Саламәтлик сақчисиға һөрмәт көрситилди

28.11.2019ж

Наһийәлик дохтурханиниң баш дохтури, Алмута вилайәтлик мәслиһәтниң депутати Төлеу Сарпековниң тәшәббуси билән саламәтлик сақлаш саһасида узун жиллар ишләп, һөрмәтлик дәм елишта жүргән саһа хадимлирини кәспий мәйрәмләр билән тәвәллудлирида тәбрикләш әнъәнигә айланған.

Жүмлидин йеқинда узун жиллар наһийәлик жуқумлуқ ағриқлар бөлүмини башқурған тәжрибилик врач, өз саһасиниң йетүк мутәхәссиси Меликәм Мәхсүт қизи Һапизова билән учришиш болуп өтти.
Дәсләп сөзгә чиққан баш дохтур Төлеу Сарпеков Меликәм Һапизованиң тәржимә һали вә иш паалийитигә тохталди.
-Бүгүнки учришишниң башқилардин өзгичилиги, биз мошу залға яш дохтурларни тәклип қилдуқ. Чүнки барлиқ аңлиқ һаятини мошу саһаға беғишлиған пешқәдәмлиримиз аз әмәс. Улар Гиппократ қәсәм ядиға садақәтлиги түпәйли наһийә хәлқиниң саламәтлигини сақлаш йолида аянмай әмгәк әтти. Шу арқилиқ көпмилләтлик наһийә хәлқиниң һөрмәт-еһтирамиға бөләнди. Мана мошундақ баш қошушларниң тәрбийәвий әһмийитиниң зор болуши яшларниң туғулуп өскән йериниң адәмлирини сөйүшкә, униң ижтимаий-ихтисадий, мәдәний тәрәққиятиға бир кишилик һәссисини қошуш үчүн әмгәк етишкә чоң түрткә дәп ойлаймән. Бүгүнки кәчниң қәһриманиму дәсләп Чоң Чиғанда сәккиз синипни андин шәһәрдики С.Киров намидики оттура мәктәпни тамамлап, 1966-жили Шәмәй медицинилиқ институға оқушқа чүшүп, уни 1972- жили тамамлиди. Әмгәк паалийитини Талдиқорғанда башлап, бир жилдин кейин өзи туғулуп өскән ана жутида балилар дохтури, кейин жуқумлуқ ағриқлар бөлүмидә врач, бөлүм башлиғи болуп ишләп һөрмәтлик дәм елишқа чиққан шипа қоллуқ дохтур.
Бүгүн кәсипдишимиз, яшларниң устази Меликәм Мәхсүт қизи шанлиқ 70 яшлиғини қарши еливатиду. Барлиқ кәсипдашлар намидин анимизға мустәһкәм саламәтлик, бәхитлик қерилиқ дәмлириниң көп болушини тиләймиз,- дәп һөрмәт билдүрүп, чапан йепип, гүлдәстиләр тутти. Шуниңдин кейин наһийәлик Уйғур этномәдәнийәт мәркизиниң рәиси Ризайдин Әйсаев, тәвәллуд егисиниң синипдиши Турған Қурбанов вә башқилар тәбрикләп, иллиқ тиләклирини изһар қилди. Сөз ара медицина хадимлири сәнъәт һәвәскарлири қазақ, уйғур тиллирида нахшилар билән милий уссуларни ижра қилип, көңүлләрни көтәрди.
Гөһәрбүви
Исмайилжанова.

Күнтізбе

« Желтоқсан 2019 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

booked.net

  • Материалды қарау саны : 731169