Мәрипәтчиләргә беғишланған фестиваль яш әвлатни илһамландурди

Дөләт рәһбири Нурсултан Назарбаевниң « Келәчәккә нишан : мәнивий йеңилиниш» намлиқ  программилиқ  мақалиси вә « IV санаәт инқилави шараитидики  тәрәққиятниң йеңи имканийәтлири» Мәктүби даирисидә Панфилов наһийәсидә көрнәклик  язғучи Жамалидин Босақовниң 100 жиллиқ тәвәллуди , ғәзәлхан шаир Хелил һәмраевниң туғулғининиң 90 жиллиғи вә  Қазақстан маарип әлачиси  Айимбүви Хизмәтованиң хатирисигә  беғишланған « Өсәк  бойида Яркәнт» фестивали болуп өтти. Жумһурийәтлик « Уйғур мәктивини қоллаш» жәмийәтлик фондиниң тәшәббуси, Панфилов наһийәлик Уйғур этномәдәнийәт мәркизиниң уюштуруши һәм наһийәлик билим бөлүминиң қоллап –қувәтлиши билән  өткән  фестивальда  икки күн  давамида     наһийәдики уйғур тиллиқ 13 мәктәптин 140 оқуғучи бәш номинация бойичә  күч синашти.

 

         Тәкитләш керәкки, билим фестивали  Яркәнт шәһиридики Хелил Һәмраев намидики уйғур оттура мәктивидә болуп өтти.  Фестивальниң биринчи  күни йәни 5- апрель күни оқуғучилар  «Билим» номинацияси бойичә математикидин тест синиғи,  ижадий байқаш   «Эссе», « Шеир» номнациялири бойичә     күч синашти.

 Иккинчи күни  йәни 6- апрель    «Тәсвирий сәнъәт» «Қол һүнәрвәнчилиги»номинациялири бойичә   рәсим вә қол һүнәрвәнчилиги нәмунилиридин рәсим вә әмгәк пәнлири муәллимлири  билән оқуғучиларниң ижадийити баһаланди.  Фестивальға   жирақ-йеқиндин қәдәм тәшрип қилған  меһманлар көргәзмини  зиярәт қилғандин кейин фестиваль рәсмий башланди дәп елан қилинди. Дөләт Гимни орунланғандин кейин  мәзкүр мәктәпниң муәллимлири Нариман Әзизов билән Меһрибанум Амансопиева риясәтчиләр  дөләт вә уйғур тиллирида   фестивальниң мәхситигә тохтилип, меһманлар билән тонуштурди. Андин  Жамалдин Босақов, Хелил һәмраев вә Айимбүви Хизмәтованиң   тәржимә һали ижадий паалийитигә алаһидә тохталди.   

    Фестивальда дәсләп  сөзгә чиққан «Уйғур мәктивини қоллаш» жәмийәтлик фонди рәисиниң орунбасари Музәппәр Зайитов  чариниң Қазақстан Жумһурийитиниң Президенти Нурсултан Назарбаевниң «Келәчәккә нишан: мәнивий йеңилиниш» мақалисидики    миллий вә мәнивий йеңилиниш  йолида хәлиқләрниң  тилини, тарихини,  маарипини, мәдәнийитини  тәрәққий әткүзүш охшаш көрсәтмиләрни орунлаш мәхситидә әдипләрниң тәвәллуди мунасивити билән  мәрһумларниң ана жутида  уюштуруливатқанлиғини тәкитләп, қатнашқучиларға ижадий утуқлар тилиди. Шуниңдин кейин наһийәлик билим бөлүминиң  методисти Улбала Орманбекова      пешқәдәм мәрипәтчиләрниң  Қазақстанниң маарип саһасидики тутқан орнини ,  әвлатларға қалдурған өчмәс изини пәхирлиниш ичрә тилға алди.  Наһийәдики 45 оттура вә 5 башланғуч мәктәпләрдә пешқәдәм мәрипәтчиләргә беғишланған  онкүнлүкләр билән пән олимпиадилири, мушаирә, хатирә кәчлириниң уюштуруливатқанлиғини мәмнунийәт билән тәкитлиди. Көпмилләтлик тәвә  хәлқи улуқ намайәндиләрниң исимлирини әбәдийләштүрүштики  бу хилдики чариләргә паал қатинишватқанлиғини тәкитләп,  тәрбийәвий  әһмийити чоң чариниң  әнъәнилик түрдә давамлаштуруш тилигини изһар қилди.

        Павлодар  уйғур этномәдәнийәт мәркизиниң рәиси Арсен Турдиев,  Алмута шәһәрлик уйғур этномәдәнийәт мәркизи рәисиниң орунбасари Маһинур Исрайилова,  АЗМК ижраий  мудири Мурат Хизмәтов, Панфилов наһийәсиниң пәхрий гражданлири Әхмәтжан Надиров,Турсун Семәтов  билән Шерипидин Рәхмидинов  мубарәк исимлири тилға елиниватқан әдипләр билән өткүзгән ғенимәт   чағлирини иптиһарлиниш вә пәхирлиниш билән тилға елип, яшларни билим елишқа, издинишкә, бош вақтини бәдиий әсәрләрни  оқушқа чақирди. Натиқлар  фестиваль уюштуруш тәшәббускарлири   филология пәнлириниң доктори Алимжан Тиливалди билән пешқәдәм устаз Музәппәр Зайитовқа, наһийәлик билим бөлүмигә  сәмимий миннәтдарлиғини изһар қилди.

