Аниниң көңли кәң мисали аләм

05.02.2021ж

Күнләр деңиздәк чайқилип өтмәктә. Қанчә яхши адәмләр билән һаят сени учраштуридикән. Бирлири чапсанла унтилип, бирлири болса көңлүнгә меһрини бөләп өтиду. Әйнә шундақ меһрибан инсан, мүжәзи очуқ, сәвирлик, ақ көнүл, өзиниң әмгәкчанлиғи, меһмандостлуғи, хуш пейиллиғи охшаш инсаний хисләтлири, дана нәсиһәт сөзлири билән әл-жут, уруқ-туққан, достлири вә кәсипдашлири арисида чоң иззәт-иһтирамға бөләнгән Баһарәм Сулайманқизи Подчимирова 85 яшниң йүзини көрди.

Хуш пейил адәмни көрүшниң, униң билән биргә ишләшниң өзи дилларға хошаллиқ, көңүлгә арамлиқ һәдийә қилиду. Йәнә ойлар, бешимдин өткән вақиәләр мени қолумға қәләм елишқа дәвәт қилди. Жүрүгимниң төридин орун алған әжайип инсан һәққидә йезишни тоғра көрдүм.
Һелиму есимда, мәктәптә оқуп жүргән чағдики әдәбий кәчләр, мәктәпниң 60 жиллиқ мәрикиси, мудир болуп тайинланған күнүмдә гүлдәстә көтүрүп, иллиқ тиләклирини ейтқан – әйнә шу Баһарәм һәдә еди. Анам билән биллә мәктәп әтрапиға гүлләрни тикип, пәрвиш қилған, велосипедқа минип һәр яқтин китаплар тошуп, тинмай әмгәк әткән – шу Баһарәм һәдә. Меһри дәрия, қәлбни чүшинидиған, қәдримизгә йетидиған, мәслиһәтчи һәдәмниң һаяти башқиларға үлгә болсун.
1936-жили Садир йезисида дунияға кәлгән Баһарәм һәдә оттура билимни Молотов (һазирқи Ы.Алтынсарин) намидики мәктәптә алған. Андин 2 жиллиқ муәллимләрни тәйярлайдиған курсни тамамлап Надәк, Пәнжим йезилиридики мәктәпләрдә пионер вожатыйи, С.М.Киров намидики (һазирқи Х.Һәмраев) мәктивидә китапханичи болуп ишләйду. Баһарәм һәдә алдиға қойған вәзипини орунлашқа тиришип, издинип, оқурмәнләр билән тил тепишип ишләшни билди. Билимниң қайнар булуғи, роһи байлиқниң асасий көзи болған китап екәнлигини һармай-талмай тәшвиқат қилип, наһийә мәктәплири арисида тәжрибилик китапханичи дегән атаққа егә болди. Биллә өткүзгән әдәбий конференцияләр, «Мөжүзә мәйданлири», кәчләр, синип саатлири, наһийәлик семинарлар дайим жуқури баһалинип кәлди.
Баһарәм Сулайман қизи устаз Әквәржан ака билән аилә қуруп, пәрзәнт көрди. Улардин нәврә-чәврә сөйди. Һәммисигә қайтмас ирадиси, ғәйрити билән, атиниң йоқлиғини билдүрмәй, тәрбийиләп, қатарға қошти. Бу гөзәл инсанниң ейтқан нахшилири, жутдарчилиқ ишлардики баһалиқ паалийити, яшларға ейтидиған тиләклири техи көп. Нураний аниниң һаяти бизгә дайим үлгә болғуси. Әмгәк ветерани, арқа сәпниң қәһримани Улуқ Ғалибийәтниң 65, 70, 75 жиллиқ медальлири, тәшәккүрнамилар билән тәғдирләнди.
Пешқәдәм устазри тәвәллуди билән ветеран устазлар намидин қизғин тәбрикләп, мустәһкәм саламәтлик, чәксиз меһир-муһәббәт вә аилисидә хатиржәмлик тиләп, балилириниң вә бизниң бәхтимизгә узақ яшаң, һәдә !– демәкчимиз.
Асийәм Өмәрбақиева,
ҚЖ әмгиги сиңгән муәллим,
«Панфилов наһийәсиниң
Пәхрий граждани».

Күнтізбе

« Наурыз 2021 »
Дс Сс Ср Бс Жм Сб Жк
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

booked.net

  • Материалды қарау саны : 1665710