Мунасиплар мукапатланди

22.01.2021ж

Буниңдин 27 жил бурун Яркәнт шәһиридила әмәс бәлки униң әтрапидики йезилардиму Талдиқорған тикинчилик фабрикиси наһийәлик шөбилири ечилип, кийим-кечәк тикиш филиаллири паалийәт елип барғанлиғи яркәнликләрниң һели ядида.

Чүнки у жиллири 300 дин ошуқ қиз- жуганлар иш билән тәминләнгән еди. Мана шу чағда һәтта тикинчиләрни жай –жайлардин иш орниға тошуйдиған мәхсус автобуслар қатнап, Ават, Көктал йезилири билән Яркәнт шәһиридә ханим-қизлар бу кәсипниң қир -сирини үгинипла қалмай ,башқиларға үгитишкиму лайиқ тәжрибә топлиған еди. Әң муһими шу маһир тикинчиләр қолидин тикилгән оқуғучилар үчүн мәктәп формилири, жакет, брюка вә башқиму кийим -кечәкләр Яркәнт базарлири билән дуканлирида сетилатти. Хәлиққә мәиший хизмәт көрситиш ишлири йолға қоюлуп, сетилиш баһалириму қолйетимлиқ болғанлиғи сир әмәс.
Лекин әшу тохсининчи жиллардики ихтисадий боһран бу иш орунлириниң йепилип қелишиғиму өз тәсирини тәккүзмәй қоймиди. Ақивәттә нурғунлиған тикинчи қиз- жуганлар ишсиз қалди. Мана йеқинда болса әйнә шу қиз -жуганлар Яркәнт шәһиридики кийим тикиш цехиға йәнә жәм болушти. Уларниң бешини қошушта Талдиқорғандики «Ажар тикинчилик фабрикиси» жавапкәрлиги чәкләнгән йолдашлиғиниң тәсисчилири Ержан Хамидуллаоғли билән қизи Баян Ержанқизи сәвәп болди. Яркәнттә болса тикинчиләрни жиғишта шу дәвирдики тикинчилик цехиниң мастери Нуржаһан Сонурова тәшәббускарлиқ көрситип, ишсиз жүргән кәсипдашлириға мүмкинчиликләр яритилди.
Биз бу йеңилиқтин хәвәр таптуқтә дәрру тикинчиләр цехиға йетип бардуқ. Худди чоң фабрикиларни әслитидиған цехта қатар -қатар қоюлған машинкиларда чаққан иш һәрикәтлири билән кийим тикиватқан тикинчиләрни көрүп зоқландуқ. Иссиқ һәм сәрәмжан залда қириқ тикинчи бир-биригә бақмай өз ишлири билән бәнт.
- Биз 1980-жиллири қиз вә оғул балилар үчүн мәктәп формилири ,брюка һәм желеткиларни тикәттуқ. У чағда Яркәнтниң өзидида 130, Ават вә Көктал йезилиридики шөбилиридә болса 200 дин ошуқ қиз- жуганлар ишләтти. Бирақ бу цехлар он бәш жилдин кейин йепилип қалди. Мана көрүп турупсиләр, аридин 27 жил өтүп биз йәнә бир цехни тәшкил қилдуқ. Мәзкүр филиалда 40 тикинчи жәлип қилинди. Тикинчиләр һәрбий кийим -кечәк тикиду. Икки бригада тикинчилири күнигә 200 һәрбий кийим тикиду. Тикилгән һәрбий формилар вилайәт мәркизигә йәткүзилиду.Мәһсулат Чегара хизмити буйрутмилири бойичә тикиливатиду.
