Камиланиң арманлири көп

22.11.2019ж

Силәр көрүп турған сүрәттә Яркәнт шәһириниң турғуни Камила Искәндәрова мәшиқләндүргүчиси Ильшат Һосманов билән. Камила спортниң Джиу Джитсу түри билән шуғуллиниватқанлиғиға бари-йоқи үч жил болди.

Үч жил Камилаға чоң утуқлар елип келидиғанлиғиға башта иккиләнгән болсиму, һазир униңға ишиниду. Чүнки утуқ өзлүгидин кәлмәйдиғанлиғини яхши чүшәнгән қиз спортниң бу түригә башта һәвәс бағлиғини билән кейинәрәк спорт залиға бармиса көңли имин тапмайдиған болди. Камила бош вақтини башқа ишларға әмәс, спортқа беғишлап, вақтиниң мәлум қисмини спорт залида өткүзүшкә адәтләнди. Чүнки Ильшат Һосманов шагиртлириға қоюватқан тәләплиригә бәрдашлиқ берип, чидам һәм тиришчанлиқ көрситиватқан шагиртиниң башқиларға үлгә көрситишкә лайиқ екәнлигини мәшиқләндүргүчиси сүпитидә бир нәччә қетим ейтип , йәниму тинмай мәшиқлинишкә дәвәт қилған еди. Ақивәттә Камила устазини йәргә қаратмиди .
Мәлумки, Ильшат Һосманов Яркәнткә спортниң бу түрини елип кәлгән Арманжан Розахунов билән дәсләпки күндин башлапла яшларниң бешини қошуп мәшиқләндүриватқанларниң бири. Дәсләп шәһәрдики һәр хил залларни ижаригә елип мәшиқләндүриватқан Ильшат Һосманов һазир өзини шәхсий йеңи спорт залиға егә болди. Бүгүнки таңда бу залда 200 дин ошуқ қиз- оғул спортниң бу түри билән турақлиқ мәшиқлиниватиду. Камила болса өзи охшаш 11 қизниң қатарида һәр хил чемпионатларға қатнишип келиватиду.
Шуни тәкитләш керәкки, ата-аниси Нурмәһәммәт Саһинурниң үч пәрзәндиниң кәнжиси йәнә келип өйниң әркә қизи әнди әркилимәйдиған болди. Мәшиқләндүргүчисини йәргә қаратмай, дайим, тинмай мәшиқлиниватқан Камила қизниң һәр хил турнирларға берип келишигә һамийлиқ қиливатқан ата-анисиму қизидин чоң үмүт күтүп, қоллап-қувәтләватиду.
Ейтайлуқ, Камила дәсләпки жили йәни 2016- жили Arlan grip selection да биринчиликни йеңивалған болса,кейин үч жил уда биринчиликни қолдин бәрмәй, алтун медальға қол йәткүзди. Әнди өткән жили Астана вә Талдиқорған шәһәрлиридә Қазақстан чемпионатида йәнә биринчиликни йеңивалди. Үч жилниң ичидә 30 дин ошуқ һәр хил чемпионатларда биринчи, иккинчиликләрни қолға кәлтүриватқан Камила Искәндәрова техи йеқинда йәни сентябрь ейида икки чемпионаттин қуруқ қол қайтмиди. Иккинчи орунни йәни күмүч медаль йеңивалған Камилла әнди Бирләшкән Әрәп Әмирлигидә Абу Дабида өтидиған дуния чемпионатиға атланмақчи.
Алмутидики малийә -ихтисат колледжниң үчинчи курсида оқуватқан Камиланиң : - «Яшлар жилида» дуния чемпионатида биринчиликни йеңивелип чемпион болсам, Қазақстандики спортниң тәрәққиятиға бир кишилик төһпәм болар еди. Чүнки спортниң Джиу Джитсу түри аммибап болуши билән, һазир дунияниң 100дин ошуқ елидә риважлиниватиду.Спортниң Джиу Джитсу түри бойичә мениң жутдашлиримниң йәни мениң достлиримниң арисида Қазақстан ,Азия һәм дуния чемпионатлириға қатнишип, ғалип чиқиватқанлар аз әмәс,- дегән арманлирини йошурмиди. Спорт ишқивазиға бизму арманлар орунлансун дегән тилигигимизни изһар қилдуқ. Камилаға ақ йол тиләймиз!
Гөһәрбүви Исмайилжанова.

Күнтізбе

« Желтоқсан 2019 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

booked.net

  • Материалды қарау саны : 731054