АНА жут «илһам булиғида» күйләнди

20-январь күни наһийәлик Мәдәнийәт өйидә яш һәвәскар ком­позитор, шаир, риясәтчи Камунар Турсуновниң ижадий кечилиги болуп өтти. 400орунлуқ мәдәнийәт өйидә алма ташлиғидәк бош орун йоқ . Буни биз униң ижадийитиниң чоң-кичик мухлислириниң өсүватқанлиғидин дәп баһалидуқ. Чүнки өзи яш болғиниға қаримай той-нәғмиләргә риясәтчилик қилип, үч тилда шеирларни ижат қиливатқан Камунар -у һәқиқәтәнму сәнъәт шәйдаси. Ижат қилған шеир­ларни аһаңға селип, өзи ижра қилип көпчиликниң көңлидин чиқмақта.

 

Қасимжан вә Гүлбәһрәм Намановларниң пәрзәнди болған у Ават оттура мәктивини муваппәқийәтлик тамамлап, Әл Фараби намидики Қазақ Дөләт университетиниң филология факульетиниң хитай вә ин­глиз тиллири бөлүмигә оқушқа чүшкән болсиму , өзини сәнъәткә болған хуштарлиғи түпәйли оқушини таш­лап бирә тола йезиға қайтишни тоғра көрди.

Адәттә концерт яки ижажий кәчләр риясәтчиләрниң ижазити билән баш­линиду. Бу қетим концерт һеч бир риясәтчиниң тәкливисизла Камунарниң сәһнигә чиқиши билән өзгичә башлан­ди.

-Бәлким бүгүн силәрниң һәр қайсиңлар үчүн адәттики күнду. Мениң үчүн болса бу хошаллиқ , көптин бери күткән әтивалиқ күн. Мениң атам ,узун жиллар ички ишлар бөлүмидә ишләп, һөрмәтлик дәм елишқа чиққан Қасимжанниң туғулған күни. Пәрзәнтлик борч, садақитимни ижадий кечилигим арқилиқ йоллашни мәхсәт қиливедим. Бүгүн шу арманлар орунланған күн, -деди. Тәкитләш керәкки, бу кәчниң сценарий муәллипиму Камунар өзи. Устазлириға дәсләпки сөзни беришни көңлигә пүкүпту. Шуниңдин кейин кәчтә риясәтчилик тизгинини қолиға алған Ялқун Нурахунов сәнъәт йолидики устази Әквәржан Исмайилжанов,Уйғур наһийәсидин қәдәм тәшрип қилған Батур Ғаппаровларға сөз новитин бәрди. Иллиқ тиләкләр изһар қилинғандин кейин Яркәнт гуманитарлиқ-техникилиқ колледжиниң оқутқучиси Молутжан Тохтахунов Камунарниң мошу сәнәгә мунасивәтлик йеңи нәширдин чиққан дәсләпки « Илһам булиғи» намлиқ кита­вини тонуштурди. Шуниңдин кейин кәч қәһримани киндик қени төкүлгән «Ават бағлири»,андин аниси Гүлбәһрәмниң жути һәққидә өзи ижат қилған « Анам жути Ачиноқа» нахшилирини ижра қилди.

Кәчтә пәқәт Камунарниң сөзигә йезилған «Уйғур оғланлири» нахшисини «Дилдар» топи, Гөһәрбанум Ниязова билән Һакимжан Турсуновниң ижраси­дики « Сәнъәт», әнди «Уйғур қизимән» нахшисини Гүлсәнәм Мәшүрова, «Алтөй» нахшиси билән Баһадур Илахунов «Чирайлиқ қиз»-Арман Алимжанов билән қазақ тилидики « Анашым» нахшисини Адил Һемитов (Адил Қари) рус тилидики «Жаркент» нахшисини муәллипниң өзи ижра қилип, тамашибинлар көңлидин чиқти. Шундақла тонулған нахшичи Расул За­йитов билән бу күни сәһнигә дәсләпки қетим чиққан Камунарниң оғли Шаһ Аббасниму тамшибинлар давамлиқ алқишлиди. Концерт программисида өзиниң өткүр һәзилири билән риясәтчи Нуршат Ғожашев, Ават яшлириниң «Қалаймиқан» Хушхойлар тапқурлар клуби әзалири яш ижрачилар Әкрәм вә Әхтәм Туғлуқов,Шаһмурат Вела­хунов билән оттуз оғул мәшрәп әһли көпчиликни күлкигә ғәриқ қилди.            

                Кәч давамида Камунарниң нахшилириға чүширилгән клиплар көрситилди. Нахшиларға уссулларни сәһниләштүргән хореограф Саһинур Рәхмидинова рәһбәрлигидики « Саһинур» уссулчилар топи миллий вә заманивий уссуллири билән концертни техиму қизитти.

Ахирида Камунар Турсунов сөз елип, жирақ йеқиндин кәлгән мухлислириға, нахшичи уссулчи достлириға мад­дий вә мәнивий қоллап-қувәтлигән Турған Зайитов вә Әркин Қурбановқа миннәтдарлиғини изһар қилди.

Г. ЛОХМАНЖАН ҚИЗИ .

 

 

Күнтізбе

« Қазан 2018 »
Дс Сс Ср Бс Жм Сб Жк
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

booked.net