Йошурушниң һажити йоқ, Яркәнт тәвәсидә тикинчилик фабрика шөбисини ечиш хелә бурун мәхсәт қилинип, Талдиқорғандин тәклип чүшсиму униң үчүн бена мәсилиси һәл болмиған еди . Мана мошундақ бир вақитта бизгә наһийәлик уйғур этномәдәнийәт мәркизиниң рәиси Ризайдин Әйсаев йенимиздин тепилип, Яркәнт шәһириниң һакими Болат Омаров билән мәслиһәтлишип, мәзкүр бена бөлүнди. Андин биз бенани жөндәш ишлирини елип бардуқтә, кийим тикиш машинкилирини елип келинип, уларни орнаттуқ. Әнди тикинчиликкә кимләр жәлип қилинди дегәндә рәһбәрлик билән келишип, әйнә шу тохсининчи жиллири бир сәптә ишлигән тикинчиләрни тәклип қилдуқ. Шуңа тенимәй дәрру ишимиз жүрүшүп кәтти дейишкә толуқ асас бар. Талдиқорғандики тикинчилик фабрикисиниң чоң технологи Роза Рамазанқизи бирнәччә күн «TYPICAL» «JACK» заманивий машинкиларда чевәрлик дәрислириниму өтти.
Он бәш жиллиқ әмгәк өтили бар тикинчиләр болғачқа тапавитиму яман әмәс. Айлиқ мааши әмгигигә қарап төлиниду. Ейиға бәзилири 60 миң тәңгә алса, бәзири 120 миң тәңгилик мәһсулат тикиду. Болупму Санийәм Мутәллипова, Раһиләм Иминова, Улбосын Әжиқулова, Бүвайшәм Барахунова, Ләззәт Қасимқулова, Кәмшат Көпбаева, Гөһәрбанум Мәңсүрова, Халидәм Шәрипова, Гүлнар Қарачулақова қатарлиқ маһир қоллуқ тикинчиләр нормисини ашуруп орунлаватиду. Ишләймән дегүчиләр аз әмәс. Әнди бизгә муражиәт қилип , ишлигүси келидиғанлар дәсләп синақтин өтидиғанлиғини әскәртимиз. Чүнки һәммила адәм тикинчи болуп ишләп кетәлмәйду. Лекин яркәнтлик ханим-қизларниң бу саһаға тәсадипи келип қалмиғанлиғи байқилиду. Қиз балиға йәттә һүнәр аз демәкчи, мома -анилардин үгинип, аилидә тикинчилик билән шуғуллинип, азду - тола хәвири бар екәнлиги байқавелиш тәс әмәс. Чүнки ишләватқанларниң көпинчиси өй шараитида кийим тикишни мәлум дәрижидә уқуп ,тәжрибиси барлиғини намайиш қиливатиду,-дәйду Нуржаһан Сонурова бизгә цех паалийитидин тонуштуруп .
Биз цехни арилап чиққичә чевәр қоллуқ тикинчиләр тәйяр мәһсулатни тәкшүрәш, назарәт қилиш хадимиға өткүзди. Мана шундақ тикилгән кийим кечәк бир әмәс бир нәччә тәкшүрәштин өткәндин кейинла Талдиқорғанға әвитилидикән. Һазирчә яркәнтлик ханим- қизларға бирму бир әскәртиш яки шикайәт ейтилмапту.
Нуржаһан Әркин қизи болса бизни кәлгүсидә цехни кәңәйтип, йәниму тикинчиләрни көпләп жәлип қилиш мәхсәт режилири бар екәнлигини, униң үчүн бенада мүмкинчиликләр бар екәнлигини йошурмиди. Бенада пәқәт рәтләш ,жөндәш ишлирини әмәлгә ашуруш лазимлиғини тәкитлиди.
Бу елимиз Президенти Мәктүбидики көрсәтмә-вәзипиләрниң тәвәдә әмәлгә ешиватқанлиғиниң нишани дәп чүшәндуқ.
Гөһәрбүви Исмайилжанова.

Күнтізбе

« Наурыз 2021 »
Дс Сс Ср Бс Жм Сб Жк
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

booked.net

  • Материалды қарау саны : 1665682