Яшларниң нәмунилик ишлири

Панфилов наһийәлик уйғур этномәдәнийәт мәркизи йенида ақсақаллар,  ханим-қизлар ,жигит башлири, спорт, маарип, тижарәтчиләр вә башқиму кеңәшләр паалийәт елип бериватиду.

     Жут әһлини сәпәрвәрликкә  кәлтүрүп, миллий мәдәнийитимизни тәрәққий  әттүрүш мәхситидә чоң режиләрни күн тәртивигә қоюватқан  кеңәш әзалири     бу қетим Яркәнт шәһиридики «Азия» кафесида  баш қошти.

     Тәркивидә жумһурийәтлик «Инайәт»  ассоциациясиниң рәиси хизмитини елип бериватқан жутдишимиз Сүлһи Мәшрәпов,  Яркәнт гуманитарлиқ техникилиқ колледжиниң  оқутқучилири Низамдун  Давутов билән  Молутжан Тохтахунов,  Крупская намидики мәктәпниң муәлими Назим Шарипов,  сәнъәткар Алимжан Ниязов билән тижарәтчи Алимжан  Сулайманов      охшаш тәдбирчан яшларниң тәшәббускарлиғида   өткән кәчкә    пешқәдәм устазлар,    миллий мәдәнийитимиз билән маарип, мәтбуатимизниң  жанкөйәрлири тәклип қилинди. Мол йейилған дәстихан әтрапида саз-нәғмә билән башланған  чаригә    шаир һәм уйғур тили вә әдәбияти пәниниң муәллими Молутжан Тохтахунов риясәтчилик қилди.

    Дәсләп  чариниң  уюштурғучилири  өзлириниң  елип бериватқан иш-паалийити вә келәчәктә әмәлгә ашурулидиған лайиһә - режилири билән тонуштурди.   Ейтайлуқ Сүлһи Мәшрәповниң тәкитлишичә   бу  яшлар   наһийәниң ижтимаий- ихтисадий тәрәққиятиға өзлириниң бир кишилик һәссисини қошуш мәхситидә бирлишип, һәмкарлиқта ишларни башлап кәткән.

   -     Наһийә мәктәплиридә өйдин оқутиливақан мүмкинчилиги чәкләнгән әлликтин ошуқ оқуғучиниң бешини қошуп,  Жамбул намидик оттура  мәктәптә  шундақла «Панфилов житим балилар өйидә» қириқ  балиға Йеңи жиллиқ арча мәйримини  уюштуруп, соғилар тәғдим қилип, көңлини көтириштин  башланған  хәйрихаһлиқ  чарилиримиз йәниму давамлишиду.   Пат йеқинда биз   Абләһәт Камалов билән Рисаләт Кәримова вә Н Кәриминиң  «Оттуз оғул ижтимаий институти: тарих вә бүгүн» намлиқ китавини тонуштурушмақчимиз. Бүгүн  болса миллий мәдәнийитимизниң  жанкөйәрлиригә  һөрмәт  билдүрүш  мәхситидә бу чаригә тәклип  қилдуқ.

      Тәкитләш керәкки,  елимиз Президенти Нурсултан Назарбаевниң һәр жили қазақстанлиқларға  йоллаватқан мәктүбидики  алға сүриливатқан көрсәтмә, тапшурмиларни әмәлгә ашуруш  мәхситидә нурғунлиған  ишларни  режиләватимиз. Шуларниң бири «Туған жер» лайиһиси бойичә   тижарәтчи , тәдбирчан жутдашлиримиз билән  Веливай  клубини  тәшкил қилип, һәмкарлиқта иш елип бериш ,-деди . Шуниңдин  кейин  наһийәлик уйғур этномәдәнийәт мәркизиниң  рәиси Дилшат Насиров, ақсақаллар кеңишиниң рәиси Шерип Рәхмидинов, жигитбашлири намидин Азат   Гайитов, пешқәдәм устазлар Асийәм Өмәрбақиева, Яқупжан Абдуқадиров, тижарәтчиләр  Сүрийәм Һезимова, Турғанжан Зайитов,  Хелил һәмраев намидики мәктәпниң мудири Зульфийәм Мәшүрова, Крупская мәктивиниң мудири Зенәтгүл Ниязова  вә башқилар сөзгә чиқип, яшларниң нәмунилик ишлиридин миннәтдарлиғини билдүрүп, уларни  қоллап-қувәтләшкә дайим тәйяр екәнлигини билдүрди. 

    Жутимизға  йеңи шеирлири билән тонуливатқан қәләм саһиблири      Шәмсимәһәммәт Ниязов,  Абликим Дамоллаев, Әквәржан Исмайилжанов, Камунар Турсунов өз ижадидин шеирларни оқуп бәрди.   Жумһурийәтлик вә хәлиқара фестиваль- байқашларниң ғалиплири «Саһинур» уссулчилар топи билән  ижрачи Молутжан Тохтахунов , Камунар Турсуновлар нахша-уссуларни  орунлап көпчилик көңлидин чиқти.

                Ахирида  Дилшат Насиров    мошундақ  йеңичә тәлпүнүш билән ишләватқан  яшлиримизни көп болуп  қолап-қувәтләп , пикир  һәм  нийәт бирлиги  билән   ишләш һажәт екәнлигини  билдүрди.                       

                                                                           Г.Исмайилжанова.

Күнтізбе

« Тамыз 2019 »
Дс Сс Ср Бс Жм Сб Жк
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

booked.net