Навайлар күч синашти

  Һәр биримизниң дәстихинида тонур нанниң алидиған орни алаһидә . Уни   тонурға йеқип-пиширип, һазирлашниңму усуллири һәр хил. Әслидә  уйғурларда тонур нанниң  40тин ошуқ түри  бар екән.  Нан вә тоғач түрлири әждатлиримиздин мирас қалған тонурда  вә һазирқи күндә  заманивий электр пәчлиридә пишириливатсиму, тонур нениниң қәдир-қиммити  бөләкчә. Чүнки тонурда  сиядан, май- сүт қошулған нан-тоғачниң тәмимму алаһидә. Шуңлашқа қанчә әсир өтсиму һәр бир уйғурниң һойлисида  тонур болуп, нан йеқиш әвлатин-әвлатқа қеливатқан бай мираслиримизниң  бири  болуп һесаплиниду.

 

                 Йеқинда   Яркәнт  шәһиридики  «Ирада» кафесида өткән байқашта биз буниңға толуқ көз йәткүздуқ. Бирдин байқиғинимиз байқашқа қатинишиватқан навайларниң барлиғи дегидәк яшлар.  Яшлиғиға  қаримай  улар нан пиширишниң һәр хил усуллири билән нанниң түрлирини намайиш қилишта бәс-бәскә чүшти.

                 Қазақстан Уйғур миллий ассоциацияси йенидики «Мирас» анилар жәмийитиниң уюштуруши,   наһийәлик уйғур этномәдәнийәт мәркизиниң қоллап-қувәтлиши билән өткән   чаригә  яркәнтлик навайлар билән Алмута шәһиридинму навайлар қатнашти.

                Нан-тоғач  мусабиқисиниң тәшәббускари   «Мирас» анилар жәмийитиниң әзаси Мерванәм  Еләкова байқашни  ечип,  бүгүнки чаригә бәлгүлүк сәвәпләргә бола қатнишалмайватқан   мәзкүр тәшкилат  рәиси Әхтирим Әхмәтованиң тәбригини йәткүзүп , байқашқа  қатнашчилири   билән тонуштурди. Андин наһийәлик уйғур этномәдәнийәт мәркизи рәисиниң орунбасари Абдусалам Алиев сөзгә чиқип,   дәстихандики  нан вә нан мәһсулатлириниң    алидиған орни һәққидә ейтип, һәр күни Яркәнт тәвәсигә келип кетиватқан меһманларниң  Яркәнтниң мейизлик  нанлириға еғиз тегип,   жуқури баһа бериватқанлиғини  мәмнунийәт билән тилға алди.

                Шуниңдин кейин сөзгә чиққан наһийәлик  тәдбирчан ханим-қизлар кеңишиниң әзалири , тижарәтчи ханимлар  Улбосын Аманбаева билән  Балшекер Жапишева  әзәлдин достлуғи билән бирлиги ярашқан  тәвәдә уйғур билән   қазақниң достлуғини тәрипләп,  уларму  уйғурниң сиядан қошуп йеқилған  нан-тоғичисиз дәстихинини тәсәввур қилалмайдиғанлиғини тәкитләшти.       Шуниңдин кейин  байқаш қатнашчилири -навайлар  сәп түзәп  өзлири  тонурға  йеқилған нан-тоғичини  намайиш қилди.  Андин сәккиз үмүткар  өзини  тонуштуруш, нан йеқиш маһарити бойичә   бәс-бәскә чүшти. Тәкитләш керәкки, навай ханим-қизлар  нахша-уссул номинацияси вә сәһнилик қоюлумлардиму  һүнәрлирини көрсәтти.Улар етизлиқтики ашлиқни жиғиштуруш, хаманда қурутуп, тазилаш, түгмәндә ун тартиш, тонурға нан йеқиш маһаритини  чевәрлик билән  көрсәтти. Шундақла  уйғурлар бөшүк тойда тарқитилидиған  тоғач, тойниң  тоғичи  билән  непиз нени вә мусибәттә  йеқилидиған тоғачлар һәққидә чүшәнчә бәрди.  

                Байқашниң адил қазилири Алмутидин кәлгән   технолог-кондитер Нурбүви Абдуллаева, Рошәнгүл һажим Мәсимова,   яркәнтлик  навай Маһинур Аюпова билән әмгәк ветерани  Айим  Кәримоваларға   навайларни  баһалаш оңайға чүшмиди. Чүнки сәккиз үмүткар нан -тоғачниң  ондин ошуқ түрини пишириш билән уни тәйярлашниң һәқиқий маһирлири  болғачқа , ханим-қизлар мейизлик нан- тоғачлири   «Ирада» кафесида  жуқури маһаритини намайиш қилишни билди. Мошу йәрдә бу байқашқа әттәйләп Алмутидин  Алғабас мәһәллисидин қәдәм тәшрип қилған  Һакимжан Мәмәтов  һәммини өзигә жәлип қилалиди. Һакимжан  зогули 7 килограмлиқ диаметри1 метр  нанни йеқип, мәзкүр байқашқа елип кәлгән. Һакимжан әсли теги тәкти яркәнтлик болуп  бу нанни  мәхсус тонур ясап, йәңлигини елип кәпту. Уни жутдашлирға соға қилди.

    Шундақ қилип байқашни йәкүни бойичә баш мукапат Яркәнт шәһири  Жапар мәлисидин   Саһидәм  Әйсаева, биринчи мукапатлиқ орунға  Веливай мәһәллисидин Эльмира Абдурахманова, иккинчи орунға  Һажиболус  мәлиси   Супарна   Һаширова,  Дөңмәлилиқ Гүлмира Илахунова,   Пәнжим йезисидин кәлгән  Гүлзарәм Зайнамова  билән һакимжан Мәмәтов үчинчи  орунға мунасип дәп баһаланди.  Яркәнт  шәһири    Ипәк йоли мәһәлисидин Бибинур Илиева билән   Арзигүл Абдуллаева  мәхсус номинациялар билән мукапатланди.  Байқаш ғалиплириға «Мирас» анилар жәмийити билән  наһийәлик уйғур этномәдәнийәт мәркизиниң мәхсус соғилири тапшурулди.

                Нан-тоғач байқишиға  Алмута,Қизил Ғәйрәт, Гүлдала йезилиридин қәдәм тәшрип қилған анилар бу хилдики байқашларни  уюштурушниң тәрбийәвий әһмийитигә тохтилип, нахша-уссуллиридин  чачқа чачти. «Мирас» анилар жәмийитиниң  әзалири   мәзкүр байқашниң тәшәббускари Мерванәм Еләковаға, наһийәлик уйғур этномәдәнийәт мәркизигә  миннәтдарлиғини  изһар қилип,  соғилирини тәғдим қилса , тәшкилат әзаси тонулған риясәтчи Рошәнгүл Вагапова жутдашлириға нахша-уссуларни ижра қилип, көңлидин чиқти.

 Г. Лохманжан қизи

 

 

 

Күнтізбе

« Желтоқсан 2018 »
Дс Сс Ср Бс Жм Сб Жк
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

booked.net