридә ишләйду. 1970- жили Яркәнткә келип , мәркизий ағриқханиниң балилар бөлүмидә жутдашлириға тәләпкә мувапиқ медицинилиқ хизмәт көрситиш йолида издинип ишләйду. Алий оқуш орнидики нәзәрийәвий билимини әмәлият билән уйғунлаштурған һалда тинмай ижадий издинип иш елип бариду. Шундақ тиришчан һәм өзигә вә өзгиләргә тәләпчан дохтур балилар вә жуқумлуқ ағриқлар бөлүмлириниң башлиғи , көп өтмәйла наһийәлик баш дохтурниң ана вә балиларниң саламәтлигини һимайә қилиш бойичә орунбасари қатарлиқ вәзипиләрни қатар елип барди. Аз вақитниң ичидә у иш бабида әстаидил вә мәхсәтчанлиқ билән елип барған әмгәкниң нәтижисидә мошундақ илгириләшләргә қол йәткүзди.
     Әнди наһийәдә балилар саламәтлигини сақлаш йолида елип барған ишлириниң бири- у ана вә бала саламәтлигини сақлаш йолида дора-дәрмәкләрни йәткүзүш, нариседиләрниң өлүмигә йол қоймаслиқ үчүн балилар дохтурлириниң жавапкәрлигини күчәйтиш охшаш мәсилиләрни баш дохтур вә вилайәт саһа хадимлири билән мәслиһәтлишип иш елип барди. Әнди турғунлар сани бойичә әң чоң наһийәдә бу мәсилини өзи назарәт қилип,тәләпни күчәйтти.
      Таллавалған кәспигә әстаидил берилип, Гиппоркат қәсәм ядиға садиқәтлик билән хизмәт қилиши арқилиқ жутқа тонулди. Талай жанларниң жениға ара болуп, бемарларниң ишәнчә-етиқатиға , хәлиқниң сәмимий һөрмитигә бөләнди. Алий дәрижилик врач 1995- жили һөрмәтлик дәм елишқа чиққини билән у медицина саһасидин қол үзүп кәтмиди. Ағриқхана рәһбәрлириниң илтимасиға бенаән бирнәччә жил сөйүмлүк кәспи бойичә әмгәк қилди. Әнди Яркәнт шәһиридә оттура боғум медицина хадимлирини тәйярлаш орни ечилғанда оқутқучилиққа тәклип қилинғанлиғи униң көпжиллиқ әмгиги вә наһийә рәһбәрлири билән колледж мәмурийитиниң униңға ишәнчә артқанлиғида болса керәк .

     Шәхсән өзәм Камиләм Өмәрқизини дайим наһийәдә атап өтүливатқан чариләрдә көримән. Дайим хушхой қияпәттә жүридиғанлиғи билән пәриқлиниду.Өзиниң сиртқи гөзәллигигә маслашқан әжайип силиқ –сипайә мүжәзи билән бир көргән кишиниң зоқ һәвәсини қозғайду.
     Әндиликтә у наһийәдики мәктәпләрниң һөрмәтлик меһмини. Мәктәп мудирлири билән муәллимләрниң тәклип -илтимасиға бола балилар саламәтлиги, болупму қиз балар тәрбийәси мавзулирида лекцияләр оқуп беришкә келиду. Бу вақитта мәктәп оқуғучилири һәрхил соаллар билән муражиәт қилиду. Һә, узун жил балилар ағриқлири һәққидә ижадий издәнгән, давалаш йоллирини әмәлдә синиған устазниң жававиму тәйяр. Бәзидә қиз балилар анисиға , устазиға ейталмиған гәплирини дохтур билән бөлүшиду. Мана мошу мавзуда йеқинда Хелил Һәмраев намидики уйғур мәктивидә мәктәп психологи - психология пәнлириниң намзити Асийәм Сайитованиң уюштурушида өткән баш қошуш сөзимимизниң мисали болса керәк.
       Камиләм Имрәмзиева жәмийәтлик ишлардин қол үзгини йоқ. Наһийәлик Анилар кеңишиниң актив әзаси. Кейинки жилларда наһийәдики медицина саһаси ветеранлири кеңишини башқуруп келиватиду. Шәһәр һакимчилиғи, наһийәлик Уйғур этномәдәнийәт мәркизи тәрипидин уюштуруливатқан чарә-тәдбирләргә қатнишипла қалмастин, Ханим-қизлар кеңишиниң паалийитини кәң қанат яйдудурушқа тегишлик үлүшини қошуп кәлмәктә. Гезитимизниң һәқиқий жанкөйәри сүпитидә өзи истиқамәт қиливатқан мәһәллә турғунлириға чүшәндүрүш ишлиридин ялиқмайду.
     Камиләм һәдә аилидиму бәхитлик. У өмүрлүк жүпти Жамал Еләмов билән алтә балини тәрбийиләп қатарға қошқан қош устазлар қатаридин. Чүнки Жамал ака Еләмовлар муәллимләр сулалисидин йетилип чиққан география пәни муәллим. У узун жиллар Пәнжим кәчки мәктивидә Чулуқай йезисидики , шәһәрдики Жамбул намидики мәтәпләрдә мудирлиқму қилди. Геораф муәллим сүпитидә нурғунлиған қара көзлиримизни тәрбийиләп, һаяттин өз орнини тепишиға сәвәпкар болди. Һазир шагиртлири наһийә вә жумһурийимизниң жай-жайлирида униң изини бесип устазлиқ қиливатиду. УҚошт меһриванлар алтә пәрзәндидин 19 нәврә, 3 чәврә қучти.
      Камиләм Важитованиң қериндашлири һәққидә гәп қилиш керәкки, иниси Марат Имрәмзиев узун жиллар рәһбирий хизмәтләрдә болуп, наһийәниң ижтимаий ихтисадий тәрәққиятиға тегишлик һәссисини қошқан мутәхәссисләр қатаридин тилға елиниду.
Камиләм Важитованиң медицина саһасидики узун жиллиқ әмгиги мунасип баһалинип, Қазақстан Жумһурийити Саламәтлик Сақлаш Министрлигиниң             «Саламәтликни сақлаш ишиға қошқан үлүши үчүн» медали билән мукапатланған болса, өткән жили Панфилов наһийәсиниң Пәхрий граждани аталди.
Жутдашларниң һөрмитигә бөләнгән Камиләм Өмәрқизини шанлиқ тәвәллуди билән сәмимий тәбрикләп, тениға саламәтлик , һаятиға хатиржәмлик тиләймиз.
Гөһәрбүви Исмайилжанова.

Күнтізбе

« Желтоқсан 2019 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

booked.net

  • Материалды қарау саны : 731080