Айдарлар
Жетісу облысында балаларды 1-ші сыныпқа қабылдау басталды
- Толығырақ
- Жарияланды 05.04.2023 11:46
- Автор: Super User
- Категория: Өңір тынысы
- Қаралды: 415
2023-04-05
Балаларды бірінші сыныпқа тіркеу 1 сәуірде басталып, 1 тамызға дейін жалғасады. Өтінімді egov.kz порталы арқылы онлайн беруге болады. Ата-аналардың өтініші бойынша құжаттарды дәстүрлі қағаз түрінде де өткізуге рұқсат беріледі.
Сәуір айының бірінші аптасында Жетісу облысы бойынша 1-сыныпқа қабылдау туралы 352 өтініш келіп түсті. Оның 278-і облыс орталығы Талдықорған қаласының тұрғындарынан келген. Өңірлік коммуникациялар алаңында Жетісу облысының білім басқармасы орта білім беруді дамыту, қорғаншылық және қамқоршылық, тәрбие жұмысы бөлімінің басшысы Роза Тұрғанбаеваның қатысуымен 1 сыныпқа қабылдауға байланысты баспасөз мәслихаты өтті.
«Жетісу облысы бойынша құжаттарды https://e-zhetysu.kz/ электронды қызмет көрсету порталы арқылы жүзеге асырылады. Ата-аналарға құжаттарды электронды қызмет көрсету порталы арқылы өткізу үшін, облыстың барлық білім беру мекемелерінде интернет желісіне қосылған, өзіне-өзі қызмет көрсету орны ұйымдастырылған. Бұл жерде электронды цифрлық кілт алуға, құжаттарды порталға енгізуге білім беру мекемелері тарапынан практикалық көмек көрсетіледі», – деді спикер.
Бос орын болған жағдайда баланың ата-анасы немесе өзге де заңды өкілдері оқыту үшін кез келген білім беру ұйымдарын таңдауға құқығы бар. Қалалық жерлерде мектепке ең алдымен тұрғылықты мекен-жайы бойынша қабылданады, егер бос орын болған жағдайда ата-ана білім беру мекемесін таңдай алады.
Бала жалпы білім беретін мектептерде қабылдау үшін емтихан немесе тестілеу өткізілмейді, ал гимназия мен лицейлерге қабылдау конкурстық негізде жүзеге асырылады.
«Жалпы білім беретін мектепке қабылдау үшін 4 құжат жинау қажет. Бұл өтініш туу туралы куәліктің көшірмесі, баланың денсаулығы туралы құжаттар және 3х4 см өлшемді 2 фотосурет», – деді Роза Максимқызы.
Айта кетейік, Жетісу облысы бойынша 339 жалпы білім беретін метепте 2022-2023 оқу жылында 128 758 білім алды. Оның ішінде, өткен оқу жылында 1-сыныпқа 13 758 бала қабылданды. Жаңа 2023-2024 оқу жылында 1-сыныпқа 14 мыңға жуық баланы қабылдау жоспарлануда.
--