  Андин көпчиликниң диққитигә Хелил һәмраев  намидики  уйғур оттура мәктивиниң муәллимлири билән оқуғучилири тәрипидин тәйярланған концертлиқ программа намайиш қилинди.  Мәктәп оқуғучилири бу күни мәктәп сәһнисигә елип чиққан  Жамалидин Босақовниң қәлимигә мәнсүп «Ялқун» повестидин сәһниләштүргән қоюлум көпчиликниң көңлидин чиқип, көзләрдин яш аққузди . Чүнки  техи мәктәп оқуғучилири болушиға қаримай  Өмәр Муһәммәдийниң  һаятиниң ахирқи дәқиқилирини  кәспий сәнъәткарлардәк   маһирлиқ билән сәһниләштүргән, болупму Өмәр обризини яратқан Азат Мәшрәповниң маһаритини  һәммә узақ алқишлиди.

        Тәбрик сөзләрдин кейин   фестиваль йәкүни чиқирилип, бәш номинация бойичә мукапатлар тапшурулди. Һәр бир номинациядә алтә  мукапат болғанлиқтин биз  пәқәт биринчи мукапатлиқ орунларға еришкәнләрниң исим нәсибини аташни тоғра  көрдуқ.

      Шундақ қилип   « Билим» номинацияси йәни 10-11- синип оқуғучилири арисидики  математика пәнидин тест синиғи бойичә  биринчи орунға  Ават оттура мәктивини оқуғучиси   Назугум Турсунова, «Эссе» номинациясидә  биринчи орунға  Дехан Ғәйрәт оттура мәктивиниң  оқуғучиси   Гүлфиза Йүсүпова  , « Шеир» номинацияси бойичә өз ижадидин һәр икки  әдипкә   шеир  ижат қилишта биринчиликни Чоң Чиған оттура мәктивиниң оқуғучиси Рамиләм Турсунова, «Тәсвирий сәнъәт» номинацияси бойичә  биринчиликни Хелил Һәмраев намидики оттура  мәктәпниң оқуғучиси Камиләм Мәшүрова, «Қол һүнәрвәнчилиги»  бойичә  Чоң Чиған оттура мәктивиниң оқуғучиси  Камиләм Кәримжанова биринчи орунға мунасип дәп баһалинип, мәхсус диплом билән  вә маддий рәғбәтләндүрүлди. Шуниму тәкитләш керәкки һәр бир номинациядә биринчи, иккинчи , үчинчи орунлар билән рәғбәтләнлүрүш мукапатлириму  тапшурулди.

      Фестиваль қатнашқучилириға  регионаллиқ мәшрәп әһли намидин Долқун Розиев, Панфилов наһийәлик уйғур мәдәнийәт мәркизи рәисиниң орунбасари  Абдусалам Алиев вә ханим-қизлар кеңишиниң рәиси  Маһинур Аюпова билән Қазақстан Рәссамлар иттипақиниң әзаси Әхмәт Әһәт , «Азия бүгүн» гезитиниң  муһәррири  Ташгүл һезиярова, Алмута шәһәрлик уйғур этномәдәнийәт мәркизи рәисиниң орунбасари Маһинур Исрайилова билән   Жамалидин Босақов, Хелил һәмраев, Айим Хизмәтовалар аилилири намидин мукапатлар тапшурулди.

       Фестиваль давамида  филология пәнлириниң доктори Алимжан Тиливалди    Яркәнт тәвәсидә икки күн мабайнида  паал  қатнашқан муәллимләр билән оқуғучиларни,  жирақ-йеқиндин қәдәм тәшрип қилған  миллий маарип, мәдәнийитимизниң жанкөйәрлиригә, қоллап-қувәтлигән сехи қоллуқ инсанларға миннәтдарлиғини изһар қилди.  Павлодардин әттәйләп мошу чаригә қатнишивақан  Арсен Турдиев болса  Павлодар вилайәтлик уйғур этномәдәнийәт мәркизи тәсис қилған медали билән  Хелил һәмраев намидики оттура  мәктивиниң   мудири  Зульфийәм Мәшүровани мукапатлиди.        Шундақла «Бейбітшілік әлемі» хәлиқара қазақ ижаткарлар бирләшмисиниң вице президенти  Турсун Розиев  «Бейбітшілік әлемі» медали билән  мәзкүр мәктәпниң пешқәдәм устази Сүбһидин Мәңсүров билән мәктәп мудириниң орунбасарлири Бәхитжан Розиев билән Кларәм Қасимоваларни мукапатлиди.

   Шуниңдин кейин  риясәтчиләрниң  тәкливи билән сәһнигә  көтирилгән мәзкүр фестивальниң әң яш меһмини Уйғур наһийәси Кичик Ақсу оттура мәктивиниң 3-синип оқуғучиси  Радмина  Тохтахунова  пешқәдәм  мәрипәтчиләргә беғишлап өзи ижат қилған шеирлирини ипадилик оқуп бәрди.    Көпчиликниң роһини көтәргән яш талант егиси тәрәп-тәрәптин «Яшап кетиң Радмина!» дегән алқишларға егә болди. 

   Өз новитидә сөзгә чиққан фестиваль меһманлири «Мектеп»нәшрияти уйғур редакциясиниң башлиғи Рәхмәтжан Ғожәмбәрдиев  миллий мәктәпләрдики дәрисликләргә буйрутма бериш һәққидә тәклиплири  билән  ортақлашса,  филология пәнлириниң намзити жумһурийәтлик «Уйғур авази» гезитиниң мухбири Шәмшидин Аюпов   пешқәдәм мәрипәттчиләрниң хатирисигә уюштуруливатқан чариләрниң әһмийитиниң зор екәнлигигә тохталди. Бизму барлиқ фестиваль ғалиплирини тәбрикләймиз.

Гөһәрбүви

  Исмайилжанова.

Күнтізбе

« Маусым 2018 »
Дс Сс Ср Бс Жм Сб Жк
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

booked.net