«Яркәнт төмүр бетон» заводидики бир күн

«Яркәнт төмүр  бетон заводи» һәққидә көптин бери аңлап жүрсәкму, амма  уларниң иш паалийити билән йеқиндин тонушуш пурсити болмиған еди. «Миң аңлиғандин бир көргән әла»  демәкчи  бу қетим йолумиз чүшүп, шәһәрниң төвәнки қисмиға жайлашқан  мәзкүр заводқа кәлдуқ.   Жавапкәрлиги чәкләнгән йолдашлиқниң тәсисчилири Турған Зайитов билән Әхмәтжан Һаширов иш орнида екән.  Һәр иккилиси аддий шуниң билән ишбиләрмән жигитләрдин болғачқа, бөлмисидә олтиривелип, «әвуни йезиң,  монуни йезиң» дәп буйруқвазлиққа берилмәй, заводни арилап сөһбәтлишәйли деди.

Адәттики иш күни болғачқа бетон вә улар ишләп чиқириватқан  бетон мәһсулатларға  буйрутма бәргүчиләр көп екән.  Әхмәтжан Һаширов   буйрутмиларни қобул қилиш  билән бәнт болдидә, биз Турғанжан Зайитов билән заводни арилап   чиқишқа келиштуқ.   Растимни ейтсам тәвәдики  «Яркәнт крахмал ширнә» заводини һесаплимиғанда мундақ чоң  ишләп чиқириш жәриянини  елип бериливатқан  заводни  көз алдимға  кәлтүрмигән екәнмән.  

          Заманивий  завод

         Заводта иш қайнаватқан мәзгил екән.     Бәәйни чоң шәһәрләрдики заводларни әсләтти. Һәр ким өз иши билән бәнт. Бирдин  байқиғиним ишчилар пәқәт яшлар екән.  Бетондин ишләп чиқирилған қудуқлар тәйяр болуп лентилардин чүшиватиду. Бир йәрдә бетон кесәкләр, плитилар  қуюливатиду. Тизилип турған  тәйяр мәһсулатлар херидарлириға  мәхсус машиниларда , кранларда бесиливатиду. Әйтәвир иш қайнап турған екән.

  - Завод төмүр бетон мәһсулатлириниң һәммә түрини  ишләп чиқириш қувитигә егә . Атап ейтсақ биринчи болуп қолға алғинимиз товарлиқ бетон чиқириш еди. Бу ишимиз оңушлуқ жүрүп кәттидә, биз  паалийитимизни  кәңәйттуқ.  Һазир  қудуқлар, (һәр хил һәжимдә) уларниң япқучлири, ериқ нолири, йол нолири,  бордюрлар,  бетон қоршавлар,  сплитерлиқ блоклар, столблар, Нью Джерси( парапетные ограждения ) үлгисидики қалқанлар, бетон кесәкләр, шундақла  плиты перекрытия, щебень ишләп чиқириш бизниң әнчимиздә.  Махтанғинимиз әмәс,  бизниң завод Қазақстанда  дәсләпкиләрдин болуп 10-12 метрлиқ узунлуқтики  линейные  плиты перекрытия  ишләп чиқиришни оңушлуқ әмәлгә ашурдуқ  ,-деди  Турған  Зордун оғли плитиларни көрситип.   Һәптиниң алтә күни мошундақ иш қизийду. Йәкшәнбә дәм алимиз. Яз әмәсму ,шәхсийләр болсун , һөкүмәт тәрипидин болсун  қурулуш ишлири овж еливатқан пәйт болғачқа  шәхсийләрдин, қурулуш компаниялиридин    буйрутмилар көп. Униң үстигә наһийәдики  мәктәп , дохтурхана,  спорт комплекслири вә башқиму  қурулуш ишлирини елип бериватқан қурулуш компаниялири билән һәмкарлиқта иш көрүватимиз. Өткән жилларда Дехан  Ғәйрәт, Хелил Һәмраев   оттура мәктәплири билән  Ават , Төвәнки Пәнжим, Чулуқайда селинған давалаш амбулаториялири , шундақла  бүгүнки күндә  Чоң Чиған йезисида селиниватқан  300 орунлуқ йеңи  мәктәпни мәһсулатлиримиз билән  тәминләватимиз. Шундақ екән ишчилар иш һәққини  әмгигә қарап  өз вақтида алиду.  Көрүп турупсизки  , уйғур, қазақ, рус өзбәк миллитиниң вәкиллири  болуп 60 тин ошуқ адәм иш билән тәминләнди.  Бу елимиз Президенти Нурсултан Назарбаевниң  Мәктүбигә әмәлий жавап десәм ашуруп ейтқанлиқ әмәс. 

