Тәдбирчанлиғиға сахавәтлик ярашқан

һазир Яркәнт базирида мәхсус нан сетилидиған ончә дуканни билимән. Издигән нениңизни шу йәрдин   таписиз. Тонур нени, булка, яки пәчләрдә пишириливатқан һәр хил нанни сетивелишиңизға болиду.Униңдин башқа барлиқ озуқ түлүк дуканлирида, покәйләрдә нан  вә нан мәһсулатлири сетилиду.  Бирақ баһалар һәр хил.  Мени нанниң баһаси қанчә қизиқтурса ,қайсу навайниң қолидин чиққанлиғиниму сораштуримән. Гәп нанниң сүпитидә .

Жавапларму һәр хил. Бәзилири шәхсий  өйләрдә уйғурниң тонурида нан йеқип, турмуш тирикчилигини йолға қоюватқанлиғи ейтиду. Һә көпчилиги болса  Маһинур Аюпова  исимлиқ навайниң мәһсулати дәп жавап бәрди. Маһинур Садиқ қизи маңа яхши тонуш. Мошу йәрдә мән яркәнтликләрниңла әмәс, бәлки Алмута , Талдиқорған, һәтта Астана, Қарағанда шәһәрлиридин келип кетиватқан туристларниңму   Яркәнтниң  мейизлик ненидин яқтуруп, көпләп сетип еливатқанлиғини байқидим.

     Наһийәлик Уйғур этномәдәнийәт мәркизи йенидики Ханим-қизлар кеңишиниң рәиси Маһинур һәдә бу кәсипниң қир-сирлири билән бөлүшти.  Наһийәдики әң қедимий Дехан Ғәйрәт  йезисида туғулуп өскән   у , әсли кәспи бойичә муәллим екән. Навай болимән дәп ухлиса чүшигиму кирмигән еди.  Шуниңғичә у муәллим болуп өсмүрләрни тәрбийиләп, оқутуп, арилиқта наһийәлик өрт бехәтәрлиги  хизмитидә инструктор, чоң инструктор бөлүм башлиғиниң орунбасари дәрижисигичә йәтти. У чағларда бу бөлүм Профессиональная пожарная охрана  дәп атилатти.

                 Маһинур муәллим

   -Чулуқай мәктивидә (һазирқи Жамалидин Босақов намидики оттура мәктәп) оқуватқан жиллири муәллим болушни арман қилдим.  Йезида туғулуп өстүм,  бош вақит тапсақла  бир кочида туридиған хошна қизлар билән «Ағчайлам», «Бәш таш» охшаш миллий оюларни ойнап чоң болдуққу.Толирақ достлиримни ,укилиримни олтарғузивелип мән уларға муәллим болувалаттим. Болупму ини-сиңиллиримға  ана тили,  математика пәнлиридин «дәрис өтәттим». Оюн қелипи укилирим тиңшимиса  жәзмән жазасини алатти. Шу балилиқ арман мени 8-синиптин кейин Яркәнттики педагогикилиқ училищесиға елип кәлди. Уйғур бөлүмидә  оқудум.  Устазлирим Мейманқиз Розиева, Һосманжан Мурдинов, Реһимәм Ибрагимова, Модәнгүл Башизова қатарлиқ өз пәниниң йетүк мутәхәссислиридин тәлим алдим.  Реһимәм Ибрагимова педагогика пәнидин дәрис берәтти.  Мейманқиз Розиева кураторимиз еди. һәр икки устаз  педагогикилиқ колллективта  алаһидә һөрмәт –иззәткә егә еди. Меңиш турушлири, дәрис өтүш методикиси, муәллимләргә хас кийиниши, чач үлгилиригә   һәммимиз һәвәс қилаттуқ . Биз, һәммимизла әйнә шу икки устаздәк муәллим болсақ, дәп  ойлаттуқ.  Әлвәттә оқушни зор қизиқиш һәм бар вужудум билән тиришип,  түгәттим. Қолумға башланғуч синип муәллими вә чоң пионер вожатыйи мутәхәссислиги бойичә диплом елип, педагогикилиқ паалийитимни Нағричи мәктивидә  башлидим. Нағричида уйғур синиплири йепилип қалдидә, маңа   Кичик Чиған оттура мәктивидә қазақ  синиплирида ишләшкә тоғра кәлди. Мәзкүр мәктәптә бир аз жиллар ишлидимдә, кәспимни өрт бехәтәрлиги хизмитигә йөткәш қарариға кәлдим,-дәп башлиди сөһбитини Маһинур Аюпова .

