Йүсүп Хас Һажип ижадийитигә беғишланди

10.01.2020ж

Йеңи жил һарписида Чоң Чиған оттура мәктивидә « Бейбітшілік әлемі» хәлиқара қазақ ижадий биләшмисиниң тәшәббуси, наһийәлик уйғур этномәдәнйиәт мәркизиниң қоллап қувәтлиши билән дуния әһлигә

«Қутадғу билик » дастани билән мәшһур болған Йүсүп Хас Һажипниң ижадийитигә беғишланған «Әждат мираси» намлиқ әдәбий -музыкилиқ чарә болуп өтти.
Чоң Чиған оттура мәктивиниң мудири Бақыт Дүйсембаев утазлар билән жирақ-йеқиндин қәдәм тәшрип қилған меһманларни иллиқ қарши елип, мәктәп ичини арилап, чиққандин кейин чарә мәктәпниң мәжлис залида башланди. Чаридә дәсләп сөзгә чиққан мәктәп мудири Бақыт Дүйсембаев :
-Улуқ Ипәк йоли бойидики бу жутниң турғунлириниң асасини қазақлар билән уйғурлар тәшкил қилиду. Мәктивимиздә билим қош тилда берилиду. 1200 оқуғучиға 120 муәллим тәлим- тәрбийә бериш йолида ижадий издиниш билән иш көрүватиду дәп ейтишқа һәқлиқмән Униң дәлили бүгүн биз силәр билән баш қошуватқан әдәбий музыкилиқ чаридур. Йүсүп Хас һажипниң 1000 жиллиғиға беғишланған чарә наһийә мәктәплиридә уюштурулған болса, бизму бу әдип тәвәллудиға чоң тәйярлиқ көрдуқ. Чүнки Қазақстан Жумһурийитиниң Тунжа Президенти -Елбасы-Нурсултан Назарбаев « Келәчәккә нишан : мәнивий йеңилиниш» мақалисида «Миллий әнъәнилиримиз билән тилимиз, музыкимиз, әдәбиятимиз утуқлиримиз, бир сөз билән ейтқанда миллий роһимиз өзимиздә мәңгү қелиш керәк. Абайниң даналиғи билән Әвезовниң билими, Жамбулниң жырлири билән Қурманғазиниң күйлири әсирләрдин бизгә келиватқан әждатлиримизниң авази- улар бизниң мәдәнийитимизниң бир қисмила,- дәп көрсәтти. Бүгүн мана шундақ улуқ әдип Йүсүп Хас һажипниң йезип кәткән бай мирасини әвлаттин -әвлатқа йәткүзүп уларниң исимлирини мәдһийләш мәхситидә уюштуриливатқан чариниң әһмийити чоң,- дәп қатнашқучиларға тилигини изһар қилди .
Шуниңдин кейин чирайлиқ бәзәнләндүрүлгән сәһнидә чарә башланди. Бирдинла шуни тәкитләш керәкки, әдипниң бай ижадий мирасини мәктәп оқуғучилири уйғурниң мәшриви асасида көрсәтти. Ейтайлуқ униң һаяти вә ижадийити һәққидә 10-синип оқуғучиси Замира Дамоллаева доклад оқуди. Андин оқуғучилар алимниң «Қутадғу билик» дастанидики дөләт башқуруш, билим, тил тоғрисида ейтилған әқиланә сөзлирини ядқа ейтип,униңға әмәл қилишқа чақирғанлиғи һәммини қайил қилди. Әдәбий музыкилиқ кәчниң иккинчи қисмида мәктәп сәнъәт һәвәскарлириниң концерти көпчиликниң көңлидин чиқти. Мана шуниңдин кейинла кәч мәшрәпниң тәртип-қаидилирә мувапиқ давамлашти. Оқуғучилар мәшрәпниң « Тиләк» , « Гүлчай»,» «Дава-дәстүр» қисимлирида әдип әсәрлири асасида билгәнлирини намайиш қилса, қатнашқучилар тегишлик мәлуматларға егә болди.
Йезидики « Пәрваз» хәлиқ ансамблиниң бәдиий рәһбири- достлуқниң күйичиси Оғләм Тайирова чариниң музыкилиқ қисмида уйғур, қазақ миллий нахша уссулирини ижра қилиш маһаритини ашуруш йолида тинмай мәшиқлиниватқанлиғини байқидуқ. Бу күни мәктәп сәһнисидә мәктәп муәллимлири вокаллиқ топи билән оқуғучилар миллий чалғу әсвапларда уйғур, қазақ тиллирида нахшиларни бабиға йәткүзүп ижра қилип, уссулардин чачқа чачти.
Хуласилап шуни тәкитләш керәкки, әдипниң ижадийитигә беғишланған чаригә устазлар билән оқуғучиларниң чоң тәйярлиқ көрүп, униң һөддисидин чиққан . Мәктәп мудириниң рәһбәрлигидә устазлар Айшигүл Йүсүпова, Мукарәм Ғожашева, Сәйярәм Розахунова, Гүлбәһрәм Перидинова, Шаһибәм Зәйнавдинова билән китапханичи Гөһәрбанум Тохтахунова вә Эльвира Жанузақоваларниң әмгигини атап өтүшни тоғра көрдуқ. Чүнки бу күни мәктәпниң мәжлис залида, фойеда китаплар көргәзмиси билән , қол һүнәрвәнчилиги нәмунилиридин көргәзмиму қоюлупту. Болупму мәктәп муәллими Гүлниза Тохтибақиеваниң қапақлардин ясиған буюмлири һәмминиң диққитини жәлип қилди. Чоң Чиған оттура мәктивидә өткән чаридә уйғур, қазақ миллитиниң вәкиллири миллий кийим-кечәкләрни кийип һәқиқий достлуқ билән бирликниң үлгисини намайиш қилди.
Кәч ахириди сөзгә чиққан «Бейббітшілік әлемі» хәлиқара қазақ ижадий бирләшмисиниң Панфилов наһийәсидики вәкили Сүбһидин Мәңсүров бир топ муәллимләр билән оқуғучиларни Йүсүп Хас Һажипниң 1000» жиллиқ бәлгүси һәм дипломлар билән мукапатлиди. Жутдаш шаир Аблеким Дамоллаев шеирлардин чачқа чачса, Чоң Чиған йезисиниң баш жигитбеши Иминжан Ғожашев вә башқилар бүгүнки чариниң жуқури дәрижидә уюштурулғанлиғини тәкитләп, мәктәп муәллимлириниң ишлириға утуқ муваппәқийәтләр тилиди.
Йүсүп Хас Һажипниң ижадийитигә беғишланған чарә Яркәнт шәһиридики Билал Назим намидики мәктәптиму өтүп, мәктәп мудири Шеринай Һасанова йолбашчилиғидики оттура мәктивиниң устазлири билән оқуғучилири әдипниң ижадийитини оқуп үгиниватқанлиғини намайиш қилди. Билал Назим намидики мәктәптә өткән фестивальда оқуғучилар өз ижадидин шеирлар билән биллә әдипниң шеир вә әқиланә сөзлирини ядқа ейтишта бәс-бәскә чүшти.
Гөһәрбүви Исмайилжанова

Күнтізбе

« Желтоқсан 2020 »
Дс Сс Ср Бс Жм Сб Жк
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

booked.net

  • Материалды қарау саны : 1496160