«Алтын» сода мәркизигә мәрһәмәт

 Қазақстанда кичик вә оттура тижарәтни тәрәққий әткүзүшкә алаһидә көңүл бөлүнүп, бу йөнилиштә дөләт тәрипидин  һәртәрәплимә ғәмхорлуқлар яритилип кәлмәктә. Елимиз Президенти Нурсултан Назарбаев һәр жили қазақстанлиқларға йоллаватқан Мәктүплиридә вә «Келәчәккә нишан: мәнивий йеңилиниш» программилиқ мақалисидиму  бу тоғрилиқ қәйт қилинип, бир қатар тапшурмилар жүкләнди. «Келәчәккә нишан: мәнивий йеңилиниш» мақалисидики «Туған жер» лайиһисидә  «Туғулған йәргә ғәмхорлуқ қилишни халайдиған тижарәтчиләрни, әмәлдарларни, яшларни қоллаш керәк. Бу һәқиқий вәтәнпәрвәрлик һиссият, у һәркимдә болуши керәк. Уни мәнъий қилмай әксичә рәғбәтләндүрүш лазим»,- дәп атап  көрсәтти.

 

      Кичик вә оттура тижарәткә мундақ  имтиязларниң берилиши нәтижисидә Панфилов наһийәсидиму бу жәһәттин хелила илгириләшләр йүз бәрмәктә. Тәкитләш керәкки, Яркәнт шәһириниң өзидила 3000 ға йеқин кичик вә оттура тижарәт  субъектлири паалийәт елип бериватиду. Өткән жилиниң өзидила ондин ошуқ объект ишқа қошулди. Уларда 80 дин ошуқ адәм турақлиқ иш билән тәминләнди.

   Мана мошу можут болуватқан пурсәт вә ғәмхорлуқлардин  орунлуқ пайдилинип, тәдбирчанлиғи вә ишбиләрмәнлиги  билән иш-оқитини тепип, тижарәтчилик билән шуғуллиниватқанлар аз әмәс. Уларниң наһийә, вилайәт, жумһурийәт  даирисидә тонулуп келиватқанлиғи һәр кимни хошал қилиду. Аиләвий тижарәтни кәң қанат яйдуриватқан исми  жумһурийәт даирисигә тонулған шундақ тижарәтчиләр Серик вә Гүлнар Ақсубаевлар әйну шулар жүмлисидин .

  Норуз мәйрими һарписида  тәдбирчан Гүлнар Ақсубаева « Алтын» сода мәркизини ечип, пайдилинишқа бәрди.  Яркәнт шәһириниң мәркизи,  Улуқ Ипәк йоли бойида қәд көтәргән икки қәвәтлик сода мәркизиниң ечилишиға наһийә рәһбәрлири билән  жамаәтчилик вәкиллири, тижарәтчиләрни наһийәлик «Жаркент әуендері» ансамбли нахша-сазлири билән қарши елип, һәммигә мәйрәмлик кәйпиятлар беғишлап турди. .

    Сода мәркизниң тәнтәнилик ечилишида  Панфилов наһийәсиниң һакими Темирлан Бектасов дәсләпки сөзгә чиқип жиғилған көпчиликни  заманивий сода мәркизиниң ечилиши билән тәбриклиди. Тәвәдә кичик вә оттура тижарәтни кәң қанат яйдуруш үчүн елип бериливатқан ишларға тәпсилий тохталди.   Болупму наһийәдә тижарәтчилик билән шуғуллинип, наһийәниң ихтисадий-ижтимаий саһалирини тәрәққий әттүрүштә бир кишилик һәссилирини қошуватқан ,«Туған жер» программиси даирисидә иш көрүватқан   Гүлнар Қазбек қизи билән Серик Муқаш оғлиға миннәтдарлиғини билдүрүп,  Тәшәккүрнамисини тапшурди. Шуниңдин кейин Социалистик Әмгәк Қәһримани Күләш Айтжанова тәдбирчанлиғиға сахавәтлиги ярашқан Серик билән  Гүлнарға анилиқ ақтилигини билдүрсә, кәсипдаш дости Алмута вилайәтлик Мәслиһәтниң депутати, «Яркәнт крахмал-ширнә заводиниң» мудири Закиржан Қузиев, Ризван Сақиева  сода мәркизини бәрпа қилған Ақсубаевларға изгү тиләклирини изһар қилишти. Өз новитидә сода мәркизиниң мудири  Гүлнар Ақсубаева  шәһәрликләрни   Норуз мәйрими һарписида  көптин күткән хошаллиғи, сода мәркизиниң ечилиши билән тәбриклиди. Мәзкүр сода мәркизиниң қурулуш ишлирида тегишлик һәссилирини қошқан  архитектор, қурулушчи, дизайнер, слесарьларға,қоллап-қувәтлигән дост яранлириға, кәсипдашлириға аилиси намидин миннәтдарлиғини билдүрди. Бу сода мәркизиниң наһийә аһалиси үчүнла әмәс, келип-кетиватқан йүзлигән меһманлар, туристлар үчүнму соға екәнлигини тәкитлиди.  Кербулақ, Ақсу вә Панфилов наһийәлириниң Пәхрий граждани Ғалым Турғанбаев атилик дуасини бәрди. Андин      наһийә һакими Темирлан Амангелди оғли билән Закиржан Қузиев, Тасқин Жапарқуллар сода мәркизиниң рәмзлик лентисини қийғандин кейин   жиғилған көпчилик сода мәркизини арилап көрди.

   Тәкитләш керәкки, заманивий « Алтын» сода мәркизидә 100 адәм турақлиқ иш билән тәминләнгән. Икки қәвәтлик сода мәркизидә азадә һәм чирайлиқ безәлләндүрүлгән,  қолайлиқ бутикларда  чоңлар вә кичик балилар үчүн кийим-кечәк,  жиһазлар билән йемәк ичмәкләрму сетилиду. Сатрашхана билән ашхана ишиму йолға қоюлған. Қисқиси халиғиниңизни мошу йәрдин елип, лазим болса тамақлинип, чечиңизни халиған үлгидә кәстүрүш үчүн шараит яритилған.

 

Г. Исмайилжанова.

 

Күнтізбе

« Сәуір 2018 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

booked.net