Исми миннәтдар әвлатлар қәлбидә

30.07.2018 жыл 
Йеза егилиги ишләп чиқиришиниң маһир тәшкилатчиси, Өсәк вадисиниң мәрданиси   Әмгәк Қизил Туғи  вә Октябрь революцияси  вә Ленин орденлириниң  саһиби  Азат Мәшүровниң  аримиздин кәткинигә 18 жил болди.   Лекин униң жисми йәргә  көмүлгини билән исми унтулғини йоқ. Азат Мәшүровниң намида у туғулуп   өскән ана жути Пәнжим йезисида бир коча, шундақла  йезидики А.Розибақиев намидики мәктәптә бир синип  атилиду.

 

                 Йеқинда   Панфилов наһийәси рәһбәрлириниң  тәшәббуси һәм уюштуруши билән елимиз Президенти Нурсултан Назарбаевниң « Келәчәккә нишан: мәнивий йеңилиниш» мақалисидики « Туған жер» лайиһисидә атап көртиситилгинидәк  барлиқ аңлиқ һаятини ана жутиниң  ихтисади билән мәдәнийитиниң риважлинишиға беғишлиған    йеза егилиги ишләп чиқиришиниң маһир тәшкилатчиси, жәмийәт әрбаби   Азат Мәшүр оғлиниң  намида   Яркәнт шәһиридики бир коча  аталди.   Коча мәйримигә  мәрһумни билидиған жут-жамаәтчилик вәкиллири билән биллә  вилайәт , наһийә рәһбәрлири, жирақ-йеқиндин кәлгән меһманлар қатнашти.

   Мәрасим иштракчилири әтигәндә   наһийә мәркизидин 18 чақирим жирақлиққа орунлашқан Пәнжим йезисидики  зәраткаллиққа  қарап йол тутти.  Мәрһум Азат Мәшүр оғлиниң   роһиға қуръан тилавәт қилип, гүлчәмбәрләр қоюп, сүкүнат сақлап әскә алди.  Шуниңдин  кейин  мәрасим шәһәрдики  Азат Мәшүров намидики кочида давамлашти.

    Коча мәйримидә дәсләп наһийә һакми Темирлан Бектасов сөзгә чиқип,   мәрһумниң һаяти ,  әмгәк паалийити һәққидә тәпсилий тохталди.    Алмута вилайитиниң һакими Амандиқ Баталовниң   тәбрик хетини йоллап,  мәрһумниң рәпиқиси, Қазақстан Язғучилар Иттипақиниң әзаси  Дүрнәм  Мөрдүн қизиға  һөрмәт билдүрүп,  чапан йепип, гүлдәстиләр тутти.

 Шуниңдин кейин минбәргә көтирилгән Алмута вилайәтлик   ақсақаллар кеңишиниң рәиси, өз вақтида  Азат Мәшүр  оғли билән бир  сәптә   йеза егилиги ишләп чиқиришида хизмәт қилған сәпдиши  Ермек Келемсейит, Қазақстан Жумһурийитиниң пәхрий журналисти Абдукерим Тудияров, жутдише   Қурманғали Нүсипов,  жәмийәт әрбаби Йолдаш Азаматов, Панфилов наһийәсиниң Пәхрий граждани Реһимжан Тохтахунов,  коча турғунлири  намидин Мәһәммәтжан Мәңсүров  вә  башқилар Азат Мәшүровниң көп қирлиқ паалийити, алий вә инсаний пәзиләтлири һәққидә  ейтип, униң билән биллә өткүзгән   әстин чиқмас  әслимә хатирилири  билән  ортақлашти.

    Өз новитидә рәпиқиси Дүрнәм Мәшүрова     өмүрлүк жүпти Азат Мәшүр оғлиниң   исмини яд етип,  ушбу мәрикини  уюштуриватқан наһийә вә шәһәр рәһбәрлиригә, мәрасимға қатнишиватқан   жутдашлириға, сәпдашлириға, жирақ-йеқиндин қәдәм тәшрип қилған меһманларға, дост-яранлириға   аилиси намидин миннәтдарлиғини  изһар қилди.  Дүрнәм Мөрдүн қизи  коча турғунлириға,   йәни мәрасим һарписида Грек  рим күришидин Азия чемпиони аталған  яркәнтлик    спортчи Ғ.Қабдынасарға, мәзкүр кочидики сүннәткә  олтарғузулған  Суният Босақовқа вә үлгилик аилә  әзалириға  хатирә соғилирини  тапшурди.  Андин  Ермек Келемсейит, Дүрнәм Мәшүрова билән Алмута вилайити һакиминиң орунбасари Жеңис Туяқов, наһийә һакими Темирлан Бектасов Азат  Мәшүров намидики кочиниң  рәмзлик  лентисини қийди.

   Коча мәйримидә сөз ара  «Шатлиқ», «Жаркент әуендері»  « Саһинур »ансамбллири билән « Сапар» топи  нахша-уссуларни ижра қилип, көпчилик көңлидин чиқти.

       Санийәм Исмайил    Дүрнәм Мәшүрованиң  шеириға   композитор Дилмурат  Баһаров ижат қилған « Яркәнт юлтузи» нахшисини дәсләпки  қетим ижра қилип, һәқиқәтәнму Яркәнттин чиққан юлтузниң һаятини нахшисида күйлиди. 

     Ахирида  Азат Мәшүровниң роһиға беғишлап «Атлантик» кафесида  нәзир берилди. Бу йәрдиму уни билидиған дост-яран,  сәплашлири  иллиқ хатирилири билән ортақлашти.

Г.Исмайилжанова.

Күнтізбе

« Қараша 2018 »
Дс Сс Ср Бс Жм Сб Жк
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

booked.net