У тирик туғулған өз жути билән

  

Бийил  уйғур әдәбиятидиниң жирик вәкили   шаир һәм устаз Хелил һәмраев һаят болғинида 90 яшлиқ тәвәллудини қарши алған болар еди. Мана мошу сәнәгә мунасивәтлик наһийә мәктәплиридә   шаир хатирисигә  иш-чариләр уюштурулмақта.  Шуларниң дәсләпкиси Яркәнт шәһиридики Жамбул намидики оттура мәктәптә өтүп ,униңға жирақ - йеқиндин меһманлар тәклип қилинди.  Қәдәм тәшрип қилған меһманлар мәктәп фойесидики шаир ижадийитигә беғишланған  көргәзмини зиярәт қилғандин кейин, мәжлис залида ижадий кәч башланди.


           Дәсләп мәзкүр мәктәпниң  уйғур тили вә әдәбияти пәнлириниң муәллими Гүлбәһәрәм Баратова шаирниң ижадий паалийити һәққидә доклад  билән сөзгә чиқти. Андин  мәктәп оқуғучилири шаир шеирлирини ипадилик ядқа оқуди. Болупму оқуғучилар Хелил Һәмраевниң балиларға, лирикилиқ, вәтәнпәрвәрлик вә башқиму мавзуларға беғишланған шеирлирини    сәһниләштүрүлгән қоюлум арқилиқму тәсвирләп бәрди.  Бу күни шаирниң мәзкүр мәктәпниң қазақ вә рус тили пәнлириниң муәллимлири тәржимилигән  шеирлири һәммини һаяжанлиққа бөлиди. Қазақ тилида худди шаир охшаш  бом авазда қазақ вә рус синиплирида   тәһсил көрүватқан  қиз оғуллар билән рус синиплирида оқуватқан оқуғучилар уйғур тилида  шеирлардин ядқа оқуди.
        Ижадий кәчтә  мәктәп сәһнисидә  «Ана жүриги» монологиғму алаһидә әһмийәт берилип, уни  сәһниләштүргән. Монолог оқулуши жәриянида  тамашибин қәлбигә йол тапқан оқуғучилар һәр бир образни  худди кәспий артистлардәк  тәсвирләп бәрди. Көзләрдин яш аққузған монологтин кейин оқуғучиларниң маһаритигә қайил болған көпчилик   давамлиқ алқишлирини яңритип  турди.
    Кәч давамида жутдаш  шаир Арупжан Жумахунов устази билән биллә өткүзгән  ғенимәт чағлирини  әсләп, Хелил һәмраевқа беғишлап  өз ижадидин шеирини оқуп бәрди. Наһийәлик билим бөлүминиң методисти Улбала Орманбекова наһийәдки 49 мәктәптә  шаир тәвәллудиға беғишланған он күнлүкләр билән фестиваль, байқашларниң өтүливатқанлиғини тәкитлиди.   Кәчниң әзиз меһманлири «Бейбітшілік әлемі» хәлиқара қазақ ижаткарлар бирләшмисиниң вице президенти Турсун Розиев мәзкүр тәшкилатниң президенти  Әбен Нурмановниң тәбригини йоллап, мәктәп оқуғучилири билән устазлирини  «Бейбітшілік әлемінің» пәхрий ярлиқлири  билән мукапатлиди. Жәмийәт әрбаби Азтекин Ибрагимов билән    наһийәниң Пәхрий граждани Галина Молчанова  сөз елип,  шаир шеирлириниң мавзусиға тохталди. Йәттисуниң мәрвайити болған Яркәнт тәвәсидики көпмилләтлик хәлиқләрниң бузулмас достлуғи  гөзәл тәбиити,  әмгәкчан дехан  билән чарвичини күйлигән шаир әслимилири билән ортақлашти.         Хелил һәмраевниң пәрзәнтлири Пәризат билән Шерзат  мубарәк исмини пәхирлиниш билән тилға еливатқан атисиниң тәвәллудиға қатнишиватқан меһманларға, жутдашлири билән мәктәп муәллимлири вә оқуғучилириға миннәтдарлиғини изһар қилип, хатирә соғилирини тәғдим қилди.
     Мәктәп мудири  Ризайдин Әйсаев болса  пешқәдәм устаз вә шаирниң  тәвәллуди жил давамида  атап өтүлидиғанлиғини ,униң шеирлирини башқа тилларға тәржимә қилиш лазимлиғини тилға алди.  Наһийәдики көпмилләтлик,  әң чоң билим дәргаһи болған Жамбул намидики оттура мәктәптә елимиз Президенти Нурсултан Назарбаевниң  «Келәчәккә нишан: мәнивий  йеңилиниш» программилиқ мақалиси даирисидә Яркәнтниң мунаввәр пәрзәнтлириниң бухилдики  хатириләш чарилириниң  өсүп келиватқан әвлатлар үчүн тәрбийәвий әһмийитиниң чоң екәнлигини  қәйт  қилди.  
       Ахирида шуни тәкитләш керәкки,  шаир тойи  наһийәдики барлиқ мәктәпләр билән униң туғулған жути Пәнжимдә кәң даиридә атап өтүлмәкчи.  
                   Г.Лохманжан қизи.  

Күнтізбе

« Қыркүйек 2018 »
Дс Сс Ср Бс Жм Сб Жк
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

booked.net