 -Сир болмиса шчиларниң иш һәққи  қанчә?,-дәп соридим.

- Әлбәттә сир әмәс. Әмгигигә қарап төлиниду . Ишчилар оттура һесап билән 120-130 миң тәңгә әтрапида мааш еливатиду . Ишчилар демәкчи ,  улар   алий  вә оттура кәспий билимгә егә мутәхәссисләр.  Иш жәрияни толуқ автоматлаштурулған. Әнди заводта 20 дин ошуқ  һәр хил маркилиқ  техникилар бар. Шоферларниңму әмгәк һәққи 90-100 миң тәңгә .  Ишчилар һәққидә гәп қилип қалдуқ,   Қәдирдан Азнибақиев,  Шаһидин Қасимов,   Қудрәт Мөмүнов, Жандос Раймбеков, Зулияр Рахманов, Ялқун Сейтәков,  Бәхнияз Худайқулов кәби жигитләр  өзлиригә жүкләнгән вәзипә һөддисидин шәрәп билән чиқип,  башқиларға үлгә болуватқанлиғини  тәкитлигүмиз келиду. Новити кәлгәндә шуни тәкитләш керәкки, завод мәмүрийити тәрипидин  уларниң билимини йәниму  мукәмәлләштүрүшкә  көңүл бөлүниватиду. 

                   саһа   лидери

    Мәзкүр  заводниң қол йәткүзиватқан утуқлиридин сориғинимизда  Турғанжан  Зордун  оғли :

   - Һәр бир ишләнгән мәһсулатимиз  херидарниң көңлидин чиқиватса биз уни чоң мукапат  дәп билимиз. Чүнки сани әмәс, сапаси  муһим болуватқан бу саһада риқабәтчиләрму йоқ әмәс,-деди . Биз соалимизға  болса завод идарисидиниң темиға идитлиқ илинған  мукапатларни көздин кәчүргәч , жавап таптуқ.   Жигирмә жилдин бу ян паалийәт елип бериватқан завод наһийә, вилайәт рәһбәрлириниң, « Нур Отан» партиясиниң  пәхрий ярлиқлири вә тәшәккүрнамилири билән мукапатлинипту.   Әнди завод рәһбәрлиридин   Әхмәтжан Һаширов  Қазақстан Жумһурийити Мустәқиллигиниң 25 жиллиқ медали билән, Конституцияниң  20 жиллиғи  һәм шундақла   2017- жили  елимиз Президенти Нурсултан Назарбаевниң  Тәшәккүрнамиси,  Турғанжан Зайитов болса  Бизнес рейтингиси бойичә «Лидер отрасли» ордени билән , Жумһурийәтлик Уйғур этномәдәнийәт мәркизи тәсис илған «Сахавәт» медали билән мукапатланғанлиғидин зоқландуқ . 

      З,5 гектар мәйдандики  йеңи завод

 Бизни  Турғанжан  Зордун оғли   заводниң йәнә бир бенасиға елип баридиғанлиғидин агаһландурди.

 - Ишләп чиқириш жәриянини пәйдин –пәй, қәдәмму-қәдәм   кәңәйтип, мәһсулатлиримизниң түрини һәм  миқдарини  көпәйтишкә  тоғра кәлди. Илгәрки завод бенаси  тар  болди. Қисқиси йәнә бир заманивий завод селишни нийәт қилдуқ. Наһийәлик һакимийәтниң қоллап-қувәтлиши билән  3,5 гектар йәр бөлүнүп берилдидә, биз йеңи завод қурулушини қолға алған едуқ. Көрүп турупсиз,  пат йеқинда уни пайдилинишқа беримиз , -деди, йеңи үлгидики илғар технологиялар билән жабдуқланған заводни арилаветип.

     Йеңи заводниң һойлисидики  гүлзарлиқларда ечилип турған   рәңму рәң гүлләр билән , йеңидин тикилгән мевиләр көчәтлири бирдин көзгә челиқиду. Кәң таша һойлисида  жүк машиниларда қум  шехил кәлтүриливетипту. Завод толуғи билән ишқа  тәйяр екән. 

  Завод паалийити һәққидә мақалимизға мошу йәрдә чекит қойсақму болатти.  Лекин  икки тәдбирчан тижарәтчиниң миллий мәдәнийитимизниң жанкөйәрлириниң  хәйри-еһсанлиқ ишлиридин толуқ вақип қилмиған болумиз.  Шуниң үчүнму  бу һәқтә  тохтилип өтүшни тоғра көрдуқ.

        Сахавәтлик   жигитләр 

   Әхмәтжан билән Турғанжанни яркәнтликләр шундақ атишиду. Ундақ дейишимизгә толуқ асас бар. Шәхсән өзәм   бу икки тәдбирчан тижарәтчиниң спорт саһасида жүргән қара көзлиримизниң жумһурийәтлик вә хәлиқара турнирларға  һамийлиқ қиливатқанлиғидин хәвирим бар еди. Сөзүмиз қуруқ болмаслиғи үчүн Яркәнттики Джиу Джитсу спорт клуби әзалириниң Абу Дабида өткән  дуния чемпионатиға берип келиши, йол һәққи тамиғини тәминлигәнлигини  билимән. Өз новитидә  у чемпионаттин Ильшат Һосманов    ғалип чиқип ,  уларниң үмүтини  ақлиди. Әнди наһийә яшлиридин тәшкил қилинған «Арзу» футбол командиси әзалириниңму һәр хил  турнирларға  қатнишиши, мәхсус спорт кийим кечәклири билән тәминләватқан йәнә  шу тижарәтчиләр. Тапқининиң мәлум қисмини  һажәтмәнләргә  сәрип қилишни  пәрзи дәп билгән улар   наһийәдики  мечитларға, тәминати начар, көпбалилиқ аилиләргә, миллий мәктәпләрдики  әлачи оқуғучиларға,  жумһурийәтлик «Мәктәпкә йол» акциясидә оқуғучиларға халисанә ярдимини көрситип келиватиду. Униңдин сирт наһийәлик Уйғур этномәдәнийәт мәркизи тәрипидин уюштуруливатқан чарә-тәдбирләрму уларсиз өтмәйду. Әнди наһийәлик Уйғур этномәдәнийәт мәркизи бенасини селиш қолға елинғанда дәсләпкиләрдин болуп халисанә ярдимини көрсәткән  йәнә шулар .

 Биз  ишәшлик шерикләр     

  Биз заводларни арилап кәлгичә Әхмәтжан ака йәнә буйрутмиларни қобул қиливетипту. 

   Иккиси  режә-мәхсәтлири һәққидә  сөһбәтләшмәктә.

 20 жил бир мәхсәттә , бир  нийәттә бир-биригә қериндашлардәк яки уруқ туққандәк ишәнчә болғандила  һәм тижарәтни , һәм кәң даирилик  хәйрихаһлиқ паалийәтни биллә әмәлгә ашурушқа болидиғанлиғини нәзәргә тутқан һалда  бу икки тижарәтчини  бәлки қериндашту,  яки  уруқ-туққан , дост ,синипдаш, қаяшту дәп ойлидим  һәм ,  силәр қериндашларму, -дәп соридим.

Һәр иккилиси :- Биз ишәшлик шерикләр,- деди тәңла. Адәмләрдики бир-биригә болған ишәнчә, меһриванлиқ сезимлири йетишмәйватқан    бу заманда мениң уларға болған һөрмитим техиму  ешип кәтти.

   Уқушсам Әхмәтжан һашировниң рәпиқиси Гүлбанумму тижарәтчи екән. Улар үч пәрзәнт тепип, алий билим елишиға зәмин яритиватқан  ибрәтлик аилә егилири екән. Турғанжанниң рәпиқиси Шадийәм  кәспи бойичә технолог – кондитер. Улар төрт пәрзәнт тәрбийиләветипту.  Пәрзәнтлириниң чоңи Наргиза Билал Назим намидики уйғур оттура мәктивини Алтун бәлгүгә тамамлап , Алмутидики Асфендияров намидики медицина университитини тамамлап, резидентурида тәһсил көрүватса, оғли  Назим Чехословакияда алий билим еливетипту.  Патигүл билән кәнжиси  Билал мәктәп оқуғучилири.

  Төмүр бетондин әң сүпәтлик мәһсулат тәйярлап,наһийәдила әмәс, вилайәт даирисидә тонулған ишбиләрмән рәһбәрләргә  ,  миллий мәдәнийитимизниң жанкөйәрлириниң   иш-паалийитигә йәниму  утуқ тиләп хошлаштуқ.

   Гөһәрбүви  Исмайилжанова.

 

алғысқа  лайық

Күнтізбе

« Тамыз 2018 »
Дс Сс Ср Бс Жм Сб Жк
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

booked.net