ПАНФИЛОВ АУДАНЫ

Муһтажлар көңлидин чиқип

14.05.2021ж

Қазақстан Жумһурийитиниң Тунжа Президенти-Елбасы Нурсултан Назарбаевниң тәшәббуси билән башланған «Елбасы жылуы» хәйрихаһлиқ акцияси даирисидә Жумһурийәтлик Уйғур этномәдәнийәт мәркизи озуқ түлүк, вә биринчи новәттә лазим болидиған товарлар түридә ярдәм көрситишни башлап кәтти.

ЖУЭММ башқарма әзалири наһийәдә болуп муһтаж жанларға ярдәм көрсәтти .
Наһийәлик Уйғур этномәдәнийәт мәркизиниң мәжлисләр залида өткән акцияни жумһурийәтлик Уйғур этномәдәнийәт мәркизиниң ижраий мудири Зихруллам Қурванбақиев ечип, униң мәхситигә тохталди.
-Һәммимизгә мәлумки, йеқинда елимизниң Тунжа Президенти-Елбасы Нурсултан Назарбаевниң тәшәббуси билән «Елбасы жылуы» хәйрихаһлиқ акцияси башланди. Бу изгү ишни жумһурийәтлик уйғур этномәдәнийәт мәркизи әзалири, жүмлидин Қазақстан хәлқи Ассамблеяси рәисиниң орунбасари, Алмута вилайәтлик Уйғур этномәдәнийәт мәркизиниң рәиси Закиржан Қузиев билән ЖУЭММ рәисиниң орунбасари Долқунтай Абдухелил қоллап -қувәтләп, муһтаж жанларға озуқ -түлүк севитини тапшуруш тәшәббусини көтәрди. Бүгүн биз әйнә шу һамийлиримиз көрситиватқан хәйрихаһлиқ паалийәтни Улуқ Ипәк йоли бойидики Яркәнт тәвәсидин башлидуқ,-деди.
Андин сөзгә чиққан Закиржан Қузиев:
- Бу хәйрихаһлиқ акция даирисидә жумһурийәтлик уйғур этномәдәнийәт мәркизи тәрипидин елимизниң жай- жайлиридин 2200 аилигә 12 милион тәңгилик ярдәм көрситишни мәхсәт қилдуқ. Бүгүн шуниң дәсләпкиси , Алмута вилайити бойичә 550 аилигә бу хилдики ярдәм көрситишни режилидуқ. Жүмлидин Яркәнт тәвәсидики 150 муһтаж аилигә озуқ түлүк тарқитилиду.
Акцияда шундақла Панфилов наһийәлик ички сәясәт бөлүминиң башлиғи Марат Илипов бирлиги билән өмлүги ярашқан тәвәдики милләтләр достлуғини тәкитләп, тижарәтчиләр вә миллий мәдәнийәт мәркизи тәрипидин бу хилдики хәйри- еһсанлиқ ишларниң давамлиқ уюштуриливатқанлиғини тилға алди. Бүгүнки акцияни уюштуруп, житим-йесир вә накаларниң көңлини елиш үчүн қәдәм тәшрип қилған Закиржан Қузиев башлиған ЖУЭММ башқарма әзалириға наһийә рәһбәрлири намидин миннәтдарлиғини изһар қилди. Акция давамида наһийәлик Уйғур этномәдәнийәт мәркизи рәисиниң вәзиписини атқуриватқан Азат Гайитов, ҚХА әзаси, ҚУЯБ рәиси Рустәм Хәйриев сөзгә чиқти. Шуниңдин кейин акция қатнашчилири, миллий мәдәнийитмизниң жанкөйәрлири, жигит башлири наһийәдики 150 аилигә озуқ түлүк севитини тарқатти.
Тәкитләш керәкки, Алмута вилайити бойичә башланған бу акция шу күни Уйғур вә Әмгәкчиқазақ наһийәлиридә давамлишип, 550 аилигә ун май вә шуниңдәк озуқ түлүк тарқитилди.
Гөһәрбүви
Исмайилжанова,
Турсунмәһәммәт
Мәшүров
чүшәргән сүрәт .