 Инструктор Маһинур 

 Һазирқи  Панфилов  наһийәлик өрткә қарши күришиш хизмити у жиллири Өрт билән  күришиш командиси( Профессиональная пожарная охрана) дәп атилатти.  У һәрбийләштүрүлгән бөлүм болғачқа Маһинур Аюповаға мәхсус оқуш орнини тамамлашқа тоғра кәлди.  Көкчетав  шәһиридики  Өрт билән күришиш алий мәктивидә оқуди. Шуниңдин кейин наһийәлик өрт бехәтәрлиги хизмитидә инструктор болуп ишқа орунлашти. һәқиқәтәнму наһийәдә бу  саһада нурғун ишлар елип берилсиму, өрт кетиш әһваллири пат-пат йүз берәтти. Униң алдини елиш қанчә әһмийәтлик болса, уни өчириш әһваллириму шунчә мурәккәп екәнлиги, болупму адәмләрниң һаятини сақлап қелиш мана шу бөлүм хизмәтчилиригә, уларниң кәспийлигигә бағлиқ еди . Шундақ екән бу саһадиму тиришип  ишлигәчкә чоң инструктор ,андин бөлүм башлиғиниң орунбасари вәзиписиниму шәрәп билән атқурди

 Тижарәтчи маһинур   

   Маһинур һәдә педагогикилиқ училищени тамамлапла яркәнтлик «Октябрьниң 40 жиллиғи» колхозида инженер-энергетик болуп ишләватқан яш мутәхәссис  Әркин Аюпов билән аилә қуруп, икки пәрзәнт сөйди. Ихтисадий боһран йүз бәргән  тохсининчи жиллири маашни  айлап -айлап  күтүшкә мәжбур болғинимиз һәммимизниң ядимизда. Әнди шу жиллири хошна Хитай жумһурийити билән туризм вә тижарәтчиликни тәрәққий әттүрүш мәхситидә өз ара келишим түзүлүп, чегариниң у йеқиға берип, сода- сетиқ ишлирини жүргүзүш қолға елинди. Мана ишу жиллир тавәкәлчиликкә бәл бағлап, нурғунлиған жутдашлири қатарида   хошна Хитай Хәлиқ Жумһурийитигә  қатнап, тижарәтчиликкә тутуш қилди. Шундақ қилип Алмута –Қорғас маршрути билән күндә дегидәк қатнап жүрүп, бу кәсипниң қир-сириниму үгәнди. Әйнә шундақ чағларда Алмутиға өзи билән Яркәнтниң мейизлиқ ненини елип жүрди.  Тижарәтчи кәсипдашлириниң Яркәнттә тонурда пишқан уйғурниң мейизлик нанлиридин  әтивалап  еливатқанлиғини байқап , көрүп жүргән у , ижаригә йәр елип  у 2002- жили  « Дока Хлеб» навайханисни  ачти. 

  Навай Маһинур

Шәһәрликләр билән   шәһәр меһманлири Маһинур Аюпованиң нанлиридин еғиз тегип, униң турақлиқ херидари болушқа башлиди. Дәсләптә икки тонур вә булка пиширидиған цехни  ишқа қошти.

     Әнди 2015- жили шу чағдики  наһийә һакими Ермек Келемсейит вә наһийә һакиминиң орунбасари Шөһрәт Қурбановниң  қоллап-қувәтлиши билән Яркәнтниң жуқарқи қисмидин йәр ажритилип  наһийәдә оттура вә кичик  тижарәтни тәрәққий әттүрүштики  «Даму» программиси бойичә несийә елиш арқилиқ  заманивий навайхана  селип,  чәтәлдин кәлтүрүлгән  пәчләр билән жабдуқлиди.

  «Аюпов» навайханиси наһийәдә елимиз Президенти  Мәктүплиридә  оттура вә кичик тижарәтни тәрәққий  әттүрүш  тапшурмилириға  әмәлий жавап  бериватиду. Иш биләрмән Маһинур Садиқ қизи билән Әркин Аюповлар  жигирмидин ошуқ адәмни иш билән тәминләватиду. Навайхана һойлисида һазир уйғурниң үч тонурида  вә Италия , Россиядин кәлтүрүлгән пәчләрдә пишиватқан мейизлик нан вә нан мәһсулатлирини  24 саат давамида сетип елишиңизға болиду. Баһаси 70  тәңгидин 120 тәңгигичә. Сүт вә май қошулған мейизлик   непиз нениға, тоғач, помнан охшаш нанниң он түрини той-төкүн вә нәзир-чирақларға буйрутма бериватқанларму аз әмәс. Һәтта Астана, Ақтав шәһәрлиригә елип кетидиғанларму бар .

