Тәләтжанниң йәккә концерти

«СССР хәлиқ артисти», мәшһур композитор Қудус Ғожамияровниң 100 жиллиқ тәвәллудиға беғишланған чариләр  Панфилов  наһийәсидики 49 оттура    вә 2 сәнъәт мәктивидә  уюштуруливатиду.   Сәнъәт мәктәплиридики давамлиқ  уюштуриливатқан лекция концертлар билән ижадий кәчләр, очуқ синип саатлири билән учришишлар   шулар жүмлисидин. 

 

       Йеқинда биз « Реһимжан» сәнъәт мәктивиниң 4-синипида уйғур миллий саз әсваплири бөлүминиң равап синипида тәһсил көрүватқан   Тәләтжан  Шавдуновниң  йәккә ижрасида  уйғур кәспий музыка сәнъитиниң  асасчиси Қуддус Ғожамияровниң  әсәрлирини  тиңшашқа муйәссәр болдуқ.

   Шагиртиниң йәккә ижадий концертини   мәзкүр сәнъәт мәктивиниң мудири  Реһимжан Тохтахунов киришмә сөз билән ечип, жиғилған көпчиликкә  Тәләтжанни тонуштуруш билән  музыка кечигә өзи  риясәтчилик қилди. Реһимжан Имир оғли дәсләп  Қуддус Ғожамияровниң тәржимә һали вә  ижадий паалийити һәққидә доклад оқуди. Андин Алмутидики Консерваторияда   бүйүк композитордин тәлим алған жиллирини ,униң  алий пәзиләтлик  инсаний хисләтлирини   пәхирлиниш туйғулири ичрә  тәпсилий ейтип, әслимилири билән ортақлашти.

    Дехан Ғәйрәт йезисидин Яркәнт шәһиридики мәктәпкә  келип сәнъәтниң қир-сирлирини үгиниватқан Тәләтжан бу күни равапта Қуддус Ғожамияровниң  « Течлиқ сази», «Ризвангүл», « Муһаббәт» қатарлиқ әсәрлирини концертмейстери Гүлмира Тохтахунованиң фортепианода тәңкәш қилишида ижра қилди. Андин у  Вебер, Шуберт, Чайковский, Рахманинов, Огинский, Щестокович  қатарлиқ исми  дунияға мәшһур композиторлар билән  бир қатарда қазақстанлиқ  Ахмет Жубанов, Ғазиза Жубанова, уйғур кәспий композиторлири  Икрим Мәсимов, Зәйнуллам Сетәковниң әсәрлирини  маһирлиқ  билән ижра қилди.

     Тәләтжан уйғурниң рававида рус, немис, француз, италянчә, қазақчә сазларни шундақ  чоң маһарәт билән ижра қилдики , һәр бир  саздин кейин тамашибинниң алқиши узаққичә яңрап турди.  Шагиртиниң  ижрасидики Һәр бир әсәрниң тарихиға,  түзүлишигә изаһ бәргән устази Реһимжан Имир оғлиму  қолиға дутарини елип:

 - Һәр бир адәмниң бойида бир талант, қабилийәт  можуттур. Әйнә шу  талант у пәрвишкә муһтаж. Мана шу истедатни байқап, тәрәққий әткүзүш үчүн пәқәт   һармай-талмай әмгәк етиш керәк. Биз бүгүн  шундақ истедатлиқ шагиртимизға шуни тилигән болар едуқ. Ундақ болса концертимизни Зәйнуллам Сетәковниң  «Әмгәк шатлиғи» сази билән тамамлаймиз. Тинимсиз әмгәкниң нәтижиси шатлиққа, утуққа  елип келиду, -дәп шагиртиға  жор болди.   

    Шундақ қилип Тәләтжан билим еливатқан икки мәктәпниң  устазлири,  һәр хил синиплирида тәһсил көрүватқан шагиртлар билән ата-анилар вә деханғәйрәтлик  савақдашлири Тәләтжанниң  йәккә концертида униң  бари-йоқи төрт жилниң ичидә оқуп  үгәнгән   дуния  сәнъәткарлириниң  әсәрлирини  тиңшап, бәһирләнди. Әң әвзили бу күни уйғур классик музыкисиниң асасчиси тунжа уйғур композитори  33 йешида « Ризвангүл» симфониялик әсәрини  яратқан, 10 жил давамида  Консерваторияниң ректори болған, Қазақстан Композиторлар Иттипақиниң рәиси, уйғурниң бай  мәдәнийитини дунияға тонутқан   Қуддус Ғожамияровниң  һаяти билән йеқиндин тонушуш бәхтигә муйәссәр болди.

    Бу күни  « Реһимжан» сәнъәт мәктивиниң шагирти Тәләтжанниң  жутдашлири билән устазлириму   иллиқ тиләклирини изһар қилишти. Муәллимлири Жаһангүл Һашимова, Бибинур Тайирова, момиси Шадийәм вә башқилар келәчәктә сәнъәткар болушни арман қиливатқан Тәләтжанға, саз сәнъитидин тәлим-тәрбийә бериватқан устазлириға миннәтдарлиғини изһар қилди. Реһимжан Имир оғли болса  өз новитидә   пәрзәндиниң бойидики сәнъәткә болған иштияқини байқап,   саз челиш маһаритини ашуруш үчүн   тәвәдики әң қедимий Дехан Ғәйрәт  йезисидин он километр  мусапини бесип  һәр күни дегидәк  шәһәргә берип келишигә, һәр хил байқашларға қатнишишқа  зәмин яритиватқан ата-аниси Шөһрәт ,Санийәм Гайитовларға миннәтдарлиғини йошурмиди. Ушбу  билим ордисида  тәлим елип, һазирқи күндә  Қазақтан эстрадисиниң юлтузлири аталған    Дилмурат Баһаров, Абай Әбишев, Мақпал Исабекова билән  Илһамжан Сулайманов, Икрәмжан Лохманов, Айткүл Шапағатова, Андрей Гибадуллин  қатарлиқ онлиған   кәспий  маһир сазәндиләрниң йетилип чиққанлиғини  тилға алди.

   Тәкитләш керәкки  66 жил давамида кәлгүси сәнъәткарларни тәйярлаватқан  билим ордисида фортепиано вә  уйғур, қазақ, рус хәлиқ саз әсваплирини челиш маһаритини қелиплаштуруш билән биллә хореография пәни синипидиму онлиған уссул шәйдалири мәшиқлиниветипту.    Мәктәптә  музыка пәниниң тарихи билән сольфеджио, гармония  пәнлиридин   Гүлмира Тохтахунова, Лилия Закирова, Валентина  Сазонова ,Татьяна Рубцова, Жанар Ахметова қатарлиқ йетүк мутәхәссиләр хореграф Наргиза Низамованиң тинимсиз ижадий әмгиги түпәйли   шагиртлар   вилайәтлик , жумһурийәтлик «Дельфий оюнлири», « Ақ көгершін» байқашлирида ғалип чиқмақта.

   Баһарниң мәйрәмлик бу күнлиридә Тәләтжанниң йәккә концерти  униң қатнашқучилириға арамбәхш дәмләрни беғишлиди.   Кәлгүсидә равап  синипи бойичә билимини ашуруш нийитини билдүриватқан  һәм устазлиридин  чоң үмүт күттүриватқан  Тәләтжан Шавдуновқа ақ йол тиләймиз.

Өз  мухбиримиз .

 

Күнтізбе

« Желтоқсан 2018 »
Дс Сс Ср Бс Жм Сб Жк
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

booked.net