Әрниң нами әл есида

14.02.2020ж

Имәр  Мәрүп оғли  Белалов - Өсәк вадисиниң даңлиқ пәрзәнди, йеза егилиги ишләп чиқиришиниң  маһир тәшкилатчиси. У өзиниң аңлиқ   һаятиниң 32 жилини   илгәрки Калинин намидики колхозниң рәиси болуп,   Қазақстанниң  чегарисидики  йезиларниң ижтимаий-ихтисадий  жәһәттин тәрәққий етип, гүллинишигә зор һәссә қошти. 

Илгәрки СССРниң әң четигә жайлашқан, чегара һесапланған тәркивигә Қорғас, Пәнжим, Төвәнки Пәнжим вә Ават йезилири  киридиған  жутни Қазақстанғила әмәс, бәлки  униң  сиртиғиму  тонутти.  Наһийәдә  йеза егилиги ишләп чиқиришиниң муһим  амиллиридин  болған деханчилиқ вә чарвичилиқ саһалирини тәрәққий әттүрүштә нурғунлиған башланмиларниң тәшәббускари болди.  Икки қетим  Қазақстан Жумһурийити  Алий Кеңишиниң депутати, Ленин , Октябрь Инқилави, «Һөрмәт Бәлгүси» орденлири  вә нурғунлиған  медальлар билән мукапатланғанлиғини тәриплисәк  бу мукапатларниң униң узун жиллиқ әмгәк паалийитигә , егиликни  узақ жиллар башқуруштики  уюштуруш қабилийитигә  берилгәнлигини  тәкитләш  орунлуқ. Шундақ екән   йеқинда  Өсәк мәрданиси Имәр Белаловниң туғулғининиң 95 жиллиғиға  мунасивәтлик   наһийәлик Мәдәнийиәт өйидә хатирә кәч болуп өтти.  Наһийәлик Уйғур этномәдәнйәт мәркизиниң тәшәббуси һәм  уюштуруши ,  наһийәлик  һакимийәтниң қоллап-қувәтлиши билән өткән чаригә  тәвәниң  жут –жамаәтчилиги билән  жирақ- йеқиндин меһманлар қәдәм тәшрип қилди. 

    «Өлүк рази болмай тирик бейимайду» демәкчи,  бу күни  әтигәндә  униң сәпдашлири, уруқ-туққанлири  униң  қәбригә берип дуа тәгбир тилавәт қилди. Андин жирақ- йеқиндин кәлгән меһманлар наһийәлик Мәдәнийәт өйи фойесида уюштурулған йеза егилиги ишләп чиқиришиниң һаяти вә әмгәк паалийитигә беғишлап  иш вә оқуш орунлири тәрпидин уюштурулған  вә қол һүнәрвәнчилиги  нәмунилири  көргәзмисини арилап чиққандин кейин   хатирә  кәч  башланди.

       Дәсләп  Панфилов наһийәси һакиминиң орунбасари Шөһрәт  Қурбанов доклад билән сөзгә чиқип, Имәр Мәрүп оғлиниң тәржимиһали вә әмгәк паалийитигә тәпсилий тохталди. Тәркивигә төрт  йеза киргән  чоң колхозни  үзлүксиз 32 жил башқуруш жәриянидики егилик ихтисади билән мәдәнийитини  тәрәққий  әттүрүштики елип барған ишлириға тохталди.  Шөһрәт  Бурхандин  оғли бу күни  мәрһум Имәр  Белаловниң қизи Халидәмгә,  наһийә һакими Талғат Өмирәлиевниң   тәбригини йәткүзүп, чапан  йепип, һөрмәт билдүрди.  Шундақла  рәис  Имәр Белаловниң тәшәббуси билән тәшкил қилинған, бу жили тәшкил қилинғанлиғиниң  50 жиллиғини  нишанлаватқан  «Шатлиқ» вә  «Туған жер» ансамбльлириниң әзалириға  наһийә һакиминиң һөрмәт грамотилирини тапшурди.

      Мәрасимға тәклип қилинған   Көксу, Панфилов  наһийәлириниң Пәхрий граждани Ғалым Турғанбаев, Социалистик Әмгәк Қәһримани Күләш Айтжанова,  Алмута вилайәтлик йеза егилиги башқармиси башлиғиниң орунбасари   Көйүмчан Өмәров,  пешқәдәм устаз,  Қазақстан маарип әлачиси Мәрүп  Арзиев,  Панфилов наһийәсиниң Пәхрий граждани Галина Молчанова,  жумһурийәтлик Уйғур  этномәдәнийәт  мәркизи йенидики ханим-қизлар  кеңишиниң рәиси  Модәнгүл Жумаева , елимизниң Тунжа Президенти-Елбасы  - Нурсултан Назарбаевниң  «Келәчәккә нишан: мәнивий  йеңилиниш» мақалисидики «Туған жер» лайиһисигә даир туғулуп өскән йериниң, елиниң тәрәққиятиға бир кишилик төһписини қошқан  Яркәнтниң мунәввәр пәрзәнди    билән ишдаш-сәпдаш болған чағлиридики өзлириниң  хатирә әслимилири  билән ортақлашти.

     Әнди  ахирида сөз новитини  алған  хатирә кәчниң тәшәббускари наһийәлик  Уйғур этномәдәнийәт  мәркизиниң  рәиси Ризайдин Әйсаев  рәисниң зор тәшкилий қабилийити, адәмләр билән тил тепишип ишләшни билидиған,  егилик мәрданлириға дайим ғәмхорлуқ көрситишни диққәт нәзәридин чүшәрмәй өткәнлигини   әмәлий мисаллар билән тәкитләп көрсәтти. Жирақ-      йеқиндин қәдәм тәшрип қилған  сәпдашлириға, меһманларға миннәтдарлиғини  изһар қилди.

      Мәрһум  Имәр Белаловниң  қизи Халидәм һәдә аниси Гүли  Белалованиң  бу кәчкә саламәтлигигә бола  қатнишалмайватқанилиғини  тәкитләп,  салимини йәткүзүп,  хатирә кәч қатнашчилириға аилиси намидин  миннәтдарлиғини  изһар қилди.

  Хатирә кәчтә  сөз ара      «Шатлиқ» хәлиқ  ансамблиниң  бүгүнки варислири-Абдулла  Розибақиев намидики мәктәп муәллимлири вә мәдәнийәт хадимлиридин тәркип тапқан  ансамбль әзалири, Амантай Раев  рәһбәрлигидики «Туған жер» ансамблиниң әзалири  , хореограф  Гүлшат Қасимова рәһбәрлигидики «Айжан қиз»  вә  «Саһинур» , «Қәшқәр»  уссул ансамбллири билән  нахшичилар  Абдурешит Һошуров, Эдиге Диханбаев  қазақ – уйғур тиллирида нахша- уссуларни ижра қилип, көпчиликниң көңлидин чиқти.

 Ахирида  Яркәнт  шәһиридики «Асыл Ғасыр»  ресторанида  мәрһумниң роһиға беғишлап нәзир берилди.

           Гөһәрбүви

Исмайилжанова.

Күнтізбе

« Ақпан 2020 »
Дс Сс Ср Бс Жм Сб Жк
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29  

booked.net

  • Материалды қарау саны : 843722