       Сахавәтлик Маһинур

  Маһинур Садиқ қизи наһийәлик Ишбиләрмән аяллар Ассоцицияси наһийәлик шөбисиниң  бәш жилдин бу ян актив әзалириниң бири. Тәдбирчан  Маһинур   хәйри-еһсанлиқ ишларда башламчи болуватқанлиғини тәкитләш орунлуқ.  Тапқан пулиниң мәлум қисмини муһтажларға сәрип қилип, дуасини алмақта. Һәр жили он аилини отун көмүр, йемәк ичмәк билән  тәминләш билән  турақлиқ һалда  « Мәктәпкә йол» акциясидә көпбалилиқ , тәминати начар   үч  аилиниң балилирини  оқуш  қураллири, иссиқ кийим кечәк  билән тәминләп кәлмәктә.

  Тәдбирчанлиғиға сахавәтлиги ярашқан Маһинур Аюпова  наһийәлик Уйғур этномәдәнийәт мәркизи тәшкил қилинған күндин башлап , ханим-қизлар кеңишиниң әзаси сүпитидә униң паалийитини жанландуриватиду.  Мәйрәмләрдә  пешқәдәм устаз, арқа сәпниң қәһримани, қәһриман анилар, йеза егилиги ишләп чиқиришиниң мәрданилири билән башқошушларниң тәшәббускари болуши билән жумһурийәт  вә вилайәт даирисидики  мәдәнийәт күнлиридә  миллий таамлар  көргәзмисиниң муәллипи әйнә шу Маһинур Садиқ қизи.

 Униң көпқирлиқ әмгиги мунасип баһасини тапмақта.  «Тәдбирчан аяллар мәктивигә – 20 жил», «Бейбітшілік әлемі» қазақ ижадий бирләшмисиниң «Жыл мақтанышы» вә жумһурийәтлик  уйғур этномәдәнийәт мәркизи тәсис қилған « Сахавәт» медали билән тәғдирләнди.

      Аиләвий тижарәт

-Тижарәттә  херидарни «қачуруп»қоймаслиқ  муһимдур. У һәл қилғучи әһмийәткә егә  екән. Херидарға болупму нан вә нан мәһсулатлирини сүпәтлик, мейизлиқ,  болуши әң әвзили сүт ,су май,маргарин қуюп жуғирилған, салмиғиниң тәләпләр дәрижисидә қилип, һалал хизмәт көрситиш  тәләп қилиниду. Яркәнттә һазир навайлар тола. Һәр ким өз  талғимиға лайиқ болушиға әһмийәт бериду.  Бизниң навайханида мошу тәләпләрдин  чәтнәп кетишкә йол қоюлмайду.  Чүнки биз, уйғурлар, дәстихинимизни нансиз тәсәввур қилалмаймиз. Мана шундақ  жутдашлиримизни вә шәһәр меһманлирини иссиқ нан билән тәминләп, дуасини елиш үчүн аиләвий тижарәтчиликкә тутуш қилдуқ- деди  Маһинур Садиқ қизи сөһбәт ара .

  Аһалиниң тәләп-еһтияжиға бағлиқ нан вә нан мәһсулатлирини тәйярлап, уни сетишта  Әркин ака билән Маһинур һәдигә оғли Қурванжан вә қизи Гөзәлләрму қол –қанат болмақта.  Ейтмақчи  Қурванжан наһийәлик Өрт бехәтәрлиги хизмити бөлүмидә ишләп  дәм елишқа чиққандин кейин,  қизи Гөзәл узун жиллар наһийәлик туғутханида һәмширә болуп ишәватати, аниси охшаш кәспини өзгәртишкә тоғра кәлди. Бу болса елимиз Президентиниң  Мәктүбидики  тижарәтниң әвлаттин-әвлатқа қалидиған аиләвий әнъәнигә  айлиниши керәклиги тоғрисидики көрсәтмилириниң әмәлгә ешиватқанлиғиниң ярқин ипадиси.

   Биз ахирида навайхана егисидин тәклип вә пикирләр  китапчисиға көз жүгәртишни өтүндуқ.  «Аюпов» шәхсий  навайханисида аиләвий тижарәттә   тәйярлиниватқан нанниң он түри бойичә бирму қетим әризә шикайәт , наразилиқ болмиған. Буни навайханида болған икки саат мабайнида  тонурдин пишип чиқиватқан хуш пурақлиқ мейизлик нан вә пәчләрдики булка вә булочкиларни елиш үчүн келиватқан херидарларниң айиғи үзүлмәйватқанлиғи дәлилләп турди.

Гөһәрбүви

Исмайилжанова.

Күнтізбе

« Маусым 2018 »
Дс Сс Ср Бс Жм Сб Жк
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

booked.net