Жутимизниң инавәтлик аниси

16.04.2021ж

Жутимизда көпни көргән, бешидин исиқ- соғни өткүзгән , мәзмунлуқ һаят кәчүрүп, бизгә вә кәлгүси   әвлатқа үлгә болғидәк  из қалдуриватқан  анилар  аз әмәс. Шуларниң  қатарида биз  дәсләпкиләрдин болуп Зиләйхан  Һашимовани тилға алимиз. Чүнки анимиз  барлиқ аңлиқ һаятини   жутиниң ижтимаий - ихтисадий саһасини тәрәққий әттүрүшкә сәрип қилди. 

   Шуниң билән биллә арқа сәптә жасарәтлик әмгәк әткәнләрниң  бири . Биз мәһәллә турғунлири  пат –пат униң йенидин тепилип, һаятидики  дәқиқилиридин       тиңшап һармаймиз .  Бу қетим биз билән сизму биллә барсиңиз ,- дәп илтимас қилди  Яркәнт шәһириниң жигитбеши Қәһриман Хизмәтов.

   Жигитбеши Қәһриман билән аниниң қутлуқ өйгә барғинимизда   һәқиқәтәнму   аниниң өйидә  Һакимжан,  Радик охшаш хошнилири бар екән . Зиләйхан ана  уларни  өз пәрзәнтлири  билән тәң көрүп,  буларму  мениң балилирим дәп     тонуштурди. Ана уларға бешидин өткүзгән  кәчмишлиридин  һекайиләветипту.

 Әсли теги -тәкти Уйғур наһийәсидә моздуз аилисидә   дунияға кәлгән  Зиләйхан Һашимова  балилиқ чағлирини  мундақ әслиди.

  -Бизниң   балилиқ дәвримиз   қенипқинә   балиларчә  ойнап  күлүп,   хошал- хорам өтмиди  десәмму болиду . Чүнки биз қурамлиқлар  уруш жилиниң балилири  болғачқа ата-анимизға әркиләшниң орниға уларниң мәйүс чирайиға тәлмүрүп чоң болдуқ.   Оғул балилар  ошуқ,  биз қизлар болса  қочақ, ағчайлам ойнашниң орниға етизлиқта мома-бовилиримиз, анилиримизниң йенида  чамимиз йетишичә  ярдәмләштуқ.  Яш улғайғансири  толирақ балилиғиңиз, яшлиғиңиз әскә чүшидикән.  Нәврә- чәврилиримдәк  йешимда  йәни    бари-йоқи 5-6 йешимда   Чоңжида етиз-ериқта жүргинимни  әсләймән.  У жиллири  Чонжида көктат терилип,  қизилча, кава жиғиштурушта күчимиз  йетишичә  ишлидуқ . Кава  жиғиштурушта   биз охшаш  балилар   чаққан,  әплик едуқ.  Биз уни  жиғиштуримиз,  ат-һарвуларға  бесип беримиз.  Һазир ойлисам буму чоң ярдәм екән, балам,- дедидә ана бир пәс тиңирқап қалди. 

     Зиләйханниң кейинки  һаяти Яркәнт тәвәсидә өтти.   Ениғарақ ейтқанда     аписи Анастасия Семен қизи аилиси билән билән Яркәнт тәвәсигә көчүп келип Дмитров (һазирқи  Дехан  Ғәйрәт ) йезисиға орунлишиду . З. Һашимова Яркәнт шәһиридики  Луначарский намидики мәктәптә кирип  оқуди.  Идрәклик  Зиләйхан мәктәптә пәқәт әла баһаларға оқуди. Болупму математика пәнигә болған қизиқишиниң үстүнлигини байқиған устазлири   келәчигигә  үмүт билән қариди. У жиллири тәвәдики  Красный Восток артелида  алтә айлиқ бухғалтерарни  тәйярлайдиған  курс можут еди. Әйнә шу курста  оқуп, қолиға  буғалтер дегән гуванамә  билән  Яркәнт  шәһиридики  мәиший  хизмәт  көрситиш комбинатиға  ишқа орунлашти.  Шу шу болдидә   у бу йәрдә 38 жил ишләп һөрмәтлик  дәм елишқа чиққичә әмгәк әтти. Арилиқта ихтисатчиларни  тәйярлайдиған мәхсус алий  курсларда билимини  мукәмәлләштүргән З. Һашимова 1982- жилдин  башлап  мәзкүр комбинатта  ихтисатчи  болуп ишлигәнлиги  униң  бир орунда  өз ишиға чоң жавапкәрчилиги билән  әстаидил  берилгәнлигидин  дәп баһалаш орунлуқ болса керәк .  Чүнки  яркәнликләрниң ядида  болса у жиллири мәзкүр мәиший хизмәт көрситиш комбинати наһийәдики  әң чоң мәһкимиләрдин  болуши  билән  хизмәт көрситиш даириси  жилдин -жилға  кәңәйди.   Тәкитләш керәкки,  дәсләп кийим-кечәкни  буйрутма бериш арқилиқ  тикиш қолға елиниведи ,  сатрашхана,  моздузхана,  саат ясаш охшаш  һәр хил хизмәт көрситиш   пәқәт мәзкүр  комбинат тәрипидин  әмәлгә ашурилатти.

    Шундақ қилип Алмута вилайәтлик   мәиший хизмәт көрситиш комбинатиниң  Яркәнттики  шөбисидә  у жиллири  ишчилар сани 100 дин ашти .

  -Мәзкүр комбинатқа узун жиллар давамида  Галина Катаева  рәһбәрлик қилди.  Шу дәвирниң тили билән ейтқанда бизгә вилайәттин мәжбурийәт бериләтти. Мана шу мәжбурийәтни бизниң  шөбә һәр қачанла йүз пайиз орунлаттуқ . Шуниң үчүнму бир  нәччә қетим  илғар комбинат дегән намни қолдин  бәрмидуқ. Болупму кийим  үлгилирини   пичишта  ханим-қизлиримиз устилиқ билән  пичип тикәтти. Шуңа бәзидә Алмута, Талдиқорғанлардинму  бизгә мәхсус буйрутмилар   келәтти. Мана шу жилири биллә ишлигән  Жанархан Ниязова, Турсунай  Мәрүпова,  Мәрияш  Сарикова, Росхан Қадирова қатарлиқ ишдашлар баш қошуп туримиз. Кәлмәскә кәткән чағлиримизни  әсләп гемиз түгимәйду , -дәйду у жилларни  әсләп.

  Зиләйхан ана Яркәнтлик  Пәйзулла  Һашимов  билән 1959- жили аилә қуруп, үч пәрзәнт сөйди.  Мәрһум Пәйзула атини яркәнтликләр  убдан тонуйдиған. Мәкүр комбинатта  столяр  болуп ишлигән у кейинәрәк  Кербулақ жиһаз  яғашчилиқ фабрикисиниң  Яркәнттики   шөбисигә рәһбәрлик қилди.Үч пәрзәндини заманға лайиқ оқутуп қатарға қошти. Оғли Рәшит   һәрбий  саһада чегаричи болуп  хизмәт қилип, һазир истипаға чиқса, қизлири Светлана билән  Фарида  кәспи бойичә  муәллимләр . Пәрзәнтлиридин  9 нәврә 14 чәврә сөйди. 

    З. Һашимова сөһбәт ара мәйдисидики  медальларни көрситип, Улуқ Ғалибийәтниң 75 жилиғидиик медалиға кәлгәндә:

  -Бу мениң үчүн әң әтивалиқ  медаль. Чүнки  атам елимизни   немис басқунчилиридин  азат қилиш  үчүн бәш жил Сталинград, Волгоград охшаш шәһәрләрни азат қилиш үчүн күрәшти. Мана шу атам Ғалибийәт билән  қайтқинида   қарши  алған күнүмни  тәсвирләш  үчүн  тилим  ажизлиқ қилиду.   Дмитровтин  Яркәнткә  берип  қарши елиш үчүн барай десәм учамға  кийидиған түзүккинә пүтүн  кийимим йоқ.   У заманниң адәмлири немә дегән меһриван дәймән. Хошнимизниң  қизиниң марлидин тиккән көйнигини  кийип,  пиядә  берип қарши  алған күнүм  худди түнөгүн  йүз бәргәндәк    есимда. Қосиғимиз  бир  күн, ач бир күн тоқ, кийимлиримиз  жулум -жулум еди.  Мана  шу1945-жили   Ғалибийәттин кейинла қосақ тойди, кийим  дегәнғу  тепилидикән.  Шуңа  Ғалибийәтниң 60-70-75 жиллиқ тәвәлуддуқ медальлирини  көз қарчуғумдәк сақлап, бүгүнки  әвлатқа биз көргән күнләрни ейтип беримән. Бүгүнки  әвлат  мундақ әслимиләрни биз охшашлардин аңлиса аңлисункин, милтиқниң үнини аңлимисун,-дәйду. 

        Гепимиз Яркәнт шәһири, жигитбашлири, миллий маарип, мәдәнийәт мәтбуатқа  кәлгәндә  Зиләйхан ана :    

    -Қизим  мәһәллимизниң  жигитбеши  Қәһриман  тәдбирчан  жигит. Биз охшаш  яшанғанларниң көңлини  елиш билән яшларға үлгә болғидәк ишларни елип  бериватиду. Болупму  муштири топлаш вақтида өй көрмәй жут арилайду. Шуниң  ақиветидин   бу жили  бизниң мәһәллимиздики  60 аилидин 42 си «Уйғур авазиға» йезилди. Ундақ болғини  әзәлдин достлуғи ярашқан  бу жутта башқа милләт вәкиллириму  бар . Пат-патла баш қошушларни  уюштуриду . Ундақ чағларда мәнму қалмаймән. Гезит- журналларға  йезилишқа, келәчәк  егилири болған яшларни елимизниң вәтәнпәрвәрлиридин болуп  йетилишидә тәрибийиләшкә    мәнму икки еғиз  гепимни қилимән,-деди .

  «Һиммити барниң иззити бар» дегини мошу охшайду.  Өз новитидә  жигитбеши вә мәһәллә турғунлири анини мәйрәмләрдә тәбрикләп гүлдәстилирини тутуп:

  - Бар  болуң, ана!- дәп тиләклирини ейтиду. Анилар  аман болсун!

Гөһәрбүви 

Исмайилжанова.

Күнтізбе

« Желтоқсан 2021 »
Дс Сс Ср Бс Жм Сб Жк
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

booked.net

  • Материалды қарау саны : 2187808