Пәрвазда қанат қеқиватқанлар

21.02.2020ж

Чоң Чиған йезисида   буриңдин 45 жил илгири  илгәрки колхозчи ишчи- деханлардин тәркип тапқан «Пәрваз» ансамбли тәшкил қилинған еди. Аридин шунчә жил өтсиму ансамбль әзалири  өз паалийитини тохтатмай  , техиму  жанландуруп, наһийә, вилайәт, жумһурийәт  сәһнилиридә өз маһаритини  намайиш қилип кәлмәктә. 

Ундақ дейишимиздики  сәвәп   ансамбльниң бәдиий рәһбири Оғләм Тайированиң тәшәббуси, Чоң Чиған йеза округи һакимийитиниң қоллап-қувәтлиши билән йеқинда «Сеғиниш күйлири» намлиқ һесават концерт болуп өтти. Биз үч саатлиқ концерт программиси  давамида буниңға толуқ көз йәткүздуқ.

       Чоң Чиған йезидисида Мәдәнийәт өйи болмиғанлиқтин концерт  йезидики оттура мәктәпниң  мәжлис залида  уюштурулди.  Концерт мәзкүр  ансамбльниң    тәшкил қилишида тәшәббускар болуп,  милий сәнъитимизни  жумһурийәт һәтта чәт әлләргиму тонутқан,  һаяттин бевақит кәткән  ансамбльниң  8 әзасиниң хатирисигә уюштурулди. 

       Концерт башлиништин авал ансамбльниң буниңдин 45 жил илгири вә бүгүнки күнгичә бесип өткән ижадий йоли һәққидә   видеофильм намайиш қилинди. Андин мәрһумлар  ансамбльниң  бәдиий рәһбири   Закиржан Зайиров, сәнъәткарлар Алимжан Нурметов, Турумтай  Нурахметова, Абдувәли Исһақов, Асийәм Һаширова , Разийәм Баратова, Мунаждин Жалаловниң һаяти вә  сәнъәттики қәдәмлири   әкс әткән  слайд  көрситилди. 

  Риясәтчиләр ансамбль әзалири  Тайиржан Һасанов билән Адиләм Нурәхмәтова  көпчиликни  ансамбль  тарихидин тонуштуруп   өктәндин кейин концерт  башланди.

    Бу күни «Пәрвазниң»  әзалири Алимжан Қурбанов , Рошәнгүл Бавдинова, Расул Зайиров, Талипжан  Мухпулов, Зихруллам  Мәһәммәтов,Равиль Һезимов  қазақ-уйғур тиллирида әждатлирижра қилған миллий, заманивий  нахша-сазларни  бабиға  йәткүзүп  ижра қилди. Тонулған хореограф, дәсләпки қәдимини мәзкүр ансамбльдин башлиған  Саһинур Рәхмидинова вә униң шагиртлири  -  уссулчи қизлар  йезиниң асасий турғунлири болған  уйғур - қазақ миллий уссуллирини  жуқури маһарәт билән ижра қилди.

     Концертниң  «Сеғиниш күйлири» дәп атлиши  тәсадипи әмәс.  Бәдиий рәһбәр  Оғләм Тайирова  устазлири,  кәсипдаш ака -һәдилирини  сеғинип, «Сеғиниш йәтти» нахшисини,  ансамбльниң нахшичиси мәрһум Турумтай Нурахметова  ижра қилған «Белжайлау сазы»  кәби вә башқиму нахшиларни  бу күни   Рошәнгүл  Бавдинова билән  Бәкри  Аяулым , Закиржан   акиниң оғли   Расул Зайиров   орунлиғанда  тамашибинниң   көзлиридин  аққан  яшларни сеғиниш сази дәп билдуқ.

       Концерт давамида мәзкүр йеза округиниң һакими Махсат Оспанбеков сөз елип , мәзкүр концертниң  Елимизниң тунжа Президенти – Елбасы  Нурсултан Назарбаевниң «Келәчәккә нишан : мәнивий йеңилиниш» мақалисидики көрсәтмә - вәзипиләргә даир уюштуруливатқанлиғини, «Пәрваз» Хәлиқ  ансамблиниң дәсләпки йетәкчиси- бәдиий  рәһбири,  мәрһум Закиржан Зайиров рәһбәрлигидики    ишчи-дехан әһлиниң сәнъәтхумарлиғини, иштин  һерип кәлгәндә кәчтә йеза клубида жәм болушуп, нахша- саз билән һадуқ чиқирип, миллий сәнъитимизни риважландурушқа қошқан бебаһа һәссисини атап көрсәтти. Бүгүн уларниң  избасарлири  йетилип  чиқип, улар салған  йолда тинмай ,  ижадий  издиниватқан   сәнъәткарларға  ижадий утуқ,  йүксәк  маһарәт тилиди. Мақсат Оспанбеков  жут намидин  Закиржан  Зайировниң  рәпиқиси Туранбүви Тохсуноваға һәм   бүгүнки  концертниң уюштурулишида тәшәббускарлиқ көрситип,  жуқури дәрижидә тәйярлиқ көрүп, көпчиликниң көңлидин чиқиватқан  жутниң қизи – достлуқниң күйчиси,  мәдәнийәт хадими   Оғләм Тайировағиму жут -жамаәтчилик намидин миннәтдарлиғини  изһар  қилип, чапан йепип, һөрмәт билдүрди.

      Шундақла  Панфилов наһийәсиниң  баш  жигитбеши Азат Гайитов, Чоң Чиған жутиниң баш жигитбеши Иминжан Ғожашев,  «Бейбітшілік әлемі»  хәлиқара  қазақ ижадий бирләшмисиниң вәкили Сүбһидин Мәңсүров, Ташмәһәммәт Мәмләков, «Қайнам наваси» ижадий  бирләшмиси  намидин Сулайман  Айдаров вә башқилар сәнъәткарларға миннәтдарлиғини изһар қилип, концертниң  һәртәрәплимә утуқлуқ чиққанлиғини тилға алди.    

      Мошу йәрдә  ансамбльниң 1974- жили тәшкил қилинип, 1982- жили хәлиқ ансамбли дәрижисигә йетишидә  һазирғичә  қолидин  равап , дутарини чүшәрмәй келиватқан сабиқ әзалири  һәм  бүгүнки сәнъәткарларниму  атап өтмәй мүмкин әмәс. Ундақ болуши һазир йетәкчилик қиливатқан   Оғләм Тайированиң шагиртлири кәспий сәнъәткарлар Зихруллам Мәһәммәтов, Асимжан Ибрагимов, Бәхтишат Турсуновқа охшаш 23 нәпәр қиз-жигит ака-һәдилириниң  избасарлири  күндә  мәшиқлиниватиду. Уларниң репертуаридики милий вә заманивий нахша -уссуллар көпчиликниң көңлидин чиқиватиду. Улар әжадатлар  ишиға варислиқ қиливатқанлиғини демисә айлиқ маашму алмайду, та бүгүнгичә   мәхсус штатму берилмиди. Лекин  сәнъәтни чин дилидин сөйгән яшлар келәчәктә ака-һәдилири  охшаш штатлар бөлүнүп, мәдәнийәт өйи селинип, йәниму «Пәрвазни» жанландуруш охшаш  нийәт бирлигиниң  ақиветидин шундақ иш көриватиду.

      Әнди     Оғләм Тайировниң рәһбәрлигидә бу күни  шундақла сәһнидә өзлирини  әркин - азадә һис қилип, саз нәғмиләрни  худди  кәспийләрдәк  музыкилиқ , саватлиқ  ижра қилған  50  нәпәр  ғунчиларға зоқ - һәвәсимиз ашти.  Өзлириниң бой турқи билән тәң саз әсвапларни көтирип, өмәктә  тәйярлиниватқан  шагиртларму бу күни  маһаритини көрситип,   саз-нәғмиләр билән муқам мәшрәплирини ижра қилиғанда залдики тамашибин, Һошшәрә , дәп алқишлиди. 

      Ахирида сөзгә чиққан Оғләм Тайирова бүгүнки концертқа йеқиндин қоллап-қувәтлигән   Чоң Чиған йеза округиниң  һакими Махсат Оспанбековқа, мәдәнийәт хадимлириға, мәктәп мәмурийитигә, концерт сцерарийиини түзүштә  ижадий һәмкарлашқан  Әквәржан Исмайилжанов,  Молутжан Тохтахунов,  Сулайман Айдаров, жут-жамаәтчиликккә миннәтдарлиғини изһар қилип, йенип көрүшкичә аман болайди, деди.

  Биз «Пәрвазда» қанат қеқиватқанларға қарап, келәчәктиму сәнъәтни сөйгән    сәнъәткарларниң          йетилип чиқишиға ишәнчимиз ашти. Илаһим шундақ болғай !

Гөһәрбүви  Исмайилжанова,

Күнтізбе

« Наурыз 2020 »
Дс Сс Ср Бс Жм Сб Жк
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

booked.net

  • Материалды қарау саны